Přećiwo prawicarjam pola policije
Před statnym wliwom warnował
Wuradźuja wo dalšim wuwiću hospodarstwa w časach koronakrizy
Hannover/Berlin (dpa/SN). Prezident Zwjazka němskeje industrije Dieter Kempf je před přewulkim statnym hospodarstwom jako sćěh koronakrizy warnował. Kempf rjekny wčera na wotewrjenju „digitalnych dnjow“ na Hannoverskich wikach, zo je politika po wudyrjenju krizy spěšnje reagowała, zo by firmam pomhała. W zwisku z poněčimnym wožiwjenjom hospodarstwa pak měł so stat nětko z „rjadowanym cofnjenjom“ z hospodarskeho žiwjenja zaso wróćo sćahnyć. Prezident zwjazka industrije potwjerdźi w tym zwisku model socialneho wičneho hospodarstwa. Pozadk wuprajenjow je zjaw, zo móhł so stat nimo Lufthansy tež na dalšich krizowych předewzaćach pjenježnje wobdźělić a tak na nje wliw wukonjeć. Bytostne je, zo stat swoje wobdźělenje na jednotliwych předewzaćach stajnje tež z jasnym planom „exita“ zwjazuje. Přiběrace tendency statneho dirigizma wobkedźbujemy w němskim hospodarstwje z wulkimi starosćemi.“
To a tamne (15.07.20)
Stare piwo a mortwy ptačk stej w Sewjerorynsko-Westfalskej wulkozasadźenje wohnjoweje wobory zawinowałoj. Šoferej nakładneho awta bě „žołto-bruna juška“ napadnyła, kotraž kapaše z wotstajeneho připowěšaka. Jako tež hišće mortweho ptačka pod připowěšakom wuhlada, alarmowaše wodźer Lkw-ja wohnjowu woboru. Hotujo so na chemiski alarm přijědźechu kameradojo w škitnych woblekach. Spěšnje so wukopa, zo jedna so wo stare piwo, kotrež bě z tyzow wuběžało. Hač bě zahinjeny ptačk přewjele skaženeho piwa laptał, wosta porno tomu njejasne.
Tajni policisća w Nižozemskej stawkuja za wyše mzdy, a činja to tohorunja tajnje. Tak přewjeduja protestne akcije w swojich běrowach, město toho zo bychu podhladnych wobkedźbowali abo techniku za jich wotposkanje zatwarjeli.
Kniha wo Trumpje wuńdźe
New York (dpa/SN). Bratrowča prezidenta USA Mary Trump smě swoju wotkrywansku knihu wo Donaldźe Trumpje kaž planowane dźensa wozjewić. To je sudnistwo w New Yorku rozsudźiło, wotpokazujo skóržbu młódšeho bratra Trumpa Roberta. Tón bě argumentował, zo kniha swójbne potajnosće wobsahuje. Titul 240 stronskeje knihi rěka „Přewjele a nihdy dosć – Kak je naša swójba najstrašnišeho muža swěta stworiła“. Němski přełožk ma 31. awgusta předležeć.
Wolóženja zaso zběhnjene
Sacramento (dpa/SN). Raznje přiběraceje ličby nowych koronainfekcijow dla je Kaliforniska wjele wolóženjow swojich wobmjezowanjow zaso zběhnyła. Tak dyrbja bary, cyrkwje a muzeje w na wobydlerstwo najbohatšim staće USA zaso zawrěć, guwerner Gavin Newsom připowědźi. Hosćencarjo smědźa ludźi jenož hišće pod hołym njebjom posłužować. Tež fitnesowe studija a frizerske salony wostanu začinjene. W někotrych kónčinach, kaž w Los Angelesu, su tež šule zaso zawrěli.
Macron so dźakował
Hižo pjaty dźeń za sobu su w Bołharskej přećiwo knježerstwu ...
Łužica a Berlin so zbližatej
Choćebuz/Berlin (dpa/SN). Pjenježnje podpěrana strukturna změna w zwisku ze skónčenjom zmilinjenja brunicy po měnjenju braniborskeho społnomócnjeneho za Łužicu region ze stolicu Berlinom zbliža. Berlin je wot wyšeho centruma Choćebuz, ale tež wot Wětošowa a Złeho Komorowa w běhu 60 mjeńšin docpějomny, měni społnomócnjeny krajneho knježerstwa za Łužicu Klaus Freytag we wčerawšim wudaću nowiny Märkische Allgemeine z Podstupima. „Tak je dale a atraktiwniše, tež zwonka metropole a za awtodróhowym kołom bydlić a dźěłać. Łužica słuša do regiona stolicy.“
Freytag zasadźa so zdobom za wuske zhromadne dźěło ze Sakskej. Wažne je, „zo wobhladujemy Łužicu na městnje jako cyłk“, społnomócnjeny wuzběhnje. Zamołwići dyrbjeli so prašeć, kak hodźał so projekt zwoprawdźić, kotryž na Grodk runje tak wuprudźa kaž na Wojerecy. Organizować měli to we wobłuku komunalneho dźěła.
Wuradźuja wo dalšich wolóženjach
Drježdźany (dpa/SN). Sakske krajne knježerstwo je so dźensa w Drježdźanach schadźowało. Mjez druhim wuradźowachu wo nowym škitnym wukazu koronawirusa dla, kotryž ma wot 18. julija hač do kónca awgusta płaćić. Tón předwidźi dalše wolóženja w koronakrizy kaž prózdninske lěhwa a swjedźenje w zawodach a towarstwach. Po wukazu móhło so hač do 50 wosobow na tajkich zarjadowanjach wobdźělić. Na polu wólnočasneho sporta smědźa po wšěm zdaću zaso přihladowarjow witać, potajkim tež na koparske hry. Za profijowu kopańcu pak rjadowanje hišće njepłaći. Za nju planuja wolóženja wot 1. septembra. Wo nadrobnosćach chcychu zjawnosć po posedźenju informować.
Do dźensnišeho zetkanja je strowotniske ministerstwo wozjewiło, zo móža w Sakskej mjeztym wšědnje hač do 5 000 testow koronawirusa dla přewjesć. Krajny přepytowanski wustaw swoju kapacitu wot spočatnje 150 krok po kroku powjetša, kaž ministerka za strowotnistwo Petra Köpping (SPD) zdźěli.
Dudźe k dobyću gratulowali
Prezidentske wólby w Pólskej z wulkimi regionalnymi rozdźělemi
Berlin/Brüssel/Waršawa (dpa/SN). Němski zwjazkowy prezident Frank-Walter Steinmeier je Andrzejej Dudźe k dobyću při prezidentskich wólbach w Pólskej gratulował. Zdobom wón jeho pohonjowaše so za jednotu pačeneho kraja zasadźić. „Přeju Wam zmužitosć a móc, k jednoće pólskeho ludu přinošować“, wuzběhny Steinmeier w gratulaciskim spisu po informacijach prezidialneho zarjada. „Runje tak so nadźijam, zo móžemy zhromadnje tež přichodnje k dobremu susodstwu mjez Němcami a Polakami w zjednoćenej, sylnej Europje přinošować“, Steinmeier dale pisa. Ke gratulantam po prezidentskich wólbach słušeštaj tež prezidentka komisije Europskeje unije Ursula von der Leyen a němski wonkowny minister Heiko Maas (SPD).
