Předsyda Domowiny chce naležnosć „cyle horjeka přiwjazać“

Budyšin (SN/at/CoR). Prezidij Zwjazkoweho předsydstwa Domowiny je so z politiskim „no go“ zaběrało: Serbscy hudźbni awtorojo njemóža swoje nowe twórby w online-masce Towaršnosće za prawa hudźbnych předstajenjow a mechaniskeho rozmnoženja (GEMA) hižo w maćeršćinje zapodać (SN rozprawjachu). W tydźenjach do jutřišeje prapremjery oratorija „Hrodźišćo“ bě komponist Měrćin Weclich njespokojacy staw zwěsćił a předsydu Domowiny Dawida Statnika w naležnosći wo podpěru prosył.