Składnostnje róčnicy nowych Wojerec je so Marcel Brauman ze županku Gabrielu Linakowej wo prjedawšej a dźensnišej situaciji Serbow rozmołwjał.

70 lět Čorna Pumpa woznamjenja tež 70 lět wutwar Wojerec na město hórnikow. Ličba wobydlerjow je wot 7 000 na 70 000 rozrostła, serbšćina pak běše tu na kóncu hižo lědma słyšeć: Běše Čorna Pumpa potajkim „tótka Serbstwa“ regiona?

G. Linakowa: Přićah dźesaćitysacow němskich wobydlerjow a wotbagrowanje wjeskow stej hłuboko do eksistency našeho ludu zasahnyłoj. Politika bě region na „wobwod energije“ přetworiła, tež ­burja su sej dźěłowe městno w brunicy pytali a serbscy starši su přestali, ze swojimi dźěćimi serbować.

Dźensa matej stare a nowe město mjenje hač 27 000 wobydlerjow, w zagmejnowanych wsach so jim něšto tysac přidruži – kotry přichod widźiće za tute město?