Nowa app korony dla bórze hotowa
Berlin (dpa/SN). Minister za strowotnistwo Jens Spahn je připowědźił, zo chce w běhu tydźenja warnowansku app koronawirusa dla předstajić. „Telko časa trjebamy za wuwiće, dokelž stajamy wysoke naroki“, rjekny minister Spahn w nowinje Rheinische Post. Tak dyrbja razne předpisy nastupajo škit datow a energijowu eficiencu spjelnić. „App, kotraž w běhu něšto hodźin akumulator mobilneho telefona wuprózdni, nichtó njewužiwa.“ Spahn chce tomu zadźěwać, zo mnozy aplikaciju zaso wotstronja, dokelž přewjele energije přetrjebuje.
„Hdyž přichodne tydźenje něšto milionow ludźi wo app přeswědčimy, sym hižo spokojom“, Jens Spahn wuswětla. „Wirusej zadźěwać je mustwowa hra. Kóždy, kiž sej app na swój mobilny telefon sćehnje, při tym pomha.“ Spahn připowědźa w tym zwisku wobšěrnje zapołoženu wabjensku akciju zwjazkoweho knježerstwa.
Zwjazkowe knježerstwo chce z tak mjenowanej tracing-app rjećaz infekcijow koronawirusa lěpje sćěhować. Je-li něchtó pozitiwnje na koronu testowany a registrowany, system tamnych wužiwarjow app awtomatisce warnuje.
Dalši krok do normality
To a tamne (08.06.20)
Swójby sedmispancow wobkedźbować móža lubowarjo zwěrjatow nětko na internetnej stronje přirodoškitneho zwjazka Nabu. Jeho čłonojo běchu kamery do kukawow w nocy aktiwnych hrymzakow zatwarili. Po dołhim zymskim sparje su wone zaso chětro aktiwne. Dokelž su rezerwy tuka wotbyli, dyrbja najprjedy raz wjele žrać. Dorost wočakuja sedmispancy spočatk awgusta. Wot septembra hač do meje su wone w zymskim sparje.
Hakle z pomocu wohnjoweje wobory je so mužej w sewjerorynsko-westfalskim Bad Salzuflenje poradźiło, swój mandźelski pjeršćeń wotpołožić. Muž bě sej pjeršćenjak złamał, na čož porst zaćekny a cirkulaciju kreje haćeše. Wšitke pospyty, pjeršćeń wotbyć, pak zwrěšćichu. Tež złotnikar njemóžeše pomhać. Hakle wohnjowym wobornikam so poradźi, pjeršćeń wotfrezować a porst zdobom chłódźić. Akcija traješe 45 mjeńšin.
Trump wobskorženy
Washington (dpa/SN). Zakitowarjo čłowjeskich prawow w USA su knježerstwo prezidenta Donalda Trumpa kruteho postupowanja policije přećiwo demonstrantam před Běłym domom dla wobskoržili. Při přikazanej akciji běchu sylzopłun a gumijowe kulki přećiwo demonstrantam zasadźili, kotřiž měrnje přećiwo morjenju Afroameričana Georgea Floyda protestowachu, rěka w skóržbje organizacije ACLU. Za to měli knježerstwo chłostać.
Morjeneho wopominali
New York (dpa/SN). Na jimacej žarowanskej swjatočnosći w New Yorku su na policajskej akciji morjeneho Georgea Floyda wopominali. Jeho młódši bratr Terrence dźakowaše so ludźom „za wulke znamjo sobužarowanja. Dźakuju so Bohu, zo wopokazujeće mojemu bratrej napřećo telko lubosće.“ Na swjatočnosć w měšćanskim dźělu Brooklyn běchu wčera wjacore sta ludźi přišli. Na kóncu wšitcy zhromadnje wosom mjeńšin mjelčachu, runje tak dołho, kaž bě běły policist na šiji Afroameričana klečał a jeho tak morił.
Prezentuja wuslědki jednanjow
Koalicionarojo CDU/CSU a SPD njejsu so tele dny w swojich jednanjach ...
Reakcije na konjunkturny paket rozdźělne
Berlin (dpa/SN). Sakski hospodarski minister Martin Dulig (SPD) mjenuje konjunkturny paket, na kotryž bě so wulka koalicija srjedu wječor dojednała, „sylny signal solidarity a rozmacha“. Kraje, komuny, hospodarstwo a swójby změja z toho lěpšiny, wón rjekny. Komuny dóstanu podpěru, zo móhli straty koronakrizy dla wurunać. Swójby profituja z dźěćaceho bonusa 300 eurow. „Chcemy paket nětko wuhódnoćić a naše namjety za swobodny stat předpołožić.“ Tež zastupowacy ministerski prezident Sakskeje Wolfram Günther (Zeleni) ma wuhibki do praweho směra stajene, na přikład při zniženju popłatka za wobnowjomne energije a při spěchowanju klimje přichilenych technologijow, kaž wodźikoweje techniki.
Wuskutki wočaknyć
To a tamne (05.06.20)
Hnydom štyri ćelata na swět přinjesła je kruwa w Badensko-Württembergskej, štož je přewšo rědko. Mějićelce ratarskeho statoka bě swjatki sobotu njeměrna kruwa napadnyła. Krótko po tym wuhlada wona dwójnikaj w hródźi a je zastara. Na to kruwa hišće raz ćeleše a třeće a štwórte młodźo porodźi, bjez pomocy ratarki a skótneho lěkarja.
Sněženki z kamuškom na awta molujo je sydomlětna holca w Hohensteinje-Ernstthalu hobersku škodu zawostajiła. Pječa je wona lak 37 awtow rozdrapała, a to w běhu jeničkeho tydźenja. Při tym nasta škoda 30 000 eurow. Policija bě holčku po wobšěrnych přepytowanjach jako skućićelku zwěsćiła. Sydomlětna přizna, zo je sněženki molowała. Wona wšak twjerdźi, zo njebě jej wědome, kajku wulku škodu načini. Haj, hdyž žno žane sněženki z mróčelow njepadaja ...?!
„Dowěru a nadźiju budźić“
Sakske krajne knježerstwo dalše wolóženja w koronakrizy wobzamknyło
Drježdźany (dpa/SN). W Sakskej su dalše wobmjezowanja wšědneho žiwjenja koronakrizy dla zběhnjene. To je krajne knježerstwo na swojim wčerawšim posedźenju wobzamknyło. Tak je 6. junija zaso móžno wobydlerjow starownjow a hladarnjow wopytać, byrnjež z wěstotnymi naprawami. Kaž ministerski prezident Michael Kretschmer (CDU) na nowinarskej konferency zdźěli, su wotnětka zaso zarjadowanja, kwasy, narodniny a žarowanske swjatočnosće z hač do połsta wosobami móžne. To samsne płaći za jězby z busom. Tam trjebaja pućowacy dale škit za hubu a nós, prawidła za dodźerženje wotstawka njejsu wukazane. Hotele smědźa swoje wellnessowe oazy hosćom znowa spřistupnić. Hakle wčera běchu busowe předewzaća w Drježdźanach demonstrowali a na swoje komplikowane połoženje pokazali.
W Sakskej su minjene dny lědma hišće nowe pady infekcijow z koronawirusom registrowali. Nětko dźe wo to, „dowěru do přichoda a nadźiju budźić a swójsku zamołwitosć ludźi do srjedźišća stajić“, Michael Kretschmer potwjerdźi.
Mattis kritizuje Trumpa
Washington (dpa/SN). Bywši zakitowanski minister USA James Mattis je so demonstratiwnje na bok měrniwje protestowacych w kraju stupił, kritizujo prezidenta Donalda Trumpa jako pačerja. Trump je prěni prezident, kotrehož je wón hdy dožiwił, kiž so njeprócuje kraj zjednoćić, ale hižo tři lěta spyta jón pačić, rjekny 69lětny nowinarjam. Podawki minjenych dnjow pensionowaneho generala „rozhorjeja a zludaja“.
Mjeza dale zawrjena
Wien (dpa/SN). Awstriska wostaji swoju mjezu k Italskej koronapandemije dla najprjedy raz začinjenu. „Za wotewrjenje je hišće přezahe“, rjekny ministerka za turizm Elisabeth Köstinger nowinarjam. Mjezu k Italskej chcedźa wočinić, „ručež to ličby dowoleja“. Italska bě wčera swoju mjezu wšitkim wobydlerjam EU wotewrěła. Ministerski prezident Giuseppe Conte kritizowaše zadźerženje Awstriskeje jako „diskriminowacu naprawu“.
Ekstremistow spěšnje pušćić
