Wosobinsce běch za čas korony přiwisnik statnych naprawow, z kotrymiž spytachu, dale a wjac smjertnym woporam zadźěwać. Wobrazy ze sewjerneje Italskeje běchu nam krute warnowanje. Tež w socialnych syćach je sej wjele ludźi tehdom nócny zakaz wuchoda žadało, zo njebychu so ludźo na partyjach mjez sobu natyknyli. Nimo toho mějach tehdom zbožo, zo njesmědźach so w Njeswačanskim parku jenož wuchodźować, ale samo na ławku sydnyć. Wróćo hladajcy pak wěmy, zo bě wjele zakazow objektiwnje přehnatych, hižo hdyž na absurdne předpisy dokoławokoło pohrjebow myslu. Město bjezkónčnych přepytowanjow by jasny signal politiki zmysłapołny był: Smy tež zmylki worali, dźensa smy wšitcy mudriši, a tohodla njech je kónc z bicarnymi prawniskimi rozestajenjemi, kotrež su hižo dołho sudnistwa, nic jenož w Budyšinje, wobćežowali. Ludźo móža tež statnym zamołwitym wodać, jeli so k swojim zmylkam wuznawaja. Marcel Brauman

Swójske wuměłske ambicije spjelnił je sej sobudźěłaćer Mnichowskeje wuměłskeje zběrki Pinakothek a je tam skradźu jednu ze swojich mólbow powěsnył. Nětko skorža přećiwo njemu wobškodźenja wěcow dla. 51lětny bě při powěsnjenju wobraza dźěry do sćěny točił. Muž bě ­sobudźěłaćer techniskeho wobłuka muzeja. Nowy wobraz na sćěnje bě dohla­dowarjam hnydom napadnył. Kajki wuměłski stil moler zastupuje, njeje znate.

Dźesać km/h spěšniši po puću hač dowolene bě hołbik w Hagenje. Tole je policija sewjerorynsko-westfalskeho města ze swojim błyskačom dokumentowała. Dowolene běchu w kontrolowanej kónčinje 30 km/h. Ptačk pak lećeše dźesać kilometrow spěšnišo, na čož nastroj poli­cije „błyskny“. Po chłostanskim katalogu by hołb 30 eurow pokuty płaćić dyrbjał. Policija pak chce kulantna być.

Vatikan (B/SN). 60 lět je Swjaty stoł jako jenička nabožna zhromadnosć ze statusom wobkedźbowarja na hłownym sydle UNO a ma tam přistup k nimale wšěm dokumentam. Štož je bamž Pawoł VI. 1965 před hłownej zhromadźiznu UNO prajił: „Žana wójna wjace! Měr, měr njech­ je­­ naš zhromadny dóńt, kiž ma ludy a cyłe čłowjestwo wjesć“, to dźensa hišće­ płaći.

Bamž do Indoneskeje

Rom (B/SN). Hačrunjež je bamž Franciskus chětro kipry, chce wón w septembrje přewažnje muslimski kraj Indonessku wopytać, zdźěli tamniši minister za nabožne naležnosće Yaqut Cholil Qoumas. „Na swojim wopyće bamž mnohotne a mjezy nabožinow překročace bratrowstwo bjezposrědnje dožiwi, kotrež w indoneskej towaršnosći rosće“, rěka z ministerstwa Indoneskeje. Vatikan njeje powěsć dotal hišće wobkrućił.

Dialog přetorhnjeny

Hainewalde. Pod hesłom „Přejemy pokoj wšěm ludam“ schadźowachu so minjeny kónc tydźenja serbske ewangelske swójby w Hainewaldźe w Žitawskich horinach. Dohromady běše 44 wobdźělnikow z Hornjeje a Delnjeje Łužicy, kaž tež z cyłeje Němskeje přichwatało. Hižo z lěta 2013 přewjeduje Serbske ewangelske towarstwo prawidłownje tajki swójbny kónc tydźenja za mjezsobnu wuměnu a zabawu w maćernej rěči.

Sobotu su so wobdźělnicy we wšelakich dźěłarničkach z temu „měr a pokoj“ zaběrali. Dorosćeni rozestajachu so pod nawodom serbskeho superintendenta Krystofa Rummela na zakładźe bibliskich tekstow a kěrlušow z tym. Dźěći pak so kreatiwnje z temu zaběrachu a stworichu wšelake symbole měra a pokoja, mjez druhim natwarichu z klockow wulki móst jako symbol zwjazanosće mjez ludźimi a ludami. Něhdźe 10 hólcow w starobje mjez 11 a 16 lětami je wo wójnje a měrje diskutowało. Mjez druhim tež wo prašenju, hač bychu so sami za wojersku słužbu rozsudźili. Woni su spóznali, zo njeje lochko, na pjatu božu kaznju „Ty njesměš morić“ wotmołwy namakać.