51 Sokołkow a Sokołow sportoweho towarstwa Sokoł Ralbicy/Hórki je so w juniju do Čěskeje podało, hdźež wobdźělichu so w měsće Spálené Poříčí na 61. sportowej wuměnje. Hižo dlěje hač 20 lět wobsteji zdobom partnerstwo mjez tymle městačkom, kiž leži na zapadźe Čěskeje něhdźe 25 kilometrow južnje Plzena, a gmejnu Ralbicy/Róžant.
Po pjatkownym přijězdźe zetkachu so spřećelene swójby doma abo w korčmičce při sportnišću TJ Sokol Spálené Poříčí, zo bychu so wo najnowšich podawkach w Čěskej a we Łužicy rozmołwjeli. Sobotu dojědźechu sej wšitcy zhromadnje do města Blatná, kotrež leži něhdźe 20 kilometrow sewjernje Strakonic. Tam wobhladachu sej hród Blatná. Hród z kapałku, kotryž je w priwatnym wobsydstwje, bě w 13. lětstotku nastał. Jón wobdawa rjana wulka jendźelska zahroda ze stolětnymi štomami. Tam pasu so skludne dańki, kotrež móžachu dźěći a dorosćeni picować.
