Budyšin (JK/SN). Hłowna zhromadźizna Domowiny so bliži, tuž nabywaja přihoty za nju ćim wjetšu wažnosć. Tak bě hłowny wobsah posedźenja Zwjazkoweho předsydstwa Domowiny minjeny pjatk w Budyšinje, wudospołnić a skulojćić namjety za wobzamknjenja kaž tež skonkretizować směrnicy dźěławosće Domowiny za lěta 2019 do 2021. Wosebitu wažnosć kładu na to, skrućić a rozšěrić serbskorěčne rumy kaž tež kubłanskemu wobłukej pomoc skićić. Tuchwilny staw a wuslědki ewaluacijow a hódnoćenje wuslědkow naprawow, wuknyć a skrućić serbsku rěč w Delnjej kaž tež Hornjej Łužicy, po měnjenju gremija njespokojeja.