Dešno (SN/at). Składnostnje jeho wčerawšich 150. posmjertnych narodnin su w Dešnje Bogumiła Šwjelu wopominali. Tamniša Domowinska skupina, wosada, Spěchowanske towarstwo domizniskeho muzeja a skupina Serbska namša běchu na počesćenje sławneho Delnjoserba při jeho pomniku a w cyrkwi přeprosyli. Na to su na farskej zahrodźe „narodniny swjećili“, kaž je to na historiskim foće wo Šwjelowych 60ćinach 5. septembra 1933 dokumentowane. Wone foto a mnohe dalše stej wysokolětna wnučka prócowarja wo delnjoserbsku rěč Irmela Scholz a jeje dźowka Iris Content sobu přinjesłoj. Wonej běštej ze swojeje nižozemskeje domizny přichwatałoj.