Berlin (dpa/SN). Do dźensnišeho wuradźowanja ze zwjazkowymi krajemi wo koronakrizy je kanclerka Angela Merkel (CDU) před raznje stupacymi ličbami nowo­natyknjenjow warnowała. Hdyž wuwiće dale tak póńdźe kaž dotal, mamy k hodam wšědnje 19 200 nowych infekcijow, rjekny zwjazkowa kanclerka po informacijach wobdźělnikow na wčerawšej widejowej konferency prezidija CDU. Wona­ bě sej wuličić dała, što móhło so w najhóršim padźe w Němskej koronapandemiju nastupajo hišće stać.

Na widejowej konferency chcychu Angela­ Merkel a ministerscy prezidenća zwjazkowych krajow wo kmanych na­prawach přećiwo přiběracym ličbam in­fek­cijow diskutować, hladajo předewšěm na bližacy so zymski počas. Najwažniše su šule, pěstowarnje a hospodarstwo, Merkel wuzběhny. Zamołwići měli na lokalne infekciske ćežišća konsekwentnje reagować, „hewak změjemy hody ličby kaž w Francoskej“.

Francoska je wot pandemije wosebje potrjechena. Dotalny rekord infekcijow běchu tam minjeny štwórtk z wjace hač 16 000 nowymi padami wirusa registrowali.

Budyšin/Zhorjelc (SN). Wčerawša mje­zyrozprawa Zwjazkoweje towaršnosće za kónčne składowanje, po kotrejž by tež Łužica jako składźišćo atomowych wotpadkow do prašenja přišła, je prěnje reakcije zbudźiła. Předsyda Domowiny Dawid Statnik w nowinskej zdźělence piše: „Łužica je symbol strukturneje změny. Zwjazkowy zakonjedawar wjele in­westuje, zo móhło po wjace hač lětstotk trajacym wudobywanju wuhla wjele noweho a do přichoda sahaceho nastać. Wotstronjenje stareho nošaka energije, z kotrymž so Němska tohorunja rozžohnuje, njehodźi so do socioekonomiskeje krajiny našeho regiona, njerěčo ani wo ekologiskich prašenjach. Rozum sej toho­dla žada, zo njeje Łužica po přichodnym kole wotwažowanja hižo na lisćinje.“

Zhorjelski krajny rada Bernd Lange, (CDU) měni, zo je Łužica prosće wopačne městno za atomowe składźišćo, dokelž ma ze strukturnej změnu dosć činić. „Na zapadźe mějachu wjele profita z atomowowych milinarnjow. Wotpadki nětko nam wozyć, to wotpokazuju.“

Nutřkowny minister Wöller rěči wo 17 padach minjene pjeć lět

Drježdźany/Berlin (dpa/SN). Po posudku sakskeho nutřkowneho ministra Rolanda Wöllera (CDU) ma tež policija w swobodnym staće ćeže z rasizmom. „Pad w Lipšćanskej policajskej direkciji pokazuje, zo mamy bohužel tež w Sakskej tónle problem“, rjekny Wöller rozhłosowemu sćelakej MDR aktuell. Při tym njemóžeš z toho wuchadźeć, zo jedna so wo jednotliwy pad. Minjeny pjatk bě policija zdźěliła, zo su jednanja přećiwo policistej prawicarskoekstremnych a rasistiskich wuprajenjow w interneće dla zahajili. Po sło­wach Wöllera su minjene pjeć lět 17 tajkich padow registrowali. Při tym dźěše wo přećiwo wukrajnikam měrjace so a rasistiske wuprajenja kaž tež wo wužiwanje wustawu ranjacych symbolow. „Rasizm a ekstremizm w rjadach sakskeje policije njećerpimy a konsekwentnje přećiwo tomu postupujemy“, Wöller pod­šmórny. Potrjecheneho zastojnika w Lipsku su hnydom ze słužby wuzamknyli.

Prěnje reakcije na wčerawšu rozprawu Towaršnosće za kónčne składowanje atomo­wych wotpadkow su zrozumliwe. Nichtó wo strašne wotpadki njerodźi. To směmy so na wjele lět trajace turbulentne debaty, na demonstracije potrjechenych a na sudniske skóržby přihotować, budźe-li něhdy doskónčnje rozsu­dźene, hdźe ma wone kónčne składźišćo jadrowych wotpadkow nastać, w kotrymž tónle njerjad hišće miliony lět radioaktiwnje prudźi. Něchtóžkuli drje hakle nětko spóznawa, zo atomowe milinarnje drje žane wuhlo njetrjebaja, kiž wobswět zanjerodźa, zo pak za to čłowjestwu strašne powostanki zawostajeja, kotrež budu hišće­ generacije po nami zaběrać. Zaji­mawe budźe zadźerženje Zelenych. Woni njetrjebaja wjace do delnjosakskeho Gorlebena jěć a tam přećiwo transportam protestować, ale dyrbja wotnětka zamołwiće sobu skutkować. Wšako we wjacorych zwjazkowych krajach sobu knježa, tež w Sakskej. Marko Wjeńka