Socialne słužby staraja so wo podpěru dźěćom a młodostnym w šuli

Budyšin (SN/MiR). Nadawki, kotrež maja sobudźěłaćerjo socialnych zarjadnišćow zmištrować, staracy so wo přewod jednotliwcow na šuli, su wužadowace. Wšako su dźěći abo młodostni, kotrež tajku pomoc dóstawaja, na wosebje wulku přichilnosć pokazane. Dalši aspekt je, zo ma so mjez staršimi a přewodźerjemi wu­tworić dobra dowěra. Wosoba, kotraž so wo dźěći abo młodostnych z ćělnymi, duchownymi abo tež dušinymi ćežemi w šuli stara, dyrbi pak tež sebjewědomje wustupować.

W Dźěłaćerskim dobroćelstwje w Budyšinje (AWO) předleži tuchwilu za nowe šulske lěto jedna próstwa wo šulski přewod dźěsća. Nawodnica tamnišeho wotrjada za pomoc dźěćom a młodostnym Judith Kubasch rjekny: „Smy wjeseli, zo je so za tónle nadawk wosoba pola nas přizjewiła a wjedźemy aktualnje požadanske rozmołwy.“ AWO stara so tuchwilu skerje wo šulskich přewodnikow w Budyšinje samym a wokolinje. Móža pak tež staršim, kotřiž přewod za swoje dźěćo druhdźe we wokrjesu trjebaja, pomhać.