Saarbrücken (dpa/SN). Z namołwami za wjetšu socialnu sprawnosć a wěryhódnosć su kandidaća za nawodnistwo SPD wčera na prěnjej regionalnej konferency w Saarbrückenje wa­bili. Wo překwapjenku postarałoj staj so Budyski měšćanosta Alexander Ahrens a jeho Flensburgska kolegina Simone Lange, kotrajž staj po­žadanje cołnyłoj. Město toho staj připowědźiłoj, bywšeho financneho ministra Sewjerorynskeje-Westfalskeje Norberta Waltera-Borjansa a zapósłanču zwjazkoweho sejma Saskiju Esken podpěrać.

Hač do 12. oktobra chce so potajkim 15 kandidatow – sydom dwójkow a jednotliwc – na dalšich 22 regionalnych konferencach wo hłosy sobustawow prócować. Wčerawše zarjadowanje pokaza, zo su předstawy kandidatow zdźěla chětro rozdźělne. Prašenje předewšěm je, hač ma koalicija z CDU dale wobstać.

London (dpa/SN). Britiske knježerstwo so zakonjej, kotryž brexit jenož na za­kładźe zakonja rjaduje, hižo njespjećuje. Knježerstwo a opozicija stej so w nocy na to dojednałoj, zo naćisk wjace njezadźeržitej. Premierminister Boris Johnson, kiž chcyše, zo Wulka Britaniska tež bjez podpisaneho zrěčenja hač do 31. oktobra z Europskeje unije wustupi, je tuž zwrěšćił. Zakoń předwidźi, zo ma Johnson próstwu wo přesunjenje stajić, njeje-li brexit hač do 19. oktobra ratifikowany. Hišće jutře wječor­ chcyli zakoń w Hornjej komorje wobzamknyć, kotremuž je premiermi­nister wčera hišće z narěču za­dźěwać spytał.

Čehodla je so britiske knježerstwo nětko tola za brexit z podpisanym zrěčenjom rozsudźiło, njeje jasne. Knježerstwo pak wotwisuje wot opozicije, dokelž nima w parlamenće wjetšinu.

Drježdźany/Lipsk (dpa/SN). Sakski krajny burski zwjazk je hladajo na móžnu tak mjenowanu kenijasku koaliciju warnował, Zelenym přewjele wliwa hladajo na ratarske temy dać. Na žadyn pad njeměła CDU ratarske ministerstwo Zelenym přewostajić, rjekny prezident zwjazka Wolfgang Vogel wčera nowinomaj Leipziger Volkszeitung a Dresdner Neueste Nach­richten. „To by katastrofa była – za naše zawody runje tak kaž za cyłu ludnosć.“ Předewšěm poćahowaše so Wolfgang Vo­gel na zasadźenje rostlinoškitnych srědkow a na wot Zelenych žadany wu­twar ekologiskeho ratarstwa. „Je-li čłowjek chory, wupisa jemu lěkar tež wotpowědnu medicinu“, wón nowinam wuswětli. Sakski ministerski prezident Michael Kretschmer (CDU) widźi dobre šansy za swobodny stat w koaliciji CDU, SPD a Zelenych. Wólbny wuslědk zmóžnja stabilne knježerstwo, rjekny wón předwčerawšim w Drježdźanach. Zeleni su přeprošenje Kretschmera na rozmołwy přiwzali a chcedźa wo dalšim postupowanju sobu rozsudźić.

Na internetnej stronje zapósłancow dokładnje wobkedźbować

Drježdźany (SN/BŠe). Transparenca zmóžnja dowěru, su sej iniciatorojo njewotwisneje platformy z mjenom Abge­ordnetenwatch wěsći. Tale internetna strona měješe lěta 2004 w Hamburgu swoje spočatki a je mjeztym za wšitke krajne sejmy kaž tež za zwjazkowy sejm Němskeje a za Europski parlament přistupna.

Tři dny po wólbach Sakskeho krajneho sejma je platforma nětko z wuzwolenymi zapósłancami sejma přistupna. Tam móža wobydlerjo wšěm 119 sobustawam noweho parlamenta direktny zwisk nawjazać. Prašenja a wotmołwy wostawaja zjawnje přistupne, tak zo móža sej je zajimcy kóždy čas wobhladać. Zdobom su tam dalše informacije kaž tež wosobinske daty zapósłancow dokumentowane. Dale je na platformje zjimane, kak su zapósłancy po mjenje wothłosowali. Runje tak podate su mjena čłonow w jednotliwych wuběrkach. Tak mjenowanych škleńčanych politikarjow móža ludźo tuž dokładnje wobkedźbować.