Hižo dlěši čas je jasne, zo budu so serbscy a němscy dumperowi sportowcy 1. oktobra wot 14 hodź. w Hórkach na něhdyšim twjerdym kopanišću wubědźować. „Płonina w Lejnje, na kotrejž smy so prěnje lěta wubědźowali, njeje hižo k dispoziciji. Po někotrych wubědźowanjach w Baćonju pola Donatec chcemy so skónčnje zaso raz w zelenym wubědźować“, powěda Křesćan Kral z Lejnanskeho dumperoweho kluba.
Po kopańcy a konjacym sporće je to nětko třeća sportowa družina, kotruž lětsa w Hórkach pokazaja. Lejnjanske mustwo natwari nětko finalny, wosebje za spěšne dumpery wupołoženy parcours.
W cyłkownym hódnoćenju jednotliwcow nawjeduje amtěrowacy němski dumperowy mišter Filip Kral z Róžanta z wosom dypkami předskoka před Markusom Donatom z Lejna a Thomasom Neumannom ze Skaupa. Wobaj mataj 64 dypkow. Tež w mustwowym hódnoćenju ma Lejnjanski cyłk dobre šansy, so z mištrom sezony 2017 stać. Wón nawjeduje ze štyrjomi dypkami předskoka před Wubědźowanskim teamom Adelsdorf/Quersa.