Berlin (dpa/SN). Při demonstracijach přećiwo wobmjezowanjam zjawneho žiwjenja koronapandemije dla je policija wčera po swójskich informacijach w Berlinje hač do wječora 365 ludźi nachwilnje zajała. W dwěmaj padomaj ma sudnik pruwować, hač přepytowansku jatbu wukaza. Při namócnosćach mjez demonstrantami a policiju so dźesać zastojnikow zrani. Něhdźe 7 000 kritikarjow naprawow koronapandemije dla bě mjez twarjenjom Reichstaga a Braniborskimi wrotami po puću. Dokelž njewužiwachu nahubnik a njedźeržachu dosć mjezsobneho wotstawka, je policija demonstraciju rozpušćiła. Do toho bě zwjazkowy sejm knježerstwu wobkrućił, zo wobsteji dale „epidemiske połoženje narodneho rozměra“. Tajkeje přičiny dla ma knježerstwo prawo, dalše naprawy přećiwo rozpřestrěću koronawirusa wukazać.

Brüssel (dpa/SN). Po blokadźe europskeho etatoweho paketa přez Madźarsku a Pólsku chcedźa statni a knježerstwowi šefojo Europskeje unije dźensa za wupućom z krizy pytać. Zwjazkowa kanclerka Angela Merkel (CDU) a jeje kolegojo EU planuja wječor widejowy wjeršk. Spěšne rozrisanje problema wšak njeje wotwidźeć. Poprawom chcychu wo naprawach přećiwo koronawirusej wuradźować.

Pólska a Madźarska běštej póndźelu 1,8 bilionow eurow wopřijacy etatowy paket EU ze swojim wetom blokowałoj, dokelž w nim zakótwjenu klawslu wotpokazujetej. Wona Brüsselej dowola pjenježne přiražki skrótšić, hdyž njeje prawostatnosć zaručena. EU so hižo dlěje z Pólskej a Madźarskej wadźi, mjez druhim Waršawskeje justicneje reformy a madźarskeho postupowanja přećiwo kritiskim medijam a opoziciji dla. Pólska a Madźarska pak wumjetujetej Europskej uniji swojowólne postupowanje přećiwo jej njelubym krajam. Pólski ministerski prezident Mateusz Morawiecki mjenuje klawslu „propagandowy retl“.

Wobstatk parlamenta je peticiski wuběrk. Wuchadźejo z naroka Serbskeho sejma, być serbski parlament, zdawa so jeho wobzamknjenje z minjeneje soboty logiske być. Z peticiskim wuběrkom chcedźa jeho čłonojo mjezyserbski dialog přisporjeć. To je dobry wotpohlad a zdobom pospyt, po tymle puću snano bóle do kedźbnosće zjawnosće stupić. Hdyž je zaměr, w sejmje rozestajenje z wažnymi serbskimi temami a aktualnymi wužadanjemi spěchować, klinči to tak, kaž njebychu to gremij a jeho wuběrki dotal w dosć trěbnej měrje činili. A snadź měli přichodne dźěło peticiskeho wuběrka tež do zwiska z dalšim wudospołnjenjom dźěłoweho wašnja sejma stajić, na čož běchu so na sobotnym posedźenju dojednali: Zo chcedźa wot klětušeho do posedźenja hosćićelsku komunu wobchodźić a rozmołwy z tamnišimi wobydlerjemi zmóžnić. Z druhimi słowami prašane: Maja starosće ludźi w dwurěčnej Łužicy za dale wuwiwacy so Serbski sejm wjetšu rólu hrać? Axel Arlt

Aktualnym wobstejnosćam dołžene wotmě so nowemberske posedźenje Serbskeho sejma jako kombinacija prezencneho zarjadowanja a widejokonferency. W twarjenju Sakskeje krajneje centrale za politiske kubłanje w Drježdźanach běštej minjenu sobotu nawod a přełožowanje, wobdźělnicy běchu ­online mjez sobu zwjazani.

Drježdźany (SN/at). Hłowny wuslědk bě, zo je Serbski sejm peticiski wuběrk wu­tworił, kaž nowinska rěčnica Jadwiga Pjacec informuje. Wuběrk za prawo a wustawu bě namjetował móžnosć rozjimać, temy, prašenja, pokiwy a kritiki w formje peticijow sejmej zapodać móc. Zaměr tajkeho noweho gremija je, styki wšěch Serbow w Hornjej, srjedźnej a Delnjej Łužicy ze Serbskim sejmom skrućić a w nim rozestajenje z wažnymi serbskimi temami a aktualnymi wužadanjemi spěchować. Nimo toho maja wotpohladane, zaběru z politiskimi serbskimi temami tež zwonka sejma nastorčić. Kaž nowinska rěčnica dale pisa, su wobdźělnicy posedźenja namjet jednohłósnje schwalili, na čož bu peticisku wuběrk wutworjeny.