To a tamne (16.07.24)
Prezidenta kolumbiskeho koparskeho zwjazka zajała je policija USA při tumultach wokoło kónčneje hry mjez Argentinskej a Kolumbiskej w Miamiju w Floridźe. Wjace hač 800 zastojnikow bě w stadionje Hard Rock zasadźenych. Hra, kotruž je Argentinska dobyła, započa so dwě hodźinje přepozdźe: Fanojo bjez zastupneho lisćika běchu spytali, so namócnje do stadiona předrěć. Při tym dóńdźe k rozestajenjam z policiju.
Do škleńčanych duri bywšeje kupnicy Galeria Kaufhof w Choćebuzu zrazyła je 61lětna ze swojim awtom. Wočiwidnje měješe žona strowotny problem, policija zdźěla. Awto je wjacore durje personalneho zachoda přerazyło a hakle po někotrych metrach w twarjenju stejo wostało. Šoferku dowjezechu do chorownje. Hewak njeje so nichtó zranił. Město chce kupnicu na měšćanski forum přetwarić.
Rědki centrum slědźenja
Hamor (SN). „Carbon Labfactory Sakska“ rěka najnowši projekt w zwisku ze změnu strukturow. Wjace hač 60 milionow eurow spěchowanskich srědkow inwestujetej Sakska a Zwjazk do slědźenskeho centruma za „zelene“ karbonowe niće. Techniska uniwersita w Kamjenicy projekt wědomostnje přewodźuje. W přichodnych lětach chcedźa w tutym inowatiwnym centrumje slědźić, kak móhli so karbonowe niće w přichodźe naslědnišo produkować.
Slědźenska naprawa budźe potom jedna z třoch po cyłym swěće. Jeničce w USA a Awstralskej dotal tajke zarjadnišćo maja. Projekt je dźěl wusměrjenja industrije w srjedźnej Łužicy, po kóncu wudobywanja brunicy. Wšelakore statne institucije su do procesa zwoprawdźenja centruma zapřijate. Doniž so doskónčne dźěło wědomostnikow njezahaji pak hišće někotre lěta traje. Potom ma tójšto atraktiwnych dźěłowych městnow nastawać. Karbonowe niće su wosebje lochka a tola twjerda maćizna. Tute wužiwaja mjez druhim za lětadła, abo tež za wosebje lochke kolesa, kotrež profisportowcy přewšo požadaja.
Zapadnu Afriku skrućić
Berlin (dpa/SN). Wonkowna ministerka Annalena Baerbock chce zhromadne dźěło ze Senegalom a Słonowinowym pobrjohom (Elfenbeinküste) zesylnić, zo by kónčinu před dalšim wosłabjenjom škitała. „Hdyž na zapadźe Afriki hišće wjace krajow do chaosa padnje, njezměje to jenož dramatiske sćěhi za wobydlerjow kónčiny ale wuskutkuje so hnydom na wěstotu Europy“, rjekny politikarka Zelenych do wotlěta do zapadneje Afriku.
Odessa wot raketow trjechena
Odessa (dpa/SN). Njedaloko ukrainskeho přistawneho města Odessy su minjenu nóc wjacore detonacije registrowali. Guwerner wojerskeho regiona Oleh Kiper ludźi namołwješe, w bunkrach wostać, doniž njejsu płomjenja zhašane. Do toho bě ukrainski powětrowy škit zwěsćił zo so wjacore rakety z juhu bliža. Informacije wo škodach njepředležachu. Ruska twjerdźi, zo Ukraina swoje nadpady na Krimu w Odessy planuje a koordinuje.
Tójšto mortwych w šuli
Z wotmachom hotuja so w Francoskej na Olympiske hry, kotrež wotměja ...
Faeser: Běchmy dobri hosćićeljo
Berlin (dpa/SN). Zwjazkowa ministerka za nutřkowne naležnosće Nancy Faeser je po finalnej hrě europskich koparskich mišterstwow w Berlinje pozitiwny facit turněra sćahnyła. „Smy wulkotny swjedźeń kopańcy wosrjedź Europy dožiwili. Naš kraj je so jako dobry hosćićel prezentował“, rjekny politikarka SPD wčera wječor medijam. „Wobrazy tutoho lěća w našich městach wostanu njezapomnite.“
„Kopańca njemóže wězo problemy našeho časa rozrisać. Za čas kopańcy je pak zhromadnosć nastała, kotraž našej towaršnosći jara tyje“, Faeser rjekny. Po zahajenju EM 14. junija su statysacy hosćo do Němskeje přišli. Turněr je so wčera wječor z dobyćom španiskeho mustwa přećiwo Jendźelskej skónčił.
Faeser dźakuje so wěstotnym mocam policije, wuchowarjam a čestnohamtskim pomocnikam za swěrnu słužbu.
Merz: Sym kmany kandidat
Berlin hotuja so na dobyće Trumpa
Berlin (dpa/SN). Zwjazkowe knježerstwo so po słowach koordinatora za transatlantiske naležnosće Michaela Linka na to hotuje, zo stanje so Donald Trump znowa z prezidentom USA. „Nimo přihotow zwjazkoweho knježerstwa, kotrež wotměwaja so jara intensiwnje a wězo tajnje za kulisami, trjebamy kruty zwjazk demokratiskich stron“, rjekny Link nowinarjam. „W tutej naležnosći sym stajnje po puću a pěstuju tež styki k CDU a CSU“, politikar FDP rjekny. „Hotujemy so na scenarij Trump 2.0.“
Do toho běštaj zastupowacy předsyda frakcije CDU/CSU w zwjazkowym sejmje Jens Spahn (CDU) a předsyda europskeho wuběrka zwjazkoweho sejma Anton Hofreiter (Zeleni) namołwjałoj, zo měła so Němska lěpje na móžne wólbne dobyće Trumpa přihotować.
Wonkopolitiski rěčnik SPD w zwjazkowym sejmje Nils Schmidt rjekny: „Prezident USA Joe Biden, ma přeco hišće dobre wuhlady, wólby dobyć.“ Najebać to pojědźe Schmidt na zjězd republikanow, zo by so na Trumpa lěpje nastajić móhł.
Biden: Njejsmy njepřećeljo
Prezident USA warnuje po atentaće na Donalda Trumpa před namocu
Washington/Milwaukee (dpa/SN). Do nominowanja Donalda Trumpa za prezidentskeho kandidata republikanow je prezident USA Joe Biden hladajo na atentat na 78lětneho před namocu we wólbnym boju warnował. „Wšelake měnjenja rozrisamy we wólbnej kabinje, nic pak z kulkami“, rjekny Biden při jednej ze swojich rědkich narěčow na ameriski lud.
Politiska debata w kraju je minjeny čas chětro napjata. „Je na času, ju wochłódnić“, wón potwjerdźi. „Smy wšitcy zamołwići, tole činić. „Namóc njeje nihdy rozrisanje“, prezident rjekny. „Njejsmy njepřećeljo“. Mjeztym je Trump dźeń po dramatiskich scenach w Pennsylvaniji w zwjazkowym staće USA Wisconsin přizemił, hdźež chce so jako kandidat republikanow k prezidentskim wólbam w nowembru oficialnje nastajić dać.
Wječorne narěče prezidenta z jeho běrowa w Běłym domje su jara rědke a poprawom jenož w krizach z wašnjom. Runje w tajkim połoženju USA po atentaće na Trumpa tuchwilu su. Atentat bě po wšěm swěće zludanje zbudźił.
Je realizm populizm?
To a tamne (15.07.24)
Z wokna čilajo, je muž w Neustadtće nad Dunajom z druheho poschoda padnył a so ćežko zranił. Prawdźepodobnje je 47lětny při akciji dźensa rano runowahu zhubił a wjace hač sydom metrow do hłubiny padnył. Susod je zražku słyšał a wuchowansku słužbu wołał. Pomocnicy dowjezechu 47lětneho do chorownje. Sanitetarjam muž rjekny, zo bě chětro napity. Zo je jeho něchtó z wokna storčił, tuchwilu wuzamkuja.
Młody ćuleń je so ze Sewjerneho morja hač do Hamburga a Schleswigsko-Holsteinskeje předrěł. W Geesthachće wulěze z wody, zo by sej rybu zesłodźeć dał, kotruž bě sam popadnył. Fachowc za ćulenje je hakle někotre měsacy stare zwěrjo popadnył a do stacije w Friedrichskoogu dowjezł. Tam młodźo zastaraja, doniž njeje 25 kilogramow ćežke. Potom wusadźa ćulenja zaso do morja.
