Twarstwo w předpisach zamurjowane
Mnichow (dpa/SN). Składnostnje wotewrjenja Mnichowskich imobilijowych wikow ExpoReal je sej šef předsydstwa bydlenskeho koncerna Vonovia, Rolf Bruch, nowu politiku nastupajo twarstwo žadał. „Smy so zamurjowali w předpisach a zakonjach“, wón rjekny, Zwjazk, kraje a komuny měli so tomu wěnować. Tež prezident zwjazka twarskeje industrije Peter Hübner kritizuje „wysoke směrnicy a nadregulowanje“, žadajo sej změnu mentality. „Twarjenje dyrbi zaso zapłaćomne być.“ Jako přikładny mjenuje wón předpisy za hrajkanišća, za škit před haru a za městna za wotstajenje awtow.
Zamołwići měli tež wobkedźbować, zo so nowe twarske maćizny poněčim přesadźa. Beton přichodnje z nowym materialom narunaja. Drjewo firmy „ekstremnych předpisow dla“ wjace rady njebjeru.
To a tamne (08.10.24)
Hłódny paduch je so do pěstowarnje w hessenskim Gernsheimje zadobył. Tam warješe nudle a pražeše sej jeja. Policija nima žane pokazki na to, zo je 24lětny muž něšto pokradnył. Skućićel bě so z woknom namócnje do twarjenja zadobył. Alarmowa připrawa informowaše policiju. Ta 24lětneho na městnje zaja. Přećiwo njemu přepytuja nětko wosebje ćežkeho padustwa dla.
Roboter-dirigent ma přichodnu njedźelu Drježdźanskich sinfonikarjow nawjedować. Projekt „Roboter.Sinfonie“ zbudźa hižo nětko wulku kedźbnosć. Mjezynarodnje zestajeny ansambl hudźbnikow načasneje hudźby nawjeduje spočatnje Magnus Loddgart z Nowergskeje. Po přestawce chce wón nawod orchestra robotarce „MAiRA Pro S“ přewostajić. Trenowali su njewšědnu dirigentku w Drježdźanskej techniskej uniwersiće.
Njespušća wulku wiziju najebać aktualne ćeže
Lubin (SN/mb). Prěni raz Domowina lětsa zastupjerjow politiki a towaršnosće Sakskeje a Braniborskeje na přijeće přeprošuje. Dobry tydźeń do spočatka adwenta chcedźa so na hrodźe w Lubinje zetkać. Město je sydło krajnoradneho zarjada wokrjesa Dubja-Błóta, kotryž je ze spěchowacym čłonom třěšneho zwjazka Serbow. Nimo wuměny nazhonjenjow a prezentacije serbskeje rěče a kultury steji wulki zaměr w srjedźišću zarjadowanja: zo budźe w lěće 2100 po cyłej Łužicy znajmjeńša sto tysac serbowacych ludźi.
Tuchwilu maja drje w Delnjej a srjedźnej Łužicy cyle hinaše problemy: docyła ludźi za gremije narodneje organizacije namakać, kotřiž serbsce móža. Kaž regionalna rěčnica Domowiny w Choćebuzu, Heike Apeltowa, našemu wječornikej praješe, je wobknježenje serbšćiny najwjetše wužadanje při namakanju kandidatow za klětuše wólby župneho předsydstwa w Delnjej Łužicy a zwjazkoweho předsydstwa na hłownej zhromadźiznje třěšneho zwjazka.
Přewozna łódź dojěła
Büsum (dpa/SN). Skóncowana helgolandska přewozna łódź „Funny Girl“ z nimale 250 pasažěrami je po hodźiny trajacej jězbje po Sewjernym morju kraj docpěła. Wlečakaj stej pasažěrsku łódź do přistawa w schleswigsko-holsteinskim Büsumje přiwjezłoj. Poprawom měješe wona hižo wčera wječor dojěć. Na łódźi pak bě milina wupadnyła. Wobaj generatoraj hižo njedźěłaštej. Na to motor wupadny, dokelž chłódźenje njefungowaše.
Muž w Šwedskej natřěleny
Kungsbacka (dpa/SN). W šwedskim nakupowanskim centrumje su muža natřělili. Policija je twarjenje w Kungsbacka ewakuowała, šwedska powěsćernja TT zdźěla. Podhladneho su zajeli. Policija přepytuje mordarstwa abo zabiwanja dla. Pozadki njeskutka njejsu znate. Šwedska bědźi so hižo dlěši čas z kriminelnymi cwólbami, kotrež mjez sobu wojuja a kiž su při tym k namocy zwólniwe.
Kirk po puću do Europy
Z pryskotawkami w ruce su posłužowarki a posłužowarjo wčera na ...
Nobelowe myto spožčene
Stockholm (dpa/SN). Nobelowe myto za medicinu dóstanjetaj lětsa Victor Ambros a Gary Ruvkun z USA za wotkryće microRNA a za jeju wusahowace dźěło na polu genetiskeho regulowanja. Tole je institut Karolinska w Stockholmje dźensa zdźělił. Myto je nimale 970 000 eurow hódne. Pjenjezy sej lawreataj dźělitaj.
Z wozjewjenjom mjenow wuznamjenjenych je tradicionalna sezona Nobelowych mytow zahajane. Jutře a srjedu wuzwola lawreatow kategorije fyzika a chemije. Štwórtk slěduje literarne Nobelowa myto. Pjatk spožča wuznamne Měroweho Nobelowe myto. Je to jeničke Nobelowe myto, kotrež njepřepodadźa w šwedskej stolicy Stockholmje, ale w norwegskej stolicy Oslu.
Caroliny móst dale torhaja
Zelenskyj wuzběhuje ofensiwy
Kijew (dpa/SN). Dwaj měsacaj po zahajenju ukrainskeje ofensiwy w ruskej kónčinje wokoło Kurska je prezident Wolodymyr Zelenskyj wuznam operacije wuzběhnył. „Je to jara wažna faza wójny, kotraž je našemu krajej jara pomhała a to tež dźensa hišće čini“, rjekny Zelenskyj w swojim wječornym widejowym poselstwje. Ukrainscy wojacy su dopokazali, zo „móža wójnu do Ruskeje njesć“.
Ukrainske jednotki běchu při njewočakowanym nadběhu přez mjezu wjetše kónčiny wokoło Kurska zdobyli. Tuchwilu kontroluja woni něhdźe 1 300 kwadratnych kilometrow. Ruske přećiwne nadběhi njeběchu dotal wuspěšne.
Zakładny zaměr ofensiwy, Rusku nuzować, wjetšu ličbu wojakow z fronty w Donbassu do Kurska přepołožić, njeje Kijew přiwšěm docpěł. Ruske jednotki w Donbassu dotal pokročuja a zdobywaja tam daše kónčiny.
Najebać to je Zelenskyj optimistiski. Wón so nadźija, zo móhł „z dosahacej podpěru“ zapadnych partnerow wojerski ćišć na Rusku dale zwyšić.
Wopory masakra wopominali
Zarjadowanja k prěnjej róčnicy krawneho nadpada Hamas na Israel
Tel Aviv/Drježdźany (dpa/SN). W Israelu su dźensa wopominanske zarjadowanja składnostnje prěnjeje róčnicy masakra islamistiskej Hamas w pomjeznej kónčinje Israela při Gazaskim pasmje zahajili. Israelski prezident Izchak Herzog je w židowskim sydlišću njedaloko městna hudźbneho festiwala Nova z mjeńšinu mjelčenja njeskutk wopominał. Tam běchu skupiny ekstremistow 7. oktobra 2023 masaker mjez wobdźělnikami skućili a mnohich do Gazy zawlekli.
Runočasnje k wopominanju je Hamas znowa spytała, Israel z raketami ze zawrjeneho Gazaskeho pasma nadběhować. Israelske wojerske lětadła pak su nadpad wotwobarali. Hižo minjenu nóc běchu israelske wojerske lětadła objekty w Gazaskim pasmje bombardowali, z kotrychž stajnje zaso Israel wobtřěleja.
W Berlinje planowachu nabožiny přesahowace zarjadowanje w Charlottenburgu. Tam wočakowachu zwjazkoweho prezidenta Franka-Waltera Steinmeiera.
