Při najkrasnišim wjedrje su sej čłonojo Budyskeje župy „Jan Arnošt Smoler“ z busom do kónčin wokoło Slepoho dojěli. Rodźenu Trjebinjanku dr. Ruth Mroskojc běchu sej jako wěcywustojnu přewodźerku po kónčinach jeje domizny přeprosyli. Hižo w busu poda wona wobdźělnikam župneho wulěta dohlad do wosebitosćow Slepjanskich kónčin a pozdźišo tež wo slepjanšćinje kaž tež wo mjenach dworow a ležownosćow.

Prěnja stacija wuprawy běštej zakładna a srjedźna šula w Slepom. Tři holcy w Slepjanskej drasće nas serbsce spěwajo z chlěbom a selu witachu. Wjednica zakładneje šule Nadine Stelzerowa nas wo dobrych nazhonjenjach, ale tež wo problemach informowaše. Tak wojuja wo ministerialnu podpěru, wšako njeliča jako prawa „serbska šula“. Zahubne je, zo na přikład pobrachowacych wučerjow dla tydźensce prawidłownje 14 hodźin serbšćiny wupaduje. Hibićiwy nawoda tamnišeje srjedźneje šule Jan Hrjehor nas po rumnosćach wodźeše. Wobdźiwachmy nowu sportownju a biblioteku kaž tež wurjadnje wuhotowane fachowe kabinety.