To a tamne (17.10.24)
Prěnju konop žnjeć móža w Braniborskej prawdźepodobnje w nalěću 2025. Z toho wuchadźa strowotniske ministerstwo kraja. Tam pruwuja tuchwilu 15 próstwow wo załoženje konopjoweho kluba. Cluby lubja swojim čłonam, kotřiž maja čłonski přinošk płaćić, přijomniše płaćizny hač na ilegalnych wikach a wosebje čisty material bjez škódnych maćiznow. Za gram konopje chcedźa sej šěsć do wosom eurow žadać, kaž rěkaše.
Pedalej płuna a borzdźidła zaměnił je 86lětny muž na parkowanišću kupnicy w Treuenje we vogtlandskim wokrjesu. Z wotmachom zrazy wón do twarjenja superwikow. Poprawom chcyše wón swój wóz zaparkować. Sobujěducu 85lětnu dyrbjachu zranjenu do chorownje dowjezć. Šofer so snadnje zrani. Škodu na fasadźe twarjenja wobliča na 8 000 eurow. Awto je dospołnje skóncowane.
Via Sorabica HoyWoj – 1924
Ke kedźbyhódnym podawkam we Wojerecach před 100 lětami
Prjedy hač so lěto 2024 z wotmachom ke kóncej chila, bych rady čestne čitarstwo Serbskich Nowin (dale: SN) z wažnymi serbskimi podawkami we Wojerecach z lěta 1924 zeznajomnił.
Zelenskyj přijědźe wosobinsce
Brüssel (dpa/SN). Ukrainski prezident Wolodymyr Zelenskyj chce wosobinsce na wjerškowe zetkanje Europskeje unije do Brüssela přijěć. Prezident Rady EU Charles Michel rjekny, zo je Zelenskeho na jutřiši wjeršk přeprosył. Při tym chcedźa aktualne połoženje we wójnje Ruskeje přećiwo Ukrainje wobjednawać. Zelenskyj je wospjet mjezynarodne wjerški wopytał. W Brüsselu chce wón zwjazkarjow znowa wo wojersku pomoc prosyć.
Produkcija granatow přiběra
Brüssel (dpa/SN). Prócowanja Nato wo wutwar produkciskich móžnosćow za municiju artilerije so poněčim zadanja. Po informacijach hłowneho kwartěra zakitowanskeho zwjazka su na dobrym puću, hišće lětsa dwaj milionaj granatow kalibra 155 milimetrow produkować. To je wo wjele wjace hač hišće před lětami. Sobudźěłaćer Nato zdobom přizna, zo produkuja přeco hišće přemało municije a zo je wona hišće předroha.
Lufthansa so wobara
Prěnja skupina 16 migrantow je dźensa přistaw Shengijn w Albanskej ...
USA žadaja sej wot Israela chutne naprawy
Washington (dpa/SN). Hladajo na katastrofalne humanitarne połoženje w Gazaskim pasmje zwyša knježerstwo USA ćišć na swojeho zwjazkarja Israel: Njedyrbjała-li so situacija za ludźi w dospołnje zawrjenym pobrjóžnym pasmje w běhu 30 dnjow widźomnje polěpšić, hrozy ranjenje zakonja USA nastupajo wojersku pomoc. Tak rěkaše we Washingtonje. Tole móhło wojersku podpěru USA na dobro Israela chutnje wohrozyć. Najnowše wobrazy po nadpadźe israelskeho wójska na chorownju w Gazaskim pasmje su „grawoćiwe“, praji rěčnik Narodneje wěstotneje rady w Běłym domje John Kirby.
Wonkowne ministerstwo USA je w tym zwisku tež rozprawy medijow wo lisće wobkrućiło, kotryž staj wonkowny minister Antony Blinken a zakitowanski minister Lloyd Austin spisałoj. W nim zwuraznitaj wonaj swoje „hłuboke starosće“ wo humanitarnym połoženju a žadataj sej „chutne a trajace naprawy“ ze stron israelskeho knježerstwa.
Ruska Ukrainu dale nadběhuje
Kijew (dpa/SN). Na wuchodźe Ukrainy ruske wojerske jednotki swoje nadběhi na wjes Kurachiwka dale zesylnja. Ukrainski generalny stab w Kijewje zdźěla, zo su Rusojo jeničce wčera 40 króć wjes nadběhowali. Ukrainscy wojacy su wšitke pospyty wotwobarali. Samsny čas ukrainscy wojerscy blogarjo w interneće rozprawjeja, zo su ruske jednotki wjes Ostriwske južnje Kurachiwki zdobyli a zo hrozy ukrainskim jednotkam nětko wobkruženje. Oficialne wobkrućenje tuteje informacije njepředleži. Wčera je Ruska pječa zaso masiwnje truty zasadźiła. Wulki dźěl móžeše Ukraina wottřělić.
Po tydźenje trajacych diskusijach chcyše ukrainski prezident Wolodymyr Zelenskyj dźensa swój tak mjenowany plan dobyća w Kijewje zjawnje předstajić. Naposledk bě Zelenskyj swój plan na wopytach pola partnerow we Washingtonje, Londonje, Parisu, Romje a Berlinje prezentował. Jutře chcedźa jón tež w Brüsselu předpołožić.
Organizowane žlokanje skónča
Marek Krawc rozprawja wo aktualnje rozjimanych temach w Čěskej
Praha. Póndźelu rano přepytowachu zastojnicy Policajskeje centrale za zakročenje přećiwo organizowanej kriminality (NCOZ) twarjenja a běrowy Praskich wobchadnych zawodow. Pozdźišo zdźěli najwyše statne rěčnistwo, zo přepruwuje policija 13 wosobow wobtykowanja a wobšudźerstwa dla. Nowinarjo informowachu, zo zwěsćuja zastojnicy wobstejnosće w zwisku ze skazanku wěstotneho systema za Praske metro. System běchu drje hižo před 15 lětami skazali, policija pak so za wobstejnosće zajimuje. Generalny direktor Petr Witowski, personalny šef Jiří Špička kaž tež čłon předsydstwa Marek Kopřiva dyrbjachu z policistami posedźenje předsydstwa Praskich wobchadnych zawodow dočasnje wopušćić. Wobchadny měšćanosta Zdeněk Hřib žada sej nětko, zo by Petr Witkowski swoju funkciju złožił. Njebudźe-li zwólniwy wupowědźić, chce jeho Hřib wotsadźić.
Sprawnje rěčeć!
Nowu kupnicu klětu wotewru
Sakske hospodarstwo so njewuwiwa
Drježdźany (dpa/SN). Sakske hospodarstwo so po měnjenju industrijneje a wikowanskeje komory dale njewuwiwa. Komora złožuje so při tym na wuslědki aktualneho konjunkturneho naprašowanja, na kotrymž bě so w septembru 1 630 předewzaćow z něhdźe 87 200 přistajenymi wobdźěliło. Po tym je so wobchodniske połoženje dale trajaceho słabeho zajima a wysokich kóštow dla lědma změniło. Lětsa wočakuja samo snadnje woteběracy hospodarski wukon.
„Wobchodniske połoženje industrije je so porno lońšemu lětu hišće raz pohubjeńšiło. Kmanosć wubědźowanja ćerpi přiběracych kóštow energije a stajnje sylnišo bywaceje konkurency, wosebje z Chiny, dla“, w rozprawje rěka. Dobra połojca předewzaćow rěči wo woteběracych wobrotach. Tež mnóstwo nadawkow dale spaduje. Nutřkokrajne naprašowanje je mjeztym 72 procentam wšěch zawodow najwjetši riziko. Třećina naprašowanych zawodow liči z pohubjeńšenjom wobchodniskeho połoženja, komora zdźěla.
