Wuznamjenjenja Domowiny na swjatočnosći w Budyšinje spožčili

Budyšin (SN/at). „My smy jedyn, dwaj, tři, Malešanske lutki“, spěwachu dźěći předšulskeje skupiny Malešanskeje Witaj-pěstowarnje „K wódnemu mužej“ takrjec jako dźak za wuznamjenjenje z Mytom Domowiny za dorost 2019. Předsyda Dawid Statnik je předwčerawšim kóždemu dźěsću wosebite čestne wopismo přepodał, a to na mytowanskim zarjadowanju Zwjazkoweho předsydstwa Domowiny w Budyskim Serbskim domje. Jim a runje tak přitomnym staršim so Statnik dźakowaše, „zo wy bohatstwo dwurěčnosće dźěćom dale dawaće“.

Kaž ći mali wopokaza so tež hudźbnik Józef Brězan jako hódny lawreat Myta Domowiny za dorost. K tomu Franciska Albertowa w lawdaciji zwěsći, zo wuznamjenjeny „dopokazuje, zo je serbska rěč žiwa a zo móžeš ludźi tež z hudźbu za nju zahorjeć“: Ze swójskej interpretaciju znateje­ pěsnje „Pod Kulowom we holi“ to Józef Brězan potwjerdźi.