Hambüchen swoju karjeru ze złotom krónował
Rio de Janeiro. Po bronzy 2008 w Pekingu a slěbru štyri lěta pozdźišo w Londonje móže so němski top-ćěłozwučowar Fabian Hambüchen wot wčerawšeho skónčnje olympiski dobyćer mjenować. Na swojim poslednim wulkim finalu je Hambüchen, kiž ma přimjeno „turnowaca tcha“, najspektakularniše zwučowanje wšitkich artistow na prěkušu pokazał, a to bjez zmylka. Z dobyćom je Hambüchen swoju medaljowu zběrku wudospołnił a je z wukonom samo brazilskich fanow zahorił.
Zo njeje to runjewon lochko, temperamentny domoródny přiwisk za sebje zdobyć, nazhoni francoski skakar z tyčku a dobyćer slěborneje medalje Renaud Lavillenie. Sportowc přirunowaše zadźerženje publikuma na drastiske wašnje ze šćuwanjom přećiwo čornemu sportowcej Jesse Owensej na olympiadźe 1936. Tež w połfinalnej hrě němskeju beachvolleyballistkow Ludwig a Walkenhorst su jej přiwisnicy wuhwizdali. Z koncentrowanym wukonom pak porazy Hamburgska dwójka konkurentce z Brazilskeje po dwěmaj sadźbach w runje 38 mjeńšinach.
Wuslědki (17.08.16)
Regionalna koparska liga
Berlinski AK – Meuselwitz 1:0 (1:0)
Neugersdorf – Lok Lipsk 1:2 (1:1)
Fürstenwalde – Budissa Budyšin 0:0 (0:0)
Luckenwalde – Schönberg 1:1 (1:0)
Hertha BSC II – BFC Dynamo 1:0 (0:0)
Neustrelitz – Auerbach 0:1 (0:1)
Nordhausen – RB Lipsk II 5:0 (0:0)
Energija Choćebuz – FC Viktoria 1:1 (1:1)
Jena – Babelsberg 033:0 (0:0)
1. Jena 4 8 : 0 12
2. Lok Lipsk 4 8 : 3 10
3. Nordhausen 4 9 : 2 9
4. BFC Dynamo 4 10 : 3 7
5. RB Lipsk II 4 5 : 5 7
6. Hertha BSC II 3 4 : 3 6
7. Babelsberg 03 4 7 : 8 6
8. Auerbach 4 4 : 6 6
9. FC Viktoria 3 5 : 2 5
10. Berlinski AK 4 3 : 5 5
11. Fürstenwalde 4 3 : 6 5
12. Schönberg 3 5 : 4 4
13. Energija Choćebuz 3 2 : 2 3
14. Neugersdorf 4 7 : 8 3
15. Meuselwitz 4 0 : 3 2
16. Budissa Budyšin 4 2 : 5 1
17. Neustrelitz 4 1 : 8 1
18. Luckenwalde 4 1 : 11 1
Trenar němskich kanutow smjertnje znjezbožił
Rio de Janeiro. Zrudźaca powěsć je póndźelu wječor němsku olympisku delegaciju docpěła. Stefan Henze, asistentny trenar slalomowych kanutow, bě na sćěhi ćežkeho wobchadneho njezboža zemrěł. 35lětny Henze je při zražce minjeny pjatk – hromadźe ze sportowym wědomostnikom Christianom Kädingom, kiž so zrani – w taksiju sedźał.
Dalša hubjena powěsć trjechi wosebje wšitkich wojowarjow čisteho sporta. Mjezynarodne sportowe sudnistwo (CAS) je rozsudźiło, zo smě ruska dalokoskakarka Darja Klišina tola w swojej disciplinje startować. Klišina je jenička atletka, kotraž smě za Rusku w lochkoatletice wo olympisku medalju wojować, hačrunjež běchu dopingowe proby atletki manipulowane.
Dypkaj bohužel zapasli
Union Fürstenwalde
– Budissa Budyšin 0:0
Zestawa hosći: Wohlfeld – Kolan, Pfanne, Patka, Heppner, Hausdorf, Hoßmang, Šisler, Hänsch (82. Hermann), Němec (56. Barth), Salewski (67. Milde)
Po třoch poražkach k zazběhej noweje hrajneje doby podachu so koparjo Budissy Budyšin k postupnikej do Fürstenwaldy. Tón wšak měješe hižo štyri dypki na konće. W Auerbachu bě samo 3:1 dobył – alarmowacy signal to za Budissu. 508 přihladowarjow dožiwi bojownisku hru. W prěnim połčasu bě wona jara wurunana a na woběmaj stronomaj z mało móžnosćemi. Hosćićeljo móžachu derje sobu dźeržeć, njenamakachu pak žanu dźěru w škiće Budissy.
W druhim połčasu prezentowachu so hosćo jako hru dominowacy. Přećiwnik spyta jenož hišće z konterami k wuspěchej dóńć, štož pak so jemu njeporadźi. Barth móhł hru w 59., 69. a 89. min. za Budyšanow rozsudźić. Na tamnym boku dyrbjachu woni jenož jednu wulku šansu wotwobarać, a Wohlfeld běše z wuběrnej paradu na městnje (71.). Tež Šisler njeměješe wuspech z wólnym kopom krótko do kónca.
Hosćićel derby susodow dobył
Traktor Malešecy – HZ Wulka Dubrawa/Minakał 3:2 (2:1)
Zestawa domjacych: Seiler – Meier (44. Wunsch), Swakon, Hasse, Günther, Stewig, Zichel, Koksch, Unger, Brumme, Hoferichter (84. Ludwig)
Zestawa hosći: Schneider – Fechner, Penther, Schmidt (80. Kunkel), Steppat, Hoibik (59. Lange), Kirschke, Ritscher, Kießetz, Bens, Weiss (80. Syckor)
Wot julija ma Malešanske koparske mustwo noweho trenarja, a to znateho nazwučowarja Thomas Böhmu, kiž je tež hižo w Radworju a Dobruši skutkował. Stary trenar Klaus Vorwerk z Kumwałda je strowotnych přičin dla přestał.
Hač do kónca wojowali
LSV Hory
– Sokoł Ralbicy/Hórki 1:1 (1:0)
Zestawa hosći: Ch. Gloxyn – Lulak, Schultz, Domaška, M. Matka, S. Bjeńš (46. K. Matka), Wowčerk, Wałda (82. B. Bjeńš), Šewc, D. Gloxyn, Kurjat (57. Bejma)
Byrnjež to prěnja koparska hra sezony była, bě wona hnydom načolny duel. Lońši druhi wočakowaše třećeho, Sokoł Ralbicy/Hórki. Jeho trenar Thomas Schultz dyrbješe pak mustwo w škiće přestajić, dokelž njebě Bosćij Bjeńš stoprocentnje fit. Rozsudźi so tuž za njewšědnu wariantu: Zasadźi poprawneho nadběhowarja Domašku w nutřkownym škiće a prědku za njeho Kurjata.
Hraja nětko w krajnej klasy
SJ Chrósćicy
– ST Horni kraj Sprjewja 1:3 (0:1)
Zestawa domjacych: Králíček – Schulze, Cyž, Šafář, Gries, Žur (61. Šmit), Sentivan, Runt, Domaška, Henčl (77. Špitank), Věchet (29. Dehn)
Jako nowačk w krajnej klasy, stafla wuchod startowachu koparjo SJ Chrósćicy wčera do noweje hrajneje doby. Přećiwnik ST Horni kraj Sprjewja njeje mjez fanami serbskeje kopańcy njeznaty, wšako wobsteji mustwo w hrubym z hrajerjow něhdyšeho towarstwa Budestecy/Korzym. Před tydźenjomaj nastupi wone tež w Ralbicach, hdźež je pokalnu hru přećiwo Sokołej jasnje dobyło.
Wčerawša hra bě najprjedy raz wurunana. Wobě mustwje spytaštej přez konstantnu defensiwu swoje nadběhi natwarjeć, a to wotměwaše so přewažnje w srjedźnym polu. W 29. min. signalizowaše Věchet, zo dyrbi so wuměnić dać. Wón běše so hižo w treningu zranił. Krótko po wuměnjenju kasěrowachu domjacy přez šmjatańcu w swójskim škiće prěnje wrota. Wot toho wokomika měješe přećiwnik wotežki skerje w rukomaj, hačrunjež Chróšćenjo dale wojowachu.
W hašenju so wubědźowali
Turněr na nowym sportnišću
Snadna poražka pola faworita
SV Frankenthal
– ST Marijina hwězda 3:2 (1:1)
Zestawa hosći: O. Schmidt – Wróbl, Škoda, Łušćanski, R. Hawš, Njek, T. Jurš, O. Hawš, P. Schmidt (63. Lipič), Pakoßnick, D. Jurš
Prěnju dypkowu hru w nowej sezonje mějachu koparjo ST Marijineje hwězdy hnydom pola jednoho z faworitow w Frankenthalu. Přećiwnik bě w minjenej hrajnej dobje postup do wokrjesneje wyšeje ligi snadnje misnył.
Hosćo započachu sylnje a dachu bul najprjedy raz wěsće w swojskich rjadach běžeć. Wosebje přez prawy bok a agilneho Wróbla spytachu k wuspěchej dóńć, štož so w 12. min. tež poradźi. Wróbl bě dweju přećiwnikow wottřasł a Dawida Jurša posłužił. Wotrowčan přihra bul na to Pakoßnickej, kiž suwerenje přetwori. Hra wosta wurunana, při čimž mějachu Pančičenjo snano małe lěpšiny. Po poł hodźinje hosćićeljo wurunachu. Hosćo pak njeběchu šokowani a chcychu hišće do přestawki zaso nawjedować. Najprjedy zwrěšći Hawš z třělwu na žerdź, po tym startowaše Jurš solo. Město toho pak, zo by bul wothrał, so wón wopak rozsudźi.
