Wöller: Mjenje politiskich njeskutkow
Lipsk (dpa/SN). W Sakskej je ličba politiskich njeskutkow snadnje woteběrała. Tole rozprawja Leipziger Volkszeitung, powołaca so na přepytowanje a rozprawu nutřkowneho ministerstwa hladajo na lěto 2017. Po tym bě operatiwny wotwobaranski centrum, kotryž je jako policajski wotrjad k wotwobaranju terorizma a ekstremizma krajnemu kriminalnemu zarjadej přirjadowany, hač do kónca nowembra 494 jednanjow wotzamknył. Přez cyłe lěto 2016 bě jich 580 było. Hač do nowembra su přećiwo 337 wobskorženym přepytowali (2016: 755).
Z cyłkownje 215 padami (2016: 281) wuchadźeše po mjenowanej rozprawje najwjace politisce motiwowanych njeskutkow z prawicarskeho spektruma. Ličba přepytowanjow přećiwo lěwicarskim ekstremistam je porno tomu ze 87 padami (2016: 77) snadnje přiběrała.
Sakski nutřkowny minister Roland Wöller (CDU) nowinje rjekny: „Najebać aktualnje woteběracu ličbu njeskutkow njesměmy so wróćo zlehnyć. Z nazhonjenja wěmy, zo so politisce motiwowane njeskutki hižo wjele lět w žołmach jewja. Dyrbimy so tuž hižo nětko na přichodnu tajku žołmu nastajić.“
Trikoty sponsora zakazane
Lipsk/Budyšin (dpa/SN). Po raznej diskusiji dwělomneho sponsora dla je Sakski koparski zwjazk wokrjesnemu wyšemi ligistej ST Budyšin zakazał, wotpowědne trikoty wužiwać. Wabjenje njewotpowěduje statutam zwjazka, rěka we wčerawšim wozjewjenju centrale koparske zwjazka w Lipsku. Towarstwu su rozsud hižo minjeny kónc tydźenja zdźělili. Do toho bě sćelak MDR wo naležnosći rozprawjał.
Pola sponsora jedna so wo drastowy wobchod we Wjelećinje. Tam předawaja mjez druhim tež mjez neonacijemi woblubowanu marku Thor Steinar.
Dojednanje wo dwělomnym sponsoru bě kónc nowembra w Budyskej měšćanskej radźe debatu zbudźił. Ze zakazom wužiwanja trikotow pak njeje tema we wočomaj Budyskeho wyšeho měšćanosty Alexandera Ahrensa dawno hišće z blida, kaž jeho rěčnik powěsćerni dpa zdźěli. Kónc přichodneho tydźenja chce so politikar SPD ze zastupnikami koparskeho towarstwa zetkać, zo by zhonił, kak bě ke kooperaciji dóšło.
Prawje rozsudźili
Sym podpisał, dokelž ...
... wobkedźbuje wobydlerska iniciatiwa Minority SafePack organizacije FUEN cyły rjad konkretnych naprawow za škit narodnych mjeńšin w Europje, kotrež sahaja wot regionalneho spěchowanja a podpěry škita rěče a kultury hač k naprawam woprawdźiteho samopostajowanja ludowych skupin a mjeńšin přez politiske zastupnistwo.
Z připóznaćom tejele iniciatiwy na europskej runinje mamy tež my Serbja jako indigeny lud w Europje móžnosć, sej swoje prawa hišće doraznišo wužadać.
Namołwjam tohodla kóždeho, so na mjenowanej solidariskej akciji Federalistiskeje unije narodnych mjeńšin w Europje wobdźělić.
Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin (FUEN) Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
To a tamne (09.01.18)
Wot drogow zamućeny je 21lětny w badensko-württembergskim Haslachu policiju wołał, dokelž bě so pječa něchtó do jeho bydlenja zadobył. Zastojnicy wšak wčera rano žanoho paducha njenańdźechu, za to pak titku marihuany. Muž bě tak jara wot drogow wopojeny, zo zastojnikam přeradźi, zo ma tošku z dalšimi drogami pod łožom. „To bě jeho doskónčna zahuba“, policija piše.
Jenož w spanskim wobleku je so dwulětny pjerach w Bayerskej na rańše přechodźowanje podał. Při runje šěsć stopnjach bě hólčk w Landshuće jenož w nohajcach po puću a hižo wjetšu dróhu přeprěčił. Skónčnje wón pěškej napadny, kiž policiju alarmowaše. Ta podarmo za staršimaj hólca pytaše. Jako jeho do chorownje dowjezechu, dóńdźe informacija staršeju wo zhubjenym synku. Swójba bě w Landshuće na wopyće. Pjerach bě skradźu z bydlenja twochnył.
„Wótčenaš ma tajki wostać“
Mnichow (B/SN). Předsyda Němskeje biskopskeje konferency, kardinal Reinhard Marx, nima znowapřełožk Wótčenaša za trěbny. Wón praji, ze swojim wuprajenjom w italskej telewiziji „njeje k jednanju namołwił“. Kardinal Marx namjetuje: „Tekst měł tajki wostać, měł pak so lěpje interpretować.“ Čitajće k tomu tež serbske měnjenje pod „Namjet bamža Franciskusa z wočomaj egezegety“ pod www.swjate-pismo.de/index.php?id=1000.
Miliony dźěći bjez kubłanja
Bonn (B/SN). Organizacija za kulturu a kubłanje Zjednoćenych narodow warnuje před swětowym hoberskim brachom na polu šulskeho kubłanja. 264 milionow dźěći a młodostni w starobje šěsć do 17 lět nima scyła žadyn přistup ke kubłanju, zdźěli Němska komisija UNESCO. W lětach 2010 do 2015 ležachu ličby nastupajo wuspěšne zakónčenje zakładneho schodźenka jenož pola 83 procentow. W dalšim schodźenku (hač do 14 lět) bě to 69 procentow a na wyšim sekundarnym schodźenku (15 do 17 lět) jenož 45 procentow Awtorojo rozprawy UNESCO wo šulskim kubłanju namołwjeja knježerstwa po cyłym swěće, prawo na kubłanje přesadźić.
Cyrkej šwika eksport bróni
Njeskutk přiznał
Dortmund (dpa/SN). W procesu wo bombowym nadpadźe na mustwowy bus koparjow Borussije Dortmund je wobskorženy njeskutk přiznał. Zdobom pak wón prěje, zo chcyše někoho morić. „Jara swoje zadźerženje wobžaruju“, rjekny 28lětny dźensa před Dortmundskim sudnistwom. Pječa bě wón rozbuchlinu tak připrawił, zo njemóžeše so nichtó zranić. Statne rěčnistwo wumjetuje 28lětnemu wobskorženemu z ruskimi korjenjemi pospytane morjenje we 28 padach.
Prěnje warnowanske stawki
Frankfurt n. M. (dpa/SN). W tarifowym konflikće němskeje metaloweje a elektroindustrije je dźěłarnistwo IG metal dźensa prěnju wulku žołmu warnowanskich stawkow zahajiło. Bjezposrědnje po połnocy dźěławi firmy w frankskim Aschaffenburgu dźěło złožichu. W běhu dnja su so dalše zawody mjez druhim w Sakskej a Braniborskej přizamkli. Dźěłarnistwo žada sej za 3,9 milionow přistajenych branše šěsć procentow wjace mzdy a skrótšenje tydźenskeho dźěłoweho časa na 28 hodźin.
Kretschmer: Zapis njetrěbny
Aktiwisća wobswětoškitneje organizacije Greenpeace su dźensa rano ...
Merkel: Hoberske nadawki nowemu knježerstwu
Berlin (dpa/SN). Wodźacy zastupnicy CDU, CSU a SPD su so dźensa rano k dalšim sonděrowanskim rozmołwam k wutworjenju zhromadneho knježerstwa zetkali. Frakciski předsyda unije w zwjazkowym sejmje Volker Kauder a jeho kolegina ze stron SPD Andrea Nahles zastupištaj hižo krótko po 7 hodź. do domu Konrada Adenauera, centrale CDU w Berlinje. Tež předsydu krajneje skupiny CSU Alexandera Dobrindta, tam wočakowachu. Dopołdnja schadźowachu so předsydźa CDU, SPD a CSU, kanclerka Angela Merkel, Martin Schulz a Horst Seehofer k wuradźowanju na temu Europa. Nimo toho su we wšelakich dźěłowych skupinach za rozrisanjemi w dotal njewujasnjenych prašenjach pytali.
Zwjazkowi politikarjo běchu sonděrowanja wčera dosć optimistisce zahajili. Při tym wšitcy zwuraznichu, zo chcyli so konstruktiwnje do dźěła dać, wšako čakaja na nowe zwjazkowe knježerstwo „hoberske nadawki“, kaž to Angela Merkel zwurazni. Martin Schulz a Horst Seehofer přilubištaj, zo njesměło nowe knježerstwo hižo pod hesłom „dale kaž dotal“ dźěłać.
Peter hižo za předsydku njekandiduje
Berlin (dpa/SN). Předsydka Zelenych Simone Peter njebudźe znowa za zastojnstwo kandidować. Wona nochce personalnemu ponowjenju na puću być, piše 52lětna w lisće Zelenym, kotryž powěsćerni dpa předleži. Z kandidaturu delnjosakskeje politikarki Zelenych Anje Piel so w tymle prašenju něšto hiba. „To je mje pohnuło, swoje městno přewostajić“, Peter piše. Wona je wot lěta 2013 předsydka Zelenych. Hišće w oktobru bě připowědźiła, zo chcyła na zjězdźe kónc januara znowa kandidować.
Nimo delnjosakskeje frakciskeje šefiny w krajnym sejmje Piel (52) kandidujetaj schleswigsko-holsteinski wobswětowy minister Robert Habeck (48) a zapósłanča zwjazkoweho sejma Annalena Baerbock (37) za dwójne nawodnistwo.
Ekologiska strona wuzwoli 26. a 27. januara nowe nawodnistwo. Dotalny předsyda Cem Özdemir so po wjace hač dźewjeć lětach na čole strony tohorunja zastojnstwa wzda. Poprawom chcyše so z frakciskim předsydu w zwjazkowym sejmje stać. Tež to je mjeztym z blida.
