11. meje 1945 wojowachu sowjetske armeje 1., 2. a 4. ukrainskeje fronty w Čěskej a na Morawje hišće přećiwo wójsku němskeje wójnskeje skupiny „Srjedźa“ pod generalnym pólnym maršalom Ferdi­nandom Schörnerom. Němske jednotki spytachu so wojujo do zapadneje ­Čěskeje k ameriskej 3. armeji generala Geor­gea S. Pattona předobyć. Tale armeja bě spočatk meje z Bayerskeje a Sakskeje do zapadneje Čěskeje postupiła. Swoju ofensiwu přećiwo Němskej je 6. meje na li­niji Kamjenicy-Karlovy Vary-Plzeň-České Budějovice skónčiła.

Drježdźany (SN/CoR). Sakske kultusowe ministerstwo podpěruje swobodne hudźbne šule z hnydomnym wosebitym programom we wobjimje šěsć milionow eurow. Tak móža pobrachowace dochody hudźbnych šulow a honorarnych wučerjow koronapandemije dla narunać. Dale zarunaja hač do 60 procentow wupadnjenych honorarow swobodnych a priwatnych poskićerjow zwonkašulskeje hudźbneje wučby.

Sakska hudźbna rada financnu pomoc wita, wšako hódnoći tak dźěło mnohich hudźbnych pedagogowkow a pedagogow w swobodnym staće. „Smy so hromadźe ze statnym ministerstwom za wědomosć, kulturu a turizm a ze zapósłancami krajneho sejma minjene tydźenje wuspěšnje za tajki program zasadźeli a wjeselimy so, zo podpěra nětko zaběži“, podšmórny jednaćel Sakskeje hudźbneje rady Torsten Tannenberg.

Přiražku njetrjebaja swobodne hudźbne šule kaž tež swobodnje skutkowacy hudźbni pedagogojo wróćić. Z dohromady 32 wot Swobodneho stata Sakskeje spěchowanych hudźbnych šulow je jědnaće w swobodnym nošerstwje.

8. meje 1945 krótko do połnocy podpisachu w Berlinje-Karlshorsće historiski dokument bjezwuměniteje kapitulacije hitlerskeje Němskeje a jeho wobrónjenych mocow. Jako dobyćerjo podpisachu naměstnik najwyšeho rozkazowarja Čerwjeneje armeje a 1. běłoruskeje fronty, maršal Georgij K. Žukow, za Sowjetski zwjazk, hłowny powětrowy maršal Arthur W. Tedder za najwyšeho rozkazowarja aliěrowaneho wójska generala Dwighta D. Eisenhowera kaž tež general Carl Spaatz za USA a general Jean de Lattre de Tassigny za Francosku. Za Němsku signowachu wopismo społnomócnjeny němskeho wyšeho komanda, generalny pólny maršal ­Wilhelm Keitel, generalny admiral Hans-Georg von Friedeburg za marinu a generalny połkownik powětrowych mocow Hans-Jürgen Stumpff za kapitulowacych. Informował wo tym je wójsko a němski lud wot Hitlera zasadźeny prezident Němskeje, wulkoadmiral Karl Dönitz, hač do połnocy přez Němski rozhłós, a to ze swojeho sydła w Flensburgu.

Budyšin (SN/CoR). Budyske wokrjesne zarjadnistwo je wčera we wothłosowanju z Němsko-Serbskim ludowym dźiwa­dłom rozsudźiło, Budyske 25. lětnje dźiwadło koronapandemije dla wotprajić a zdobom hrajnu dobu skónčić. „To wotpowěduje wotprajenjam kulturnych zarjadowanjow po cyłym Swobodnym staće Sakskej“, rěka w zdźělence NSLDź. „Hač do dźensnišeho smy wšitke móžnosće přepruwowali, lětnje dźiwadło pod datymi wuměnjenjemi a po postajenjach přewjesć. Bohužel podarmo“, tam dale steji. Detektiwnu stawiznu wokoło „Sherlock Holmesa“ a dr. Watsona přestorča tuž na klětuše lětnje dźiwadło. Přiwšěm w dźiwadle za kulisami dale dźěłaja. Přihotuja jewišćowe wobrazy, kostimy, klanki a maski za přichodnu sezonu, dźiwadźelnicy probuja. „Najebać za nas ćežki rozsud hladamy optimistisce na nowu hrajnu dobu“, rjekny intendant NSLDź Lutz Hillmann, „jara so wjeselimy zaso za publikum hrać směć a městnosć zetkawanja a diskusije być a zo móžemy aktu­alne temy, emocije a podawki na jewišću wobjednawać.“ Hrajna doba 2020/ 2021 započnje so w septembrje.