Serbski rozhłosownik Matej Dźisławk tež lětsa zaso w Praze čěsce wuknje.

Wo tym je so Marcel Brauman z nim rozmołwjał.

Kak dołho so hižo na kursach čěšćiny w Praze wobdźěleš, kak to wotběži a štó su tamni kursisća?

Sym tu lětsa hižo třeći raz, po 2024 a 2025. Tu su štyri skupiny a sym mjeztym w štwórtej, najwyšej. Loni a předlońšim běch hišće w třećej skupinje. Kurs wotměwa so wot póndźele do pjatka wot 9 do 13 hodź. na uniwersiće. W skupinje su mjez druhim ludźo z Chiny, Ukrainy, USA, Israela, Němskeje, Pólskeje a Słowakskeje – zajimawa to zestawa.

Je to dalekubłanje za MDR abo wosobinski konik jako Serb w zmysle pěstowanja słowjanskeho susodstwa?

To njeje dalekubłanje. Sym wot dźěćatstwa husto w Čěskej, jězdźimy na Morawu, dokelž mamy tam znatych. Rěč, kultura a žiwjenje Čechow so mi lubja. A čěšćina so mi mjez wšěmi druhimi słowjanskimi rěčemi najbóle spodoba. Tohodla chcu so w njej dale a bóle wukmanjeć.

Kak so Ći žiwjenje w Praze lubi – by sej předstajić móhł, tam stajnje dźěłać, kaž je Danko Handrik to činił?