Korona wróćenje hoberskeje sumy njepřetrjebanych srědkow zawiniła
Budyšin (SN/JaW). Cyłkownje nimale 800 000 eurow njepřetrjebanych spěchowanskich srědkow za lěto 2020 su serbske institucije Załožbje za serbski lud wróćili. To wujewja wotličenje hospodarskeho plana załožby minjeneho lěta. Plan su čłonojo rady Załožby za serbski lud na swojim minjenym wuradźowanju 20. meje na wědomje wzali, wotličenje jako prawe schwalili a jednotliwe dohladowanske gremije wotćežili. To wobkrući direktor Załožby za serbski lud Jan Budar po posedźenju gremija na digitalnej medijowej konferency.
Suma je chětro wulka, dokelž je předewšěm Serbski ludowy ansambl tójšto njepřetrjebanych srědkow za personalne kóšty wróćić dyrbjał. Přičina toho bě po Budarju fakt, zo bě najwjac přistajenych ansambla loni w krótkodźěle. „Cyłkownje sydom měsacow běchu přistajeni w lěće 2020 w krótkodźěle, to wšak šwarna suma nastawa“, wón rjekny.