Drježdźany (B/SN). Na swjatočnej Božej mši w Drježdźanskej katedrali je biskop Heinrich Timmerevers 10. julija šěsć žónskim a šěsć mužam cyrkwinsku dowolnosć wučenja Missio Cannonica spožčił. Woni smědźa nětko we wobłuku biskopstwa Drježdźany-Mišno jako wučerki abo wučerjo nabožiny skutkować. W swojim prědowanju pokaza biskop na to, zo je wěra kaž wulke twarnišćo. Wučacy nabožiny maja nadawk, pomhać dorostowacym při orientaciji a jich přewodźeć w pytanju za křesćanskej wěru.
Diakonija bilancowała
Washington/Chengdu (dpa/SN). Po zawrjenju konsulata w Houstonje su chinscy diplomaća zastupnistwo w texaskej metropoli wopušćili. Krótko po tym su USA objekt přewzali. Tamniše knježerstwo bě objekt zawrěło, wumjetujo Chinje spionažu. Jako wjećbu za to je China ameriski konsulat w měsće Chengdu zawrěła. Tež tam su mjeztym posledni diplomaća dom wopušćili. Na to chinscy policisća objekt wobsadźichu.
Lindner za winowatostny test
Berlin (dpa/SN). Předsyda FDP Christian Lindner sej žada, zo měli wšitcy, kotřiž so z dowola do Němskeje wróća, winowatostny test na koronawirus přewjesć dać a jón sami zapłaćić. „Štóž so dobrowólnje do rizikowych kónčin poda, dyrbjał tež akceptować, zo ma test sam zapłaćić“, rjekny Lindner wčera w sćelaku ZDF. To je jemu „prašenje swójskeje zamołwitosće“. Ministra za strowotnistwo Jensa Spahna (CDU) je Lindner namołwił strategiju zdźěłać, kak měli z dowolowymi nawrótnikami wobchadźeć.
Wjace natyknjenych
Mnichow (dpa/SN). Po masowej infekciji 174 ratarskich pomocnikow w plahowarni zeleniny w bayerskim Mammingu je tam knježerstwo dźensa staciju za test korony natwarić dało. Wobydlerjo gmejny maja składnosć, so w mobilnym stanje darmotnje na koronawirus testować dać. To je bayerska ministerka za strowotnistwo Melanie Huml (CSU) připowědźiła. „Runje w tajkej situaciji je to jara wažny poskitk wobydlerjam.“
Kónc tydźenja bě krajnoradny zarjad Dingolfingu-Landauwje zdźělił, zo je so w mjeztym zawrjenym ratarskim zawodźe w gmejnje z 3 300 wobydlerjemi třećina tam dźěłacych ratarskich pomocnikow natyknyła. Pomocnicy z Madźarskeje, Rumunskeje, Bołharskeje a Ukrainy běchu na žnjach kórkow zasadźeni. Woni bydla w kontejnerach. Zawod je mjeztym z płotom wobdaty a w karatenje.
Kijew/Donjeck (dpa/SN). Po wjace hač 20 pospytach płaći wot dźensnišeho w krizowej kónčinje na wuchodźe Ukrainy přiměr. „Dospołny a wšo wopřijacy přiměr“ je wot połnocy skutkowny, zdźěli prezidialny zarjad w Kijewje. Ukrainske wójsko a zastupnicy proruskich wojowarjow z kónčin wokoło Donjecka a Luhanska běchu so na kónc wojowanjow dojednali. Dotal běchu wšitke dojednanja w tym nastupanju po krótkim času zaso zwrěšćili. Ruski prezident Wladimir Putin a ukrainski prezident Wolodimir Zelenskij chwaleštaj w telefonaće dojednanje na přiměr. Zdobom žadataj sej wobaj wjace prócowanja kontaktneje skupiny, dotalne dojednanja přesadźić.
Wot nalěća 2014 wojuja jednotki ukrainskeho knježerstwa přećiwo wot Ruskeje podpěranym zběžkarjam. Po trochowanju UNO je w bojach dotal wjace hač 13 000 ludźi žiwjenje přisadźiło. Lěta 2015 z pomocu Němskeje a Francoskeje wujednany měrowy plan předwidźi wojowanja a wólby skónčić. Hišće lětsa planuja mjezynarodnu konferencu.
Paduchow wo pomoc prosył je farar w nižozemskim Schinnenje pola Maastrichta, po tym zo bě zamk tabernakla zaprajił. Wjacori zamkarjo běchu podarmo spytali trezor, w kotrymž su keluchi a woblatka, bjez škody wotewrěć. „Kotry paduch ma nazhonjenje při wotewrjenju pjenježneho kamora?“, farar twitterowaše. „Alarmowu připrawu hasnjemy. Město policije syda kofej a tykanc.“ Dotal njeje so hišće žadyn „zajimc“ přizjewił.
5 000 dolarow za pokradnjeneho barika aposkića Hollywoodski dźiwadźelnik Ryan Reynolds. Žona z kanadiskeho Vancouvera je so w telewizy wuskoržiła, zo bě jej něchtó małeho barika pokradnył. Reynolds, kiž tohorunja z Vancouvera pochadźa, zahaji na to z dalšimi prominentnymi akciju. Wosebitosć barika je ta: W nim je rekorder z hłosom mjeztym zemrěteje maćerje žony.
Brüssel (dpa/SN). Europski parlament je na wjeršku EU wujednany europski etatowy paket najprjedy raz blokował. Hłowny zaměr je, wjace pjenjez za škit klimy, slědźenje, strowotu a studentow wuzbytkować, zdźěli parlament w z wulkej wjetšinu schwalenej rezoluciji. „Njedamy sej tole lubić“ rjekny frakciski šef Europskeje ludoweje strony Manfred Weber. Zapósłancy žadaja sej nimo toho jasne rjadowanje, zo je wupłaćenje pjenjez na dodźerženje prawostatnosće wjazane.
China reaguje na wukaz USA
Peking (dpa/SN). Reagujo na zawrjenje chinskeho konsulata w Houstonje je China nětko USA namołwjała, swoje diplomatiske zastupnistwo w juhochinskim měsće Chengdu zawrěć. Naprawa je „legitimna a trěbna reakcija na njerozumne jednanje USA“, zdźěla wonkowne ministerstwo w Chinje. USA běchu do toho zawrjenje chinskeho konsulata w texaskim Houstonje wukazali a tak napjatosće mjez krajomaj přiwótřili.
Přepytuja dźěło policije