Treuenbrietzen (dpa/SN). Wohnjowi wobornicy dyrbjachu tež dźensa južnje Berlina lěsne wohenje hašeć. „Smy hišće raz dalše mocy skazali“, zdźěli rěčnica wo­krjesa Podstupim-Srjedźna marka minjenu nóc nowinarjam. Wona z toho wuchadźa, zo hoberski lěsny woheń wobornikow hišće cyły tydźeń zaběra. „Bohužel njeje dešć wotwidźomny.“ Po jeje informacijach płomjenja stajnje zaso nastawaja. Woheń bě minjeny štwórtk wudyrił. Kónc tydźenja je něhdźe 450 wohnjowych wobornikow na płoninje 350 hektarow přećiwo wohenjam wojowało. „Nimamy wjace wulke wotewrjene płomjenja, ale skerje mjeńše žehliwe hnězda“, rjekny braniborski ministerski pre­zident Dietmar Woidke (SPD). Mjeztym su tanki Zwjazkoweje wobory šěroke wusy­ki w lěsu wustorkali, zo njemóhli so płomjenja dale rozpřestrěć.

Dublin (dpa/SN). Bamž Franciskus je na swo­jim wopyće w Irskej tysackrótne splažne a hinaše znjewužiwanja dźěći a žonow přez katolskich duchownych raznje zasudźił. „Prosymy wo wodaće za hro­zne zachadźenje w Irskej, znje­wu­žiwanje mocy a dowěry, splažne znje­wužiwanje přez oficialnych čłonow cyr­kwje“, rjekny Franciskus wčera na zakónčacej Božej mši swojeho dwudnjowskeho wopyta w Dublinje. Tež za wuklukowanje njepołnolětnych jako dźěłowe mocy w dźěłarnjach kaž tohorunja za pobrachowace sobučuće woporam napřećo pro­šeše bamž wo wodaće. Wón mjenowaše njeskutki „wotewrjenu ranu“, kotraž cyrkej wužaduje „kruće a rozsudźena za wěrnosću a sprawnosću pytać“.

Irska słuša k tym krajam, hdźež běchu duchowni a rjadniske sotry žony a dźěći masiwnje znjewužiwali a hroznje z nimi wobchadźeli. Kritikarjo swjatemu wótcej wumjetuja, zo jeho słowam skutki njeslěduja, na přikład personalne konsekwency. Franciskus je so sobotu z wosom woporami znjewužiwanja zetkał.

Wo načolnej kandidaturje za krajny sejm rozsudźa baza sakskeje Lěwicy

Wojerecy (SN/at). Načolnu kandidaturu sakskeje Lěwicy k wólbam Sakskeho krajneho sejma 1. septembra 2019 postaja stronjenjo we wobłuku sobustawskeho rozsuda. Hromadźe z tym wotměwaja sobustawske naprašowanje nastupajo wobsahowe ćežišća za wólbny program. To su delegaća stronskeho zjězda Lěwicy Sakskeje sobotu we Wojerecach wobzamknyli. Tak je strona jenička, „kotraž sej zwěri čłonstwo so prašeć, dźe-li wo to, ćežišća za přichodne wólby krajneho sejma postajić“, podšmórny krajna před­sydka Antje Feiks w swojej rozprawje.

Wosrjedź twarnišća swoje awto zešro­tował je šofer transportera njedaloko bayerskeje wsy Schneckenlohe. Byrnjež tafle wuraznje před twarnišćom warnowali, bě 24lětny zawěry z wulkej spěšnosću wobjěł a runu smuhu na hromadu bitumena jěł. Poł metra wysoka hro­ma­da skutkowaše kaž skakanišćo. Po tym zo bě transporter něhdźe 20 metrow lećał, zrazy tón do pobóčneho wobhrodźenja. Jězdźidło bu dospołnje skóncowane, wobě wósce buštej wutorhnjenej. Šofer so kaž dźiw jeno snadnje zrani.

Z Trabantom 25 000 kilometrow po puću był je čěski dyrdomnik a filmowc Dan Přibáň. Jězbu zahajił bě před pjeć měsa­cami w južnej Indiskej. Wčera so do Prahi nawróći. Přewodźałoj stej jeho dalši w Zwickauwje twarjeny „601“ kaž tež mólički Fiat 126p z 23 PS. Skurilnu skupinu běchu wšudźe witali, kaž Přibáň rjekny.