Poslednja oktoberska njedźela steji w Ra­dworju cyle w znamjenju kolesa. Mjeztym 13. króć wuhotuje 29. oktobra tudyše Kupowe zjednoćenstwo zhromadnje z Budyskim kolesowarskim towarstwom crossowe wubědźowanje we wjesnym dźělu Młynske chěže. Přezpólne jězdźenje na wubědźowanskich kolesach z trochu šěršimi wobručemi je drje hižo chětro stara kołosportowa disciplina. Tola jako so wot srjedź 80tych lět nowomodny mountainbike po cyłym swěće přesadźi, so crossowe kolesowanje nimale lětdźesatkaj dołho chětro zanjecha. Hakle po mileniju dožiwi tale disciplina renesansu jako „zymski sport“. Tež Budyscy mountainbikerjo wokoło Bronjana Lutza Baumgärtela pytachu tehdy za nowym wubědźowanskim formatom, zo bychu zymski čas přeprěčili. W lěće 2005 namakachu z Radworskej gmejnu a tudyšim towarstwom partnera, kiž so za jich ideju zahori, a měješe zdobom tež kmanu čaru.