Šulerjo so tež lětsa zaso genialnje socialnje angažowali

Chrósćicy/Radwor/Konjecy/Budyšin (SN/ BŠe). Pod hesłom „genialsocial – twoje dźěło přećiwo chudobje“ šulerjo jedyn dźeń za šulskej ławku njesydaja a nje wuknu, ale so w powołanskim swěće wuspytaja. Nadźěłane pjenjezy pak woni socialnym projektam přewostaja. Dźensniši akciski dźeń pak njeje šulerjam jenož móžnosć so za socialne projekty angažować, ale zdobom přiležnosć zawody a institucije zeznać. Tež w Chróšćanskim Domje swj. Ludmile kóžde lěto zajimcow na akciskim dnju witaja. Dźensa běštaj tam dwaj pomocnikaj na městnje. „Šulerjo dóstanu zaćišć wo našim dźěle. Runje hladajo na socialny wobłuk, hdźež maja mnozy strach ze starymi ludźimi dźěłać, so dwěle wottwarja“, zdźěli nawodnica Chróšćanskeho domu Monika Wenclowa. Wjele młodostnych wšak na přikład njewě, kak maja z demencu wobchadźeć. Šulerjo dóstanu na akciskim dnju kontakt ze staršej generaciju. „Někotři z nich rozsudźichu so, tež po tym domej swěrni wostać a nas při dźěle podpěrać“, nawodnica rozkładźe.