Nastupajo CD optimistiska

štwórtk, 19. decembera 2019
artikl hódnoćić
(0 )
 Sylwija Rječcyna  Foto:  SN/Hanka Šěnec Sylwija Rječcyna Foto: SN/Hanka Šěnec

Adwentny koncert bě zdobom zakónčenje jubilejneho lěta 1. serbskeje kulturneje brigady. Bosćan Nawka je so ze zamołwitej za organizatoriske naležnosće brigady, wučerku stawiznow a serbšćiny Sylwiju Rječcynej, wo wusahowacych wjerškach minjenych měsacow kaž tež wo wuhladach do přichoda rozmołwjał.

Knjeni Rječcyna, cyle powšitkownje: Kajki je Waš wosobinski facit jubilejneho lěta składnostnje 70. narodnin brigady?

S. Rječcyna: Směm rjec, zo je so nam z organizatoriskeho wida wšitko tak poradźiło, kaž smy sej to předewzali. Zasadnje je dźě tak, zo žada sej tajke lěto dołhodobne planowanje, wosebje potom, hdyž sej k narodninam prapremjeru popřeješ. Ideja dźě bě, sydomdźesaćiny nic hobersce a wšitkich bywšich čłonow brigady zapřijimajo woswjećić, ale z wulkim oratorijom. Mysličku, so snano zaso raz na projekt zwažić, kaž bě to „Wětrnik a časy“, mějachmy hižo cyłu chwilu. A bě jasne, zo chcemy jón znowa zhromad­nje ze Serbskim ludowym ansamblom a z band Malty Rogackeho zwoprawdźić. Za tajku dołhodobnu naležnosć trjebaš spušćomnych partnerow, a dźakuju so profesionelnym hudźbnikam, zo nam runje to hižo wjele lět su. To samsne płaći za komponista Měrćina Weclicha, z kotrymž sym projekt rozjimała, jako njebě wjele wjace hač zakładna ideja. Hižo ryzy ličba sobuskutkowacych kaž tež do organizacije zaplećenych pokazuje, zo njebě jednore wšitko wosebje časowje koordinować. Wjeselu so tuž, zo je so prapremjera oratorija „Hrodźišćo“ tak wuběrnje šlachćiła, logistisce kaž wuměłsce.

„Hrodźišćo“ bě bjezdwěla wulki wjeršk jubi­leja, za šulerjow kaž tež za publikum. Što móžeće nam z takrjec interneho wuhódnoćenja přeradźić?

S. Rječcyna: Wobdźiwam, kak su naši wobdarjeni šulerjo z cyłkownej situaciju wobchadźeli a sej njehladajo časoweho wućeženja stajnje elan a werwu wobchowali. Na předstajenjomaj w Chrósćicach su woprawdźe přeswědčili. Wulka česć bě nam tež wulět do Čěskeje, hdźež předstaji brigada oratorij we wobłuku zahajenja „Lěta Łužiskich Serbow w Liberecskim kraju“. Njewšědny to wukon šulerjow, wšako bě to za nich jara dołhi dźeń: Rano zahe do šule, potom z busom do Libereca, połdrahodźinska proba, serbsku narodnu drastu so hotować, wustup a naposledk nawrót do Łužicy – to zawěsće cyle tak jednore njebě. Nažel je tónle kompaktny wotběh tomu zadźěwał sej po koncerće dlěje z tamnišimi přihladowarjemi mysle wuměnić. Přiwšěm bě wothłós tohorunja wuběrny. Zjimajo móžu rjec, zo smy sej na organizatoriskej runinje kaž tež mjez za wuměłski nawod zamołwitymi pře­zjedni, oratorij hišće časćišo prezentować.

Mnozy wopytowarjo předstajenjow „Hrodźišća“ prašachu a prašeja so za CDju ...

S. Rječcyna: W tym nastupanju tuchwilu diskutujemy, a sym dosć optimistiska, zo so dojednamy a zo budźe zynkonošak na předań – zawěsće nic klětu, ale snano 2021. Hižo naspomnjena ko­­ordinacija terminow za tajku produkciju je jedna přičina za to, a dołhož nimamy zele­nu swěcu Załožby za serbski lud, nje­móžemy konkretny časowy plan zdźěłać. Wězo dyrbimy najprjedy wotpowědne podłožki zestajeć a próstwu wo spěchowanje zapodać, štož hišće chwilku traje.

Prapremjera a slědowace předstajenja su šulerjam snano tajke něšto kaž „wosušk“. Kak woni z tym wobchadźeja so nětko zaso­ ze „wšědnym chlěbom“ spokojić?

S. Rječcyna: To bě wězo mały łamk. A přiwšěm su so spěšnje přichodnemu wužadanju wěnowali, mjenujcy tradicionalnemu adwentnemu koncertej minjenu sobotu. Scyła: Druhdy so woprawdźe dźiwam, kak wjelestronscy woni su. Tak so mnozy čłonojo brigady w najwšela­korišich skupinach angažuja. To je nam lětsa zmóžniło, oratorij z choreografiju wobrubić, a to z pomocu folklorneho ansam­bla Wudwor a jeho wuměłskeho nawody Kornela Kolembusa. Spěwacych rejwarjow wšak tak často njedožiwiš. Mnozy hraja na instrumentach, štož dźěło z dirigentom Friedemannom Böhme kaž tež z profesionelnymi hudźbnikami wolóža. Myslu sej, zo to wšitkich cyłkownje wobohaća.

Što maće za přichodne lěto předwidźane?

S. Rječcyna: Krutej terminaj stej kóždolětne probowe lěto w Hejnicach a nalětni koncert 24. apryla w Jablonecu nad Nisou. Nimo toho rešeršujemy runje inten­siwnje za program składnostnje 175. róčnicy prěnjeho, wot Korle Awgusta Kocora a Handrija Zejlerja w Budyskej třělerni wuhotowaneho serbskeho chóroweho swjedźenja. Chcemy znajmjeńša dźěl tehdyšich spěwow znowa zanjesć. Dalše tradicionalne wjerški wostanu wobdźělenje brigady na šulskim swjedźenju Serbskeho gymnazija Budyšin, přinošk na schadźowance a adwentny koncert w Michałskej cyrkwi. Za na­zym­ski koncert dojědźemy sej 3. oktobra ke Krabatowemu młynej w Čornym Chołmcu.Wutrobny dźak za rozmołwu!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND