Minjeny kónc tydźenja su Nowowješćenjo swój lětuši wjesny swjedźeń swjećili. Tři dny wočakowaše wopytowarjow wotměnjawy program ze sportowymi wubědźowanjemi, hudźbu, překwapjenkami a dobrej naladu. Na swjedźenišću witachu tójšto hosći ze wsy a z wokoliny.
Swjedźeń zahaji so z natočenjom piwa, při čimž so diskotekaraj Phase2 a DJ Savid wo hudźbu staraštaj. Hač do zažnych rańšich hodźin hosćo rozwólnje swjećachu a rejwachu. To bě radźeny start swjedźenskeho kónca tydźenja. Sobota steješe cyle w znamjenju hry, wjesela a zhromadnosće. Na klubowej olympiadźe měrješe sydom mustwow we wšelakich disciplinach swoje mocy. Hač při krosnowanju na walčkach słomy, při wubědźowanju z wotpadkowymi sudobjemi abo na dalšich stacijach – teamowy duch a wušiknosć běštej požadanej. Wosebity wjeršk bě rodejo na mechaniskim byku, kotryž wobdźělnikow a přihladowarjow w samsnej měrje zahori. Na kóncu so wospjet mustwo High5 přesadźi a z tym swój lońši titul wuspěšnje zakitowaše.
