Bórkowy (SN/MG). Swjatki, to rěka za wuměłcow Serbskeho ludoweho ansambla (SLA), zo hraja w Błótach powěsćowe nocy. Lětsa bě tomu po sydom lětach k prěnjemu razej tak, zo njezwisowaše kruch hižo z lońšej produkciju, ale bě w běhu wječora zakónčena. „Jan a gluka – die sagenhafte Suche nach dem Glück“, rěkaše inscenacija, kotruž bě Matthias Körner za SLA napisał. Wosnje poda so titulna figura Jan, kotremuž je znaty Budyski dźiwadźelnik Olaf Hais wobličo dał, na puć, zo by swoje zbožo namakał. Při tym zetkawa wjacore powěsćowe postawy, wšojedne hač ze serbskeho, słowjanskeho abo grjekskeho mytologiskeho swěta. Wosebje „stara“, kotruž hraješe Petra Marija Bulankec-Wenclowa, a plon (Julia Peickert) wojujetej při tym wo přichilnosć a dušu Jana. Ansamblowcam poradźi so do někak 90 mjeńšinow trajaceho krucha mnohe aspekty zaplesć. Tole pak druhdy rozumliwosći a stringency krucha njepolěkowaše. Błudnički, wódny muž, připołdnica, hadźacy kral, ale tež kumštna inteligenca, namolowachu na jewišću kołwrótny wobraz sona.