Rose za žiwjenski skutk počesćeny
Madrid (SN). Romani Rose, předsyda Centralneje rady němskich Sintow a Romow, přija kónc tydźenja myto za swój žiwjenski skutk. Španiski Instituto de Cultura Gitana spožči jemu myto składnostnje Mjezynarodneho dnja Sintow a Romow. Z kulturnym mytom česća kóždolětnje wosobiny, kotrež so na kulturnym a akademiskim polu za Sintow a Romow zasadźeja. Instituto de Cultura Gitana je statna załožba, kotraž wot lěta 2007 dźěła a stara so wosebje wo mjeńšinu Gitanow, španiskich Romow. Nimo Romanija Rosy su lětsa wjacorych španiskich tworjacych wuměłcow, sportowcow a žurnalistow wuznamjenili, kaž institut zdźěla.
Wosebity kurs na Viadrinje
Frankfurt n. W. (RD/SN). Jako prěnja Němskeje chce Europska uniwersita Viadrina w Frankfurće nad Wódru wuchodoeuropskim šulskim absolwentam, kotrychž šulske wotzamknjenje w Němskej njepřipóznawaja, studij zmóžnić. Z projektom „Viadrina Fast Track“ poskića jim uniwersita tři měsacy trajacy přihotowanski kurs direktnje po skónčenju šule. Viadrina podpěruje wobdźělnikow kursa nimo toho z měsačnym stipendijom 400 eurow w prěnim studijnym lěće. Cyłkownje dwaceći městnow su za dotal jónkrótny program zarjadowali.
Na rekordnym niwowje wostawa mjezynarodnosć Viadriny. K zahajenju lětnjeho semestra 2017 měješe wona studowacych z 99 krajow. Najwjace z nich pochadźa dale z Pólskeje, Ukrainy a Turkowskeje. Tež Trinidad a Tobago, Indoneska, Nepal a Haiti słušeja ke krajam, z kotrychž studenća su. Tuchwilu na Frankfurtskej uni cyłkownje 6 100 młodych ludźi studuje. Štwórćina su wukrajnicy. To je dwójce telko wukrajnikow, kaž je w cyłoněmskichm přerězku z wašnjom.
To a tamne (12.04.17)
Z čerwjenym sprayjom je 86lětna měrowa aktiwistka w Bernje murju před Šwicarskej narodnej banku popryskała. „Pjenjezy za brónje morja“, napisa Louise Schneider w přitomnosći fotografow a kamerow. Policija njeda dołho na so čakać a žonu zaja. Zastojnicy pomhachu jej přećelnje přez wysoki próh awta. Schneider wojuje čas žiwjenja w organizaciji „Šwicarska bjez armeje“. Z najnowšej akciju měrješe so wona přećiwo financowanju wójnskeho materiala přez banki.
Trezor z maturitnymi nadawkami su njeznaći w Stuttgartskim gymnaziju namócnje wotewrěli. Nětko dyrbja nadawki w matematice a jendźelšćinje w Badensko-Württembergskej kaž tež w druhich zwjazkowych krajach wuměnić. Po informacijach kultusoweho ministerstwa njebu ničo pokradnjene. Prawdźepodobnje buchu nadawki wotfotografowane.
Franciskus wo wodaće prosył
Kigali (B/SN). Bamž Franciskus přiznawa winu katolskeje cyrkwje hladajo na morjenja w Ruandźe. Na wopyće ruandaskeho prezidenta Paula Kagamy we Vatikanje prošeše jeho Franciskus wo wodaće „za hrěchi a zmylki cyrkwje a jeje sobustawow“ za čas genocida na přisłušnikach ludu Tutsi. Lěta 1994 je radikalna Hutu-milica něhdźe 800 000 Tutsi- a Hutu-ludźi zamordowała.
Uni-cyrkej nimale hotowa
Uzbek atentat přiznał
Stockholm (dpa/SN). Zajaty 39lětny Uzbek je terorowy nadpad w Stockholmje přiznał. Tole je jeho prawiznik dźensa sudnikej zdźělił, kiž měješe wo dalšim zajeću muža rozsudźić. Tón bě minjeny pjatk z nakładnym awtom w šwedskej stolicy Stockholmje do skupiny pěškow a na to do kupnicy zajěł. Při tym štyrjoch ludźi mori a 15 zrani. Uzbek bě lěta 2014 w Šwedskej wo azyl prosył, štož pak bu wotpokazane. Namołwu, kraj wopušćić, muž ignorowaše. Město toho je so w ilegaliće zhubił.
Pjöngjang hrozy Americe
Seoul/Pjöngjang (dpa/SN). Po tym zo běchu USA lětadłonošak z dalšimi łódźemi do směra na Sewjernu Koreju pósłali, su tam zwuk napřećo Americe přiwótřili. Sewjerna Koreja chcyła „z najraznišimi naprawami prowokaterow trjechić a so ze sylnej wojerskej mocu zakitować“, wonkowne ministerstwo w Pjöngjangu zdźěli. Ludowa republika je na wójnu přihotowana, dyrbjeli-li USA to chcyć.
Lěhwo ćěkancow so wotpaliło
Po originalu znowa natwarjeny „Lutherowy pućowanski wóz“ steji ...
Altmaier ma wotstupić
Kanclerka skruća Trumpej rjap
To a tamne (11.04.17)
Chětro smjerdźatu překwapjenku staj w Bayerskej šofer kabrioleja a jeho sobujěduca dožiwiłoj. 53lětny bě ze 14lětnej dźowku w Altomünsteru z wočinjenej třěchu po puću, jako jimaj traktor z připowěsnjenym juchowym sudom napřećo přijědźe. Tón dyrbješe so parkowacemu awtu wuwinyć. Při tym pak so jucha do kabrioleja a na w nim sedźaceju wuliny, dokelž njebě wěko suda porjadnje začinjene. Nan a dźowka so njezraništaj, „awto pak móžetaj preč ćisnyć“, kaž rěkaše.
Rubježnik nohajcow je wot najnowšeho w Heidelbergu aktiwny. Wčera bě wón 21lětnu kolesowarku zadźeržał a sej žadał, zo sej črij zuje a jemu nohajcu přepoda. Na to ćekny na kolesu. Hižo do toho bě sej z nožom w ruce wot 19lětneje kolesowarki nohajcu žadał. Młoda žona pak móžeše ćeknyć. Hač so wo samsneho muža jedna, dotal njewědźa.
Rizika terora w Egyptowskej
Berlin (dpa/K/SN). Němske wonkowne ministerstwo skedźbnja po atentatach w dwěmaj koptiskimaj cyrkwjomaj na rizika w Egyptowskej přez terorowe akcije. Strach zawlečenja tohorunja hrozy. Pućowacym do Egyptowskeje radźi wone tuž k najwjetšej skedźbliwosći, štož płaći tež za dowolnišća při Čerwjenym morju. Wčera bě po najsylnišich terorowych nadpadach minjenych lět na křesćansku mjeńšinu w Egyptowskej 40 ludźi zahinyło a 110 zranjenja poćerpjeło.
China: Zdźeržliwi wostać
Peking (dpa/SN). Po najnowšim přiwótřenju napjatosćow mjez USA a Sewjernej Koreju namołwja China wšitkich wobdźělenych k zdźeržliwosći a sebjewobknježenju. China połoženje na korejskej połkupje dokładnje wobkedźbuje, zdźěli rěčnica wonkowneho mininisterstwa w Pekingu. „Wšitke strony dyrbjeli so wobknježić a połoženje dale njepřiwótřić.“ Hladajo na dale trajace testy sewjerokorejskeho mócnarstwa z nowymi raketami běchu USA kónc tydźenja lětadłonošak „USS Carl Vinson“a dalše łódźe do směra na Koreju pósłali.
Protesty přećiwo zawrjenju
