Berlin (dpa/SN). Zwjazkowy kancler Olaf Scholz (SPD) je zwjazkowej woborje a wobydlerjam Němskeje přilubił, zo je jeho „ně“ nastupajo zasadźenje němskich pozemskich wojakow w Ukrainje jasna ­mjeza, wo kotrejž hižo njediskutuje. „Zo bych to hišće raz jasnje rjekł: Jako zwjazkowy kancler Němskeje njebudu žanych wojakow zwjazkoweje wobory do Ukrainy słać“, rjekny wón wčera we widejowym poselstwje. „To płaći. Na to móža so wojacy a wojakowki spušćeć. A na to móžeće so Wy spušćeć“, wón přilubi

NATO njestanje so z wójnskej stronu, Scholz doda. „Tomu tež tak wostanje.“ Němska je sej ze swojimi zwjazkarjemi přezjedna: „Nochcemy, zo wuwiwa so wójna mjez Ruskej a Ukrainu na wójnu mjez Ruskej a NATO.“

Minjenu póndźelu njebě francoski prezident Emmanuel Macron na zetkanju 20 statnych a knježerstwowych šefow w Parisu zasadźenje wojakow w Ukrainje hižo wuzamknył. Scholz bě tole hižo dźeń po tym wotpokazał. Hižo na spočatku wójny bě němski kancler po­twjerdźił, zo njepřińdźe zasadźenje němskich wojakow w tutej wójnje za njeho do prašenja. Němska pak Ukrainu dale z brónjemi a municiju podpěruje.

Rom (dpa/SN). Bamž Franciskus je so wčera nachwilnje do chorownje podał. 87lětneho su po tydźenskej generalnej awdiency dopołdnja w chorowni přepytowali. Kaž italska powěsćernja Ansa rozprawja, móžeše so nawoda wjace hač 1,4 miliardy katolikow krótko po tym zaso do Vatikana nawróćić. Franciskus je po informacijach Vatikana před něšto dnjemi na „lochku gripu“ schorjeł. Tohodla je hižo wjacore zjawne wustupy wotprajić dał. Do wopyta chorownje Gemelli w Romje rjekny wón na generalnej awdiency: „Sym hišće tróšku nazymnjeny.“ Sobotu chce pontifeks prěni króć zwjazkoweho kanclera Olafa Scholza (SPD) na priwatnu awdiencu witać.

Strowota wobradźa bamžej, kiž je wot lěta 2013 w zastojnstwje, hižo něšto čas přiběrajcy problemy. Minjene měsacy měješe hižo wospjet problemy ze zahorjenjom pućow dychanja. Loni dyrbjachu jeho dwójce w jednej z Romskich chorownjow lěkować. Problema w kolenje dla sedźi bamž při zjawnych terminach mjeztym w kolesatym stole. Rodźeny ­Argentinjan budźe 13. měrca jědnaće lět w zastojnstwje.

Něhdźe 80 aktiwistow skupiny „Teslu zadźeržeć“ je lěs njedaloko twornje awto­twarca w Grünheide wobsadźiło, zo bychu přećiwo planowanemu rozšěrjenju zawoda protestowali. W běhu krótkeho časa natwarichu wjace hač dźesać budkow we wjerškach štomow. Demonstranća chcedźa po tutym puću wotum wobydlerjow podpěrować, kotřiž běchu so při wothłosowanju přećiwo rozšěrjenju zawoda wuprajili. Aktiwisća njewěrja, zo so Tesla na rozsud wobydlerjow dźerži.

Drastiske naprawy přećiwo ekstremnym smalerjam nałožuja wot jutřišeho w Awstriskej: Štóž w sydlišćach 80 km/h spěšnišo jědźe hač dowolene a zwonka nich 90 km/h, njezhubi jenož jězbnu dowolnosć, ale tež awto. Minjeny čas běchu stajnje zaso smalerjow lepili. Fachowcy dwěluja na prawniskim zakładźe sćazanja.