Debata kanclera dla skónčena
Boris Pistorius nochce kandidować – Olafa Scholza póndźelu wuzwola
Berlin (dpa/SN). W přewšo wobćežnym połoženju hotuje so SPD ze zwjazkowym kanclerom Olafom Scholzom na čole na wólbny bój k wólbam zwjazkoweho sejma. Po tym zo je zakitowanski minister Boris Pistorius oficialnje zdźělił, zo nochce so z kanclerskim kandidatom socialdemokratow stać, chce předsydstwo strony nawodu zwrěšćeneje amploweje koalicije za kanclerskeho kandidata nastajić. Přichodne tři měsacy dyrbi Scholz po tuchwilnych woprašowanjach něhdźe 15 do 20 procentow přećiwo nawjedowacej uniji CDU/CSU nachwatać.
Minjeny čas je SPD wobćežnu debatu wo tym dožiwiła, hač njeby Boris Pistorius na kóncu tola lěpši kanclerski kandidat był. Wón je we woprašowanjach z wotstawkom najwoblubowaniši politikar Němskeje. Dale a wjace politikarjow na komunalnej, krajnej a zwjazkowej runinje bě so za njeho wuprajiło.
Wučomnicy njespokojom
Drježdźany (dpa/SN). Němski dźěłarniski zwjazk w Sakskej (DGB) mjenuje bydlenske połoženje wučomnikow w swobodnym staće napjate. DGB zepěra so při tym na naprašowanje mjez wjace hač 500 wučomnikami ze wšitkich dźělow zwjazkoweho kraja. „Wuslědki pokazuja wulku njespokojnosć wukubłacych ze swojej bydlenskej situaciju, starosće zbudźace pjenježne poćežowanje a definuja zdobom kriterije kwality za přichodne internaty“, DGB zdźěla.
„Je alarmowace, zo dyrbja wučomnicy nimale połojcu swojich wučomniskich pjenjez nałožować, chcedźa-li w swójskim bydlenju abo w bydlenskej zhromadnosći žiwi być. Kóždy pak derje zrozumi, zo chcedźa młodźi ludźo z powołanskim wukubłanjom tež samostatne žiwjenje zahajić. Tole pak je wosebje ludźom ze snadnymi dochodami runjewon njemóžne“, DGB skorži.
Po měnjenju dźěłarnistwa dyrbjała so politika wo to postarać, zo bychu wučomnicy zapłaćomne bydlenja dóstali. Nowe internaty měli jednołožowe stwy ze swójskej kupjelu a dobrym přiwjazanjom k wobchadnym srědkam měć.
To a tamne (22.11.24)
Zymske wjedro je policistam w Aachenje pomhało, z wjacorymi wukazami zajeća pytaneho muža dosahnyć. 42lětny bě zastojnikam w ćahu napadnył, dokelž njeměješe wupokaz při sebi. Jako policisća tež hišće drogi pola njeho namakachu, chcychu jeho sobu na stražu wzać. Na dwórnišću pak muž ćekny. Na zasněženej dróze pak hnydom dwójce padny. Sputaneho dowjezechu na stražu. Tam so wukopa, zo předleži šěsć wukazow zajeća přećiwo njemu. Nětko je wón w jastwje.
Třoch koparskich trenarjow na jednym dnju měješe koparske mustwo štwórteje ligi Piacenza Calcio. Rano běchu trenarja pušćili a hnydom naslědnika předstajili. Tón pak bě mjez přiwisnikami tak njewoblubowany, zo hrožachu protesty a blokady. Tuž powołachu wječor třećeho trenarja. Toho běchu hakle 7. oktobra pušćili a z nowym narunali.
Braniborska serbska rada w finalu do wólbow
40. posedźenje Rady za naležnosće Serbow w Braniborskej wutoru popołdnju bě poslednje wuradźowanje gremija do wólbow. Zdobom so dotalna předsydka Kathrin Šwjelina rozžohnowa.
Podstupim (SN/mb). Posledni dypk dnjoweho porjada njewěnowaše so jenož tuchwilnym wólbam noweje serbskeje rady, wo kotrychž předsydka wólbneho wuběrka Margit Neugebauer rozprawješe. Posedźenje je tež kóždy zajimc – kaž přeco – přez livestream sćěhować móhł. Wćipni běchu čłonojo serbskeje rady, hosćo a zjawnosć tež na wuwjedźenja wo tym, kak Delnjoserbski gymnazij (DSG) w Choćebuzu šulerjow w demokratiji kubła. Konkretnje: Na kotre wašnje su šulerjow w projekće wo wólbach serbskeje rady informowali. Wšako smědźa so na nich tež 16lětni wobdźělić. Tola k rozmołwje z direktorom šule Matthiasom Guttke dóšło njeje.
Israel bombarduje Syrisku
Damaskus (dpa/SN). Při nadpadźe israelskich lětadłow na syriske město Palmyra je po syriskich informacijach 26 ludźi žiwjenje přisadźiło. Statna powěsćernja Sana rozprawja nimo toho wo 50 zranjenych. Druhe žórła rěča samo wo 49 mortwych. Israelske wójsko njeje so tomu dotal wuprajiło. Mjez woporami su tež wojowarjo wot Irana podpěranych milicow. Israel stajnje zaso zepěranišća milicow w Syriskej nadběhuje.
Nowej komisiji přihłosowali
Brüssel (dpa/SN). Nowa komisija EU prezidentki Ursule von der Leyen budźe prawdźepodobnje 1. decembra dźěłać započinać. Zastupnicy fachowych wuběrkow Europskeho parlamenta su namjetam za wobsadźenje wodźacych politiskich zastojnstwow přihłosowali. Doskónčne wothłosowanje je drje jenož hišće formalne. Nominowanje prawicarskeho italskeho politikarja a dowěrnika madźarskeho ministerskeho prezidenta Viktora Orbana, pak zbudźa diskusije.
Ministerka na konferency
Powaleny štom je tele awto w USA dospołnje zničił. Njewšědnje ...
Spjećuja so planam VW
Debata w SPD bórze skónčena
Ukraina nowe rakety zasadźiła
Kijew (dpa/SN). Ukraina je prěni króć nowe daloko sahace rakety zapadneje produkcije přećiwo wojerskim objektam w Ruskej zasadźiła. Po informacijach instituta za wójnske studije ISW we Washingtonje su z tajkimi raketami ruske wojerske rozkaznistwo trjechili, kotrež přećiwnu ofensiwu w kónčinje Kurska nawjeduje. Po tym je ukrainske wójsko hłowny kwartěr ruskeho wójska w měsće Marijno z raketami britiskeho typa Storm Shadow nadběhowało. Widejowe nahrawanja tole pječa wobkrućeja.
Ruska je wospjet před zasadźenjom zapadnych daloko sahacych brónjow na swojim teritoriju warnowała. Moskwa wobhladuje tole jako strašnu eskalaciju. Zasadźenje tajkich kompleksnych brónjow njeje bjez aktiwneho sobuskutkowanja britiskich a ameriskich wojerskich fachowcow scyła móžne, Ruska twjerdźi.
Rakety Storm Shadow, kotrež sej z pomocu nawigaciskeho systema swój puć same pytaja, leća hač do 250 kilometrow daloko. Wone móža bunkry a infrastrukturu zničić.
