CDU je kraj hromadźe dźeržała
Dowólbna rozmołwa z Michaelom Kretschmerom, naměstnikom frakcije CDU w zwjazkowym sejmje a generalnym sekretarom CDU w Sakskej
Mjez Mužakowom a Oybinom je Michael Kretschmer po puću, zo by za politiku CDU a za sebje samoho wabił. 42lětny je wot lěta 2002 zapósłanc Němskeho zwjazkoweho sejma, a nětko we wólbnym wokrjesu 157 (Zhorjelc) znowa kandiduje. Constanze Knappowa je z nim rěčała.
By-li čłowjek diskusijam w socialnych medijach wěrił, potom ćěri knježerstwowa koalicija Němsku do bjezdna – z krizu ćěkancow, dale powjetšacym so rozdźělom mjez chudymi a bohatymi, z dieselowym a jejacym skandalom a dalšimi „twarnišćemi“. Wy pak wulku politiku přiwšěm hišće sytu nimaće?
M. Kretschmer: Wirtuelny rum socialnych medijow w mnohim nastupanju ničo z realnym žiwjenjom činić nima. W Europje płaći Němska jako sylny kraj a spušćomny partner. Tež w ćežkich časach bě naše knježerstwo jednanjakmane. Tohodla je bjezdźěłnosć w našim kraju na jara niskim niwowje, a hospodarstwo a dochody z dawkow rostu. Ale tež w přichodźe budźe wjele nadawkow, a na tym chcu sobu skutkować.
Dwurěčne tafle „njejsu trěbne“
Budyšin (SN/at). Dwurěčne módre awtodróhowe tafle podłu A 4 w Sakskej kaž tež podłu A 13 a A 15 w Braniborskej móhli pućowacych na tu bydlacu mjeńšinu skedźbnjeć. Hižo bywši předsyda Domowiny Jan Nuk bě so swój čas bjez wuspěcha wo to prócował. Nětko je so łužiska zapósłanča zwjazkoweho sejma Caren Lay (Lěwica) zwjazkowe knježerstwo za tym prašała, hač ma wone za móžne, awtodróhowe tafle w serbskim sydlenskim rumje Sakskeje a Braniborskeje dwurěčnje němsce a serbsce popisać, podobnje němsko-čěskemu wuhotowanju w pomjeznej kónčinje k Čěskej.
Wichor hoberske škody zawinił
San Juan (dpa/SN). Wulce strašny hurrikan Irma je w Karibice hoberske škody zawinił a šěsć ludźi do smjerće storhnył. Cyłkowny rozměr škodow njeje dotal hišće jasny, zdźěli francoski statny prezident Emmanuel Macron. Tuchwilu ćehnje wjerćaty wichor dale do směra na Dominikansku republiku. Chětro wěste je, zo tež Floridu trjechi. Dźěle města Miami chcedźa zarjady tuž ewakuować. Kaž wjedrarjo wěšća, nastawatej nad regionom dalšej hurrikanaj.
Bamž w Kolumbiskej
Bogotá (dpa/SN). Wjac hač poł miliona ludźi je bamža Franciskusa w Kolumbiskej z wulkej radosću witało. Hłowa katolskeje cyrkwje chce měrowy proces mjez knježerstwom a FARC-rebelemi podpěrać, kotřiž su lětdźesatki přećiwo sebi wojowali. „Njespušćće ženje nadźiju a wjesołosć“, Franciskus ludźom přiwoła. Wjeršk jeho jězby budźe zetkanje ze šefom bywšich rebelow a z woporami konflikta.
Nochce so wróćo sćahnyć
Žně cokoroweje rěpy, kaž tu blisko Baćonja, su zahajene. Dotal su ...
Wobzamknjenje prawnisce móžne
Žadaja sej embargo
Wotewrjenosć signalizowali
Podstupim (SN/BŠe). Na zjawnym wuradźowanju Rady za serbske naležnosće Braniborskeje wutoru w Podstupimje je prezidentka tamnišeho krajneho sejma Britta Stark (SPD) 3. krajne wubědźowanje „Rěčam přichilene komuny – Serbska rěč je žiwa“ zahajiła. Nimo rozprawy knježerstwoweje społnomócnjeneje za naležnosće Serbow, statneje sekretarki Ulriki Gutheil, zaběrachu so čłonojo serbskeje rady tež z planowanej wobšěrnej wokrjesnej reformu w Braniborskej. Tuchwilu maja tam 14 wokrjesow kaž tež tři bjezwokrjesne města Choćebuz, Frankfurt nad Wódru a Podstupim.
Za samostatnosć ludu Rohingya
Bjez pardona w Myanmarje přisłušnych mjeńšiny zatřěleja
Rangun (dpa/K/SN). W dalokej Aziji, w Myanmarje (něhdyšej Birmje), knježi hižo dlěje lawreatka Měroweho Nobeloweho myta Aung San Suu Kyi. Njedźiwajcy toho w sewjernym zwjazkowym kraju Rakhine namóc howri. Dokelž su militantni muslimscy přisłušnicy ludu Rohingya w někotrych wsach stražne stacije nadpadowali a je zapalowali, postupuje wójsko Rangunskeho knježerstwa nětko na swoje wašnje. Wojacy namjeznych stražow hromadźe z buddhistiskimi zažrancami w Rakhinje wsy rohingyaskeje ludnosće swojowólnje zapaleja. A zezatřěleja bjez pardona wšěch, kotrychž maja za jeje přisłušnikow. W běhu jeničkeho tydźenja su nimale 400 ludźi morili. W času wot 25. awgusta hač donětka je přibližnje 40 000 Rohingyajow přez hranicu do Bangladesha ćeknyło.
Čitaja w tachantskej cyrkwi z biblije
To a tamne (07.09.17)
Swoju lubosć wopokazał je muž z durinskeho Ilmenauwa na wosebite wašnje. Na łuce bě z nuznikoweje papjery wutrobu sformował a ju zapalił. Přidatnje je hišće silwestersku raketu k njebju třělił. Lubosćinski dopokaz – jako překwapjenka k narodninam swojeje lubki mysleny – nježněješe pola susodki runjewon přiklesk. Wona so na njeho hóršeše. Runje hišće romantiski 30lětny so rozmjerza a teptaše do duri bydlenja 50lětneje susodki, zo su so rozbili.
208 kašćikow z prózdnymi blešemi pokradnyli su njeznaći na přemysłownišću w schleswigsko-holsteinskim Barsbüttelu. Z nich je 128 piwowych a 80 kašćikow mineralneje wody. Policija pyta nětko za swědkami njewšědneho njeskutka. Snano je někomu napadnyło, zo chcyše něchtó něhdźe wulke mnóstwo kašćikow wotbyć.
