Lětuša fachowa ekskursija serbskich turistikarjow do Błótow wjedła
Bórkowy (JoS/SN). Kóždolětna fachowa ekskursija je wjeršk w skutkowanju towarstwa Serbski kulturny turizm. Wosrjedź koronapandemije běchu błótowske Bórkowy wčera lětuši cil. Mjez 34 wobdźělnikami wuprawy běchu tež pomocnicy a přewodźerjo turistiskich zarjadowanjow w běhu lěta.
Nawodnica turizma w Bórkowskim hamće Nicole Schlenger pokaza na přiwšěm dobru prózdninsku sezonu w lěću, byrnjež lońši wuslědk 570 000 přenocowanjow tónraz njedocpěli. Dowolnicy zajimowachu so wosebje za čołmikowanske a kolesowanske pućowanske tury. W Bórkowach chcedźa hosći přichodnje tež w zymje bóle přiwabić. Hižo klětu ma pódla błótowskeje termy tež seliznowa kupjel tamniše turistiske poskitki wudospołnjeć. Mnohe nastorki su wobdźělnicy wuprawy z turistiskeje informacije, z domizniskeje stwy, z wušiwarnje narodneje drasty Christy Dziumbla kaž tež z kofejownje „Stawizniska stwička“ Ingolfa Steffena sobu wzali.
