Serbske pasionske zjednoćenstwo wirtuelnje za přichodny wjeršk probuje

Budyšin/Chrósćicy (SN/bn). Serbske pasionske zjednoćenstwo pod nawodom Towarstwa Cyrila a Metoda (TCM) chcyše inscenaciju „Mór a lubosć“ poprawom hižo loni składnostnje 600. jubileja bratstwa swjateho Bosćana na farskej łuce w Chrósćicach prapremjernje pokazać. Tež lětsa předstajenje znatych přičin dla móžne njebě. Nětko měrja so na nowy termin klětu nazymu. Dwójce kónc tydźenja chcedźa hru dohromady pjeć króć pokazać. Prapremjera ma 10. septembra 2022 być.