Berlin (dpa/SN). Němska rentowa zawěsćernja je skeptisce na plany nastupajo tak mjenowany generaciski kapital reagowała a chcyła móžne rizika za płaćerjow přinoškow wuzamknjene měć. Přinoški ludźi do rentoweho zawěsćenja njesměli so za generaciski kapital nałožować, žada sej prezidentka Němskeje rentoweje zawěsćernje Gundula Roßbach w Berlinje. W stejišću zawěsćernja na to skedźbni, zo wotwisuje wuwiće kapitala na bursy stajnje wot powšitkowneje situacije financnych wikow. Nimo toho njeje widźomne wolóženje pjenježneje situacije rentoweje kasy přez nowy kapital „poměrnje krótkeho časoweho horiconta dla“ wočakujomne.

Po wčera předstajenych planach dźěłoweho ministra Hubertusa Heila (SPD) a financneho ministra Christiana Lindnera (FDP) chcedźa hač do srjedź 2030tych lět nowy kapital 200 miliardow eurow natwarić. Z pjenjezami chcedźa rentowu zawěsćernju podpěrować, zo móhli rentowy niwow 48 procentow mzdy dołhodobnje zawěsćić.

Kóždeho, kotryž ma wotmysł, swoje pjenjezy za sebje „dźěłać dać“ a je do akcijoweho fondsa tyknyć chce, skedźbnja seriozny financny poradźowar na rizika, kotrež su z tym zwjazane. Čim wyšu renditu chceš měć, za ćim spekulatiwniše akcije dyrbiš so rozsudźić. To pak rěka: Maš-li njezbožo, wšitko zhubiš! Dopomnju so hišće jara žiwje na konkurs banki „Wićazec bratrow“ w lěće 2008, kotryž je globalnu hospodarsku krizu zawinował a samo staty do insolwency dowjedł. Na tajke wašnje potajkim chce naše knježerstwo naš rentowy system financować a našu rentu za přichod zawěsćić? Do wuspěcha tutoho financneho plana móžeš jenož wěrić, hdyž sy – kaž naš financny minister – wo pospochi rosćacym hospodarstwje přeswědčeny. Ja wosadźe tutych wěriwych njepřisłušam. Wěrju pak do principa solidarneje towaršnosće. Tohodla sym za jednotny rentowy system za wšitkich, tež za zastojnikow, juristow atd. W Rakuskej to tak činja – renty tam su wyše hač pola nas. Milan Pawlik

Köln (dpa/SN). Twarske a zahrodniske fachowe wobchody registruja přiběracu ličbu požadanjow z rjemjeslniskich powołanjow. „Wobkedźbujemy widźomnu žołmu přizjewjenjow rjemjeslnikow“, rjekny Franz-Peter Tepaß, rěčnik předsydstwa wikowanskeho zwjazka za domjace paslenje, twarjenje a zahrody (BHB) wčera w Kölnje. Minjenych šěsć měsacow je ličba požadanjow widźomnje rozrostła.

Tepaß ma wuwiće za pozitiwne, nic jenož pobrachowacych fachowcow dla. „Trjebamy runje tutu ekspertizu: Su to fachowcy, kotřiž móža swoju wědu derje dale posrědkować.“ Přiběraca ličba přizjewjenjow ma wjacore přičiny: Mjez druhim krizu w bydlenjotwarje kaž tež insolwency projektnych wuwiwarjow a twarskich firmow, štož wuskutkuje so negatiwnje na rjemjeslniske firmy. Nimo toho je dźěławym nad 50 lětami dale a ćešo, ćělne napinanje někotrych rjemjeslniskich powołanjow zmištrować.

Zo su twarske wiki mnohim rjemjeslnikam powołanska perspektiwa, njeje nowe. Tepaß trochuje, zo bě kóždy dźesaty přistajeny twarskich wikow něhdy moler, muler abo kładźer kachlicow.

Ćeknjenej domjacej swinjeći je wohnjowa wobora wčera w bayerskim Heroldsbergu pytała a skónčnje popadnyła. Žona bě při rańšim přechodźowanju nje­wšědnej zwěrjeći zetkała a policiju informowała. Přiwołani wobornicy swinjeći skónčnje na swjedźenišću města wuhladachu a z pomocu wobsedźerja popadnychu. Prawniske sćěhi akcija njezměje, policija zdźěla – ani za ćeknjenej swinjeći ani za wobsedźerja.

Mały gorila je so w Berlinskej coologiskej zahrodźe narodźił. Młodźo je w nocy na póndźelu na swět přišło, zwěrjenc zdźěla, runje na mjezynarodnym dnju wohroženych družin. Mać so dotal lubosćiwje wo nje stara. Tež swójba wopicow dorost w swojej srjedźiznje wćipnje wita. Najwjetša družina wopicow je wohrožena. W Africe liča hišće 300 000 gorilow z raznje woteběracej tendencu.