To a tamne (05.07.24)
Oficialna tafla z napisom „zawrjene městnostne połoženje – narunanska wjesna tafla“ wita tuchwilu do wjesneho dźěla Hanf města Hennef w Sewjerorynsko-Westfalskej. Přičina je, zo su njeznaći zaso raz požadanu wjesnu taflu Hanfa pokradnyli. Mjez 2021 a 2023 je so na 15 taflow zhubiło. Doniž nowa tafla dozhotowjena njeje, so po wšěm zdaću hišće někotre tydźenje pominu, rěka z krajneho zawoda Straßen.NRW.
Najwjetše zasadźowanske wozydło powołanskeje wohnjoweje wobory w Němskej su nětko w Hamburgu předstajili. Tak mjenowane wozydło z teleskopowym sćežorom (TMF70) je z košom wuhotowane, kotryž wohnjowym wobornikam zmóžnja, z wysokosće hač do 70 metrow ludźi wuchować a wohenje zhašeć. Płaćiło je jězdźidło 1,6 milionow eurow, Hamburski nutřkowny zarjad informowaše.
Statnik před AfD warnuje
Berlin (dpa/SN). Dawid Statnik, předsyda Domowiny, warnuje w interviewje z Berlinskej nowinu „Tagesspiegel“ před AfD a „wospjetowanjom stawiznow“. Po jeho měnjenju by wuspěch strony na wólbach do krajneho sejma Sakskeje a Braniborskeje negatiwne konsekwency za serbski lud měł. Statnik wopodstatni swoju poziciju mjez druhim z manifestom zapósłanca AfD w europskim parlamenće Maximilana Kraha. Jeho nahlady so do demokratiskeje wotewrjeneje towaršnosće njehodźa.
Schuster sej jasnu změnu žadał
Berlin (dpa/SN). Sakski nutřkowny minister Armin Schuster (CDU) je sej wot zwjazkoweho knježerstwa jasnu změnu kursa nastupajo migracisku politiku žadał. Na to skedźbni wón wčera w debaće w zwjazkowym sejmje. Při tym dźěše wo namóc ludźi, kotřiž so w Němskej wo azyl požadaja. Subjektiwne začuće wěstoty ludnosće je w zwisku z namocu dramatisce spadnyło. „Integracija njeje žana dróha, kotraž do jednoho směra wjedźe“, Schuster zwurazni. Chcemy migrantow dožiwić, kotřiž chcedźa so integrować.
Röttgen: Biden měł cofnyć
Zničene chěže a rozpadanki w šwicarskim dole Val Bavona ludźi ...
Namjetuje wosebite zamóženje
Drježdźany (dpa/SN). Sakski ministerski prezident Michael Kretschmer (CDU) je na wosebite zamóženje Zwjazka za infrastrukturu a komuny skedźbnił. „Bjez prašenja, trjebamy inwesticije“, wón sćelakej „Deutschlandfunk“ wujasni a mjenowaše sumu 100 miliardow eurow. Tajke wosebite zamóženje pak ma jenož potom hódnotu, jelizo su Zeleni k tomu zwólniwi, so swojeje ideologije wzdać. Předewšěm dźe Kretschmerej wo to, planowanja za infrastrukturne naprawy pospěšić. Tak dyrbi móžno być, hižo wobstejacu železnisku čaru tež jónu za tři, štyri lěta wutwarić a pruwowanje znjesliwosće wobswěta jenož w padźe njedótknjeneje krajiny do nadawka dać. „Jelizo chceš, su rozrisanja, jeli nochceš, namakaš stajnje někajke přičiny. Zwjazkowe knježerstwo je hladajo na přičiny jara, jara sylne“, Kretschmer wuswětli. Wosebite zamóženje móže tomu dopomhać wo tym rozmyslować, što su problemy Zwjazka.
Woborna winowatosć za žony?
Berlin (dpa/SN). Generalny inspektor Zwjazkoweje wobory Carsten Breuer žada sej hladajo na diskutowane znowazawjedźenje woborneje winowatosće tež žony zapřijeć. „Wokomiknje je woborna winowatosć za muži móžna. W zakładnym zakonju je to jenož na muži wusměrjene. Tu měli runoprawosć wutworić. Trjebamy k tomu wotpowědnu politisku a towaršnostnu diskusiju“, wuswětli Breuer redakciskej syći Němskeje (RND).
Zwjazkowy minister za zakitowanje Boris Pistorius (SPD) je w juniju plany za nowy model woborneje słužby předstajił. Nowy model ma ze zakładneje słužby we wobjimje šěsć měsacow z opciju na podlěšenje wobstać. K tomu ma so zawjazowace naprašowanje přewjesć, w kotrymž dyrbja młodźi mužojo swoju zwólniwosć a kmanosć k wobornej słužbje pomjenować. Młode žony smědźa to tež činić.
Breuer wupraji so za Pistoriusowy model a měni, zo trjeba Němska něhdźe 400 000 wojakow a rezerwistow. Bjez woborneje winowatosće njeje móžno, tole docpěć.
„Nowa doba nadźije a šansow“
We Wulkej Britaniskej wola wobydlerjo dźensa nowy parlament
London (dpa/SN). We Wulkej Britaniskej su wólby parlamenta zaběželi. Wólbne lokale su dźensa dypkownje w 7 hodź. wotewrěli. Wobkedźbowarjo wólbow wočakuja, zo dotalna opozicija strona Labour wysoko dobudźe. Jeje šef Keir Starmer budźe prawdźepodobnje dotalneho premierministra Rishija Sunaka w Downing Street wotměnić. Konserwatiwny Sunak bě w naprašowanjach mjez wolerjemi naposledk něhdźe 20 procentow za socialdemokratami ležał.
Wólbokmani we Wulkej Britaniskej su wjace hač 46 milionow ludźi. Wšitcy maja stajnje jedyn hłós. Sydła w Delnjej komorje kraja so na direktnych wolenych kandidatow rozdźěla. Kandidatka abo kandidat z najwjace hłosami w jednym ze 650 wólbnych wokrjesow kraja je potajkim dobyćer. Absolutna wjetšina w Delnjej komorje wučinja 326 městnow. Kaž z přepytowanjow wuchadźa, móhła strona Labour wjace hač 400 mandatow dóstać. Z tym móhła strona najlěpši wuslědk bywšich 190 lět žnjeć.
Mamy druhe nadawki
To a tamne (04.07.24)
Policist je něhdźe 180 kilogramow twarožka družin cheddar ze spowróćeneho nakładneho awta pokradnył. To bě přičina za to, zo je swoje dźěłowe městno zhubił. Wyše zarjadniske sudnistwo Porynsko-Pfalcowskeje je rewiziju policista wotpokazało a wusud z tym wobkrućiło. Zastojnik je při zasadźenju městno njezboža zawěsćić dyrbjał. Při tym bě z busom policije blisko wobškodźeneho kontejnera nakładnych awtow jěł a je tamnišeho sobudźěłaćerja firmy namołwjał, jemu wjacore pakćiki twarožka přepodać. Dohromady je wón dźewjeć twarožkow ze stajnje 20 kilogramami cheddara w hódnoće 554 eurow pokradnył.
W delnjobayerskej korčmje je 21lětny 16 piwow skazał a kóžde jednotliwje ze swojej ec-kartku zapłaćił. Korčmar so rozmjerza a policiju w Mammingu zazwoni. Za kóždu transakciju dyrbi wón mjenujcy popłatki we wobjimje něhdźe 20 centow zapłaćić, korčmar zastojnikam wuswětli. Hósć z Letiskeje njeměješe za njeho žane zrozumjenje a je so tež napřećo policiji tak zadźeržał. Hač je muž 16 piwow sam pił abo za druhich hosći sobu skazał, njeje jasne.
Nowa studija zakład za rozprawu
Berlin (dpa/SN). Zwjazkowe knježerstwo je přepytowało, kak runohódne žiwjenske wobstejnosće w Němskej su. Wo rozprawje měješe kabinet dźensa wuradźować. Po tym chcyštaj zwjazkowa ministerka za nutřkowne naležnosće Nancy Faeser (SPD) a hospodarski minister Robert Habeck (Zeleni) wuslědki přepytowanja w Berlinje předstajić. Amplowe knježerstwo wuzběhnje, zo njebě w Němskej dotal tajkeho wobšěrneho přepytowanja.
Putin so dale prócuje
Moskwa (dpa/SN). Ruski prezident Wladimir Putin chce so dźensa wječor w republice Kazachstanje ze swojim turkowskim kolegu Recepom Tayyipom Erdoğanom zetkać. Zetkanje statneju šefow bě poprawom hižo dlěje w Turkowskej předwidźane. Jutře wotměje so zeńdźenje Shanghaiskeje organizacije za zhromadne dźěło (SCO). Putin bě nastupajo wójnu w Ukrainje stajnje zaso wozjewił, zo chce so wón hladajo na napjatosće ze zapadom wo nowy swětowy porjad prócować.
Žane stabilne knježerstwo?
