69. serbski ewangelski cyrkwinski dźeń w Bukečanskej wosadźe
Bukecy (MěCu/SN). Serbski ewangelski cyrkwinski dźeń wotmě so lětsa w Bukečanskej wosadźe. Hižo sobotu popołdnju zetka so wokoło sto wobdźělnikow na Pawlikec statoku we Wuježku, hdźež superintendent Jan Malink zarjadowanja z nutrnosću zahaji. Do toho běchu so někotre swójby na pućowanje po lěsnych šćežkach do Dažinka podali. Po słódnej swačinje pola Krygarjec swójby, kotraž bě we Wuježku wšitko perfektnje organizowała, mějachu dźěći a dorosćeni swoje wjeselo nad serbskej hru klankodźiwadła NSLDź „Mały wódny muž“. Dalši wjeršk bě wječorny program chóra Budyšin, kotryž zawjeseli ze swojimi spěwami domoródnych Bukečanskeje wosady kaž tež hosći z dalšich serbskich ewangelskich a katolskich wosadow.
