W srjedźišću wuslědkow Łužiskeho monitora 2023 steji dale energijowy přewrót. Jako přewodnik změny strukturow zwobraznja lětuše woprašowanje 1 022 wosobow w sakskich a braniborskich wokrjesach, zo wjetšina zaměry energijoweho přewróta dale zdźěla.

Kwětanecy/Drježdźany (SN/at). Přihłosowanje k zaměram energijoweho přewróta je z 49 procentami porno 2022 (44 proc.) zaso přiběrało. Z „ně“ je 36 proc. hłosowało (-1), „njewěm“ poda 15 proc. (-4). Dotal najwjetše přihłosowanje 57 proc. a zdobom najmjeńše wotpokazanje 26 proc. zwěsćachu 2021. Přiběrało je wosobinske přihłosowanje za wobnowjomne energije; za prěni raz podaty zeleny wodźik hnydom na 68 proc., biomasu na 74 proc. (+2), wětrowu energiju na 66 proc. (+6). Konstantnje podpěruje 87 proc. solarnu energiju a 76 proc. zemsku ćopłotu. Nimo zeleneho wodźika, kiž bě prěni raz podaty, wostanu „ně“-ličby podobne niwowej minjenych lět.