Jednaćel a lěkarski direktor nowe wusměrjenje domu předstajiłoj

Kamjenc (SN/StŠ). „Chorownja swjateho Jana w Kamjencu je za strowotniske zastaranje w regionje njeparujomna a tohodla chorownja wostanje!“ Z tutym jasnym wuprajenjom je so wčera popołdnju nowinarska konferenca zahajiła. Na nju bě nawodnistwo domu přeprosyło, takrjec jako reakciju na tydźenja we wokrjesnym sejmiku předstajenu analyzu, po kotrejž njeje jenož zawrjenje porodneje stacije a gynekologije znjesliwe, ale po kotrejž je cyły dom mjenje abo bóle nje­trjebawši. Tole nawodnistwo Kamjenskeje chorownje raznje wotpokazuje.

„Po strowotniskich kriterijach za chorownje w Sakskej smy jasnje jako chorownja za zakładne zastaranje ludnosće w nuzowym padźe w našej wokolinje zarjadowani. Tutomu nadawkej połnje wotpowědujemy – dźeń wote dnja, cyłe lěto. Tole so tež w ličbach wotbłyšćuje. Tak mějachmy poslednje lěto jeničce w našej nuzowej ambulancy na wšěch 11 000 pacientow zastarać. K tomu přińdu pacienća, kotrychž smy stacionarnje lěkowali“, wujasni lěkarski direktor chorownje dr. Krystof Bětnar.