Župa staršisku iniciatiwu přiwzała

štwórtk, 18. měrca 2021
artikl hódnoćić
(0 )

Budyšin (SN). Staršiska iniciatiwa Ra­dwor z. t. přisłuša nětko Domowinskej župje „Jan Arnošt Smoler“ Budyšin. Župne předsydstwo je cyłk jako nowe sobustawske towarstwo přiwzało. Wo tym informowaše tudyša regionalna rěčnica třěšneho zwjazka Katja Liznarjec wčera po wuradźowanju gremija w formje telefoniskeje konferency: „Wjeselimy so, zo mamy angažowanych a kompetentnych zwjazkarjow za skrućenje a rozšěrjenje serbskich rěčnych rumow na zakładnej a wyšej šuli.“ Radworske towarstwo organizuje tuchwilu tež kóždy tydźeń serbskorěčne poskitki za swójby na internetnej stronje www.schadźowanka.de. Doskónčny rozsud wo přiwzaću maja wobdźělnicy župneje hłowneje zhro­madźizny kónc lěta tworić.

Dale dorozumi so gremij wčera wo delegatach za hłownu zhromadźiznu Domowiny 12. junija, hdźež budźe župa z pjeć wosobami zastupjena. Dawida Statnika podpěruja za wospjetnu kandidaturu jako předsyda Domowiny.

wozjewjene w: Towarstwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND