Čakaja njesćerpnje na nowy nakład

wutora, 10. decembera 2019
artikl hódnoćić
(0 )

Tež w Budyskej Smolerjec kniharni je hor­ca faza dohodowneje předanje zabě­žała. Cordula Ratajczakowa je so z nawodnicu kniharnje serbskeho nakładnistwa Annett Šołćic rozmołwjała.

Dobra kniha hodźi so přeco jako hodowny dar – kajka pak steji nětko na čole lisćiny najbóle požadanych?

A. Šołćic: Mjez tuchwilnymi bestsellerami je to nowostka „Z Lipicy do hole“ Michała Andersa a Pětra Lipiča. Hladajo na to, zo staj awtoraj material z telko wjeskow zestajałoj, namakaja mnozy pak tekst pak wobraz po swojim zajimje. Wonaj staj woprawdźe do čorneho trjechiłoj. Dokelž je kniha tak woblubowana, je prě­ni nakład ze septembra hižo rozebrany. Čakamy tuž njesćerpnje na druhi nakład, kotryž ma hišće do hód wuńć. Mamy hižo­ dołhu skazansku lisćinu. Štóž je loni BOOKii-pisak kupił, móže jón nětko za dwě dalšej dźěćacej knize wu­žiwać, za „Kak na času je“ a „Swět wokoło nas“. Přełožk knihi „Findus a hara z honačom“, kotraž słuša mjeztym ke klasikarjam dźěćaceje literatury, steji na lisćinje přećow młodych čitarjow cyle horjeka. A štož wobkuzłacej hodownej atmosferje na kóždy pad polěkuje, su słuchohra „Knjez Mróz a knjeni Zyma“ a tři dźěle „Małeje Sněženki“.

Poslednje zarjadowanje LND lěta je hižo nimo, dalša nowostka pak hišće na čitarja čaka.

A. Šołćic: Loni wušły prěni dźěl biografije Benedikta Dyrlicha je zawěsće wćipnosć mnohich ludźi zbudźił, kak po lěće 1990 hač do dźensnišeho dale dźe. Serbskorěčnje druhi dźěl hižo předleži, do hód ma tež hišće němska wersija wuńć.

Njeposkićeće ludźom jenož dobru litera­turu, ale w adwentnym času tež serwis po­trjebje kupcow přiměrjeće.

A. Šołćic: Mamy nětko w adwenće přidatnje tež sobotu wot 10 do 17 hodź. wotewrjene. A tym, kotřiž hač do poslednjeho wokomika čakaja, budźemy tež patoržicu hač do 12 hodź. z dobrej radu a knihu poboku. Mjez hodami a silwestrom su wotewrjenske časy kaž zwučene wot 10 do 18 hodź. a štóž so boji, zo nowe lěto­ hižo ničo za čitanje njezměje, móže tež hišće silwester hač do 13 hodź. do kniharnje załožić. Hač do 6. januara změjemy inwenturu, potom budźemy zjawnosći zaso k dispoziciji. Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND