Wočakuja rozsud wo raketach
Berlin (dpa/SN). Zakitowanski fachowc CDU Roderich Kiesewetter liči z bórzomnym rozsudom nastupajo dodawanje němskich raketow typa Taurus Ukrainje. Na jutřišim zetkanju w Ramsteinje dóńdźe k rozsudam, wón nowinarjam rjekny. Tež předsyda Zelenych Omid Nouripour z tym liči, zo rakety, kotrež swój zaměr z pomocu nawigaciskeho systema same namakaja, Ukrainje bórze přewostaja. Kijew chce z raketami rusku wojersku infrastrukturu za frontu nadběhować.
Nowe rozestajenja
Tel Aviv (dpa/SN). Sta Palestinjanow su so podłu mjezy Gazaskeho pasma znowa z israelskimi wěstotnymi mocami rozestajeli. Po informacijach palestinskeho strowotniskeho ministerstwa je so šěsć wobydlerjow wuskeho pobrjóžneho pasma nad Srjedźnym morjom při tym zraniło. Israelska armeja zdźěla, zo je přećiwo „randalěrowacym“ zakročiła, kotřiž su praskotaki na wojakow mjetali. Při tym su wjacorych ludźi „trjechili“.
Hněwni na němskeho pósłanca
Planuja naprawy přećiwo migraciji
Berlin/Rom (dpa/SN). Zwjazkowa nutřkowna ministerka Nancy Faeser je plany prezidentki komisije EU zakitowała, hladajo na masiwne připućowanje migrantow wonkowne mjezy EU w Srjedźnym morju w powětře a na morju sylnišo stražować. „Njemóžemy drje ničo druheho činić“, rjekny politikarka SPD wčera wječor w sćelaku ARD. „Hewak njedóstanjemy połoženje migracije pod kontrolu.“
Zwjazkowa nutřkowna ministerka Faeser chcyše so dźensa ze swojimi kolegami w zastojnstwje ze Španiskeje, Italskeje a Francoskeje zetkać a wo połoženju w Srjedźnym morju wuradźować. Faeser rěčeše w tym zwisku wo komplikowanym połoženju na kupje Lampedusa a zdobom připowědźi, zo chcyli wšitcy wobdźěleni zhromadny plan zdźěłać. Na małej kupje w Srjedźnym morju běchu minjene dny tysacy ćěkancow dojěli. Lěhwo ćěkancow na kupje je dospołnje přepjelnjene. Zamołwići rěča wo katastrofalnych poměrach.
Wuspěch wjerška UNO wohroženy
New York (dpa/SN). Skupina krajow wokoło Ruskeje chce wjacore deklaracije blokować, kotrež chce swětowe zjednoćenstwo statow na dźensnišej generalnej debaće UNO schwalić. K tomu słuša mjez druhim tekst, z kotrymž chcedźa zaměry UNO nastupajo wudźeržliwosć potwjerdźić. Generalny sekretar UNO António Guterres bě dokument „rozsudny“ za wožiwjenje zaměrow wuwića mjenował. List su nimo Ruskeje tež Běłoruska, Boliwiska, Kuba, Sewjerna Koreja, Eritrea, Iran, Nikaragua, Syriska, Venezuela a Simbabwe podpisali. Mjenowane kraje skorža sankcijow dla, kotrež je UNO přećiwo nim wukazała a kiž jich wuwiću zeškodźa. Dokument UNO po jich měnjenju „woprawjene zajimy wulkeje ličby wuwićowych krajow ignoruje“.
Z blokadu móhł wuspěch wysokorjadnje wobsadźeneho wjerška UNO wohroženy być. Poprawom chcychu rezoluciju jednohłósnje schwalić. Z njej ma so reforma mjezynarodneje financneje struktury nastorčić, kotraž zaruča tež chudšim krajam lěpši přistup ke kreditam.
To a tamne (18.09.23)
Najlěpši šofer sněhoweho płuha Němskeje přińdźe z hornjeje Frankskeje. Při němskim mišterstwje wodźerjow sněhoweho płuha w Koblenzu je sobudźěłaćer měšćanskeho zawoda Julian Scharf z bayerskeho Marktredwitza ze swojim ko-pilotom Noahom Trögerom dobył. Wodźerjo sněhowych płuhow ze wšeje Němskeje běchu so tež cyle bjez sněha wubědźowali. Při tym dyrbjachu 450 metrow dołhu čaru wušiknosće zmištrować.
Psy su swójbnu kupjel w bayerskim Augsburgu minjeny kónc tydźenja mjeztym štwórty króć k zakónčenju lětušeje kupanskeje sezony wobsadźili a so tam do syteje wole wucychnowali. Zarjadowanje je wobsedźerjam rasowych psow a měšencow kóžde lěto wjeršk. Minjene lěta su tam wjace hač 1 100 psow zličili. Spektakl z wjacorymi zarjadowanjemi organizuje wodowa straža města.
Marko Šiman: Čas njebrojić!
Wutwar infrastruktury za wobchad, nowe dźěłowe městna, zwadny tepjenski zakoń a wjac wěstoty za kolesowarjow – tute temy su zapósłancej Markej Šimanej (CDU) tuchwilu wosebje wažne.
VW pušći ludźi w Šwikawje
Zwickau (dpa/SN). Awtotwarc Volkswagen wottwarja sta městnow w swojej tworni elektroawtow w Šwikawje. 269 časowje wobmjezowanych dźěłowych zrěčenjow, kotrež so bórze skónča, nochcedźa hižo podlěšić. Tole je předewzaće po wčerawšej zawodnej zhromadźiznje zdźěliło. Hłowna přičina je „aktualne połoženje na wikach“. Hladajo na inflaciju a woteběrace premije za nakup kupuja ludźo dale a mjenje elektroawtow. W Šwikawje twarja jenož hišće elektroawta.
Rěča wo ponowjenju kolijow
Frankfurt n. M. (dpa/SN). Nuznje trěbne ponowjenje kolijoweje syće němskeje steji w srjedźišću dźensnišeho „kolijoweho wjerška“. Wobchadny minister Volker Wissing (FDP) je zastupnikow železnicy a twarskeje industrije na Frankfurtske wiki přeprosył, zo móhł z nimi najefektiwniše postupowanje wotrěčeć. Železnica chce přichodne lěta wažne wotrězki dospołnje ponowić a je za to měsacy dołho zawrěć. Tole by wulke wobjězdki a wobšěrne změny jězbnych planow zawinowało.
Syn Bidena wobskorženy
Dobrowólni aktiwisća wobswětoškitneje organizacije „Earth Island ...
Durinsku CDU raznje kritizuja
Berlin (dpa/SN). Po z pomocu AfD wobzamknjenym zniženju dawkow w Durinskej steji CDU w srjedźišću kritiki. SPD, Zeleni a Lěwica reagowachu rozhorjeni. Opozicionelna CDU bě wčera w krajnym sejmje zniženje dawka za nakup ležownosćow přesadźiła, dokelž běchu AfD, FDP a zapósłancy bjez frakcije přihłosowali. Ministerski prezident Bodo Ramelow (Lěwica) nima ze swojej koaliciju Lěwicy, SPD a Zelenych w krajnym sejmje žanu wjetšinu a je zasadnje na sobudźěło opozicije pokazany. Dawk žadaja sej při nakupje ležownosće. Tón je w Durinskej sobu najwjetši a je nětko wot 6,5 na pjeć procentow zniženy.
Nutřkowna ministerka SPD Nancy Faeser CDU wumjetuje, zo „wohnjowu murju“ přećiwo AfD sama wotstronja. Generalny sekretar SPD Kevin Kühnert rěči wo „pakće z djabołom“. Stronska a frakciska předsydka AfD Alice Weidel porno tomu so wjeseli: „Wohnjowa murja je powalena. A to je hakle započatk.“
Nowe protesty
To a tamne (15.09.23)
Betonowy pomnik na konju jěchaceje bywšeje zwjazkoweje kanclerki Angele Merkel w Hornjej Pfalcy je so sypnył. Po ani dwěmaj lětomaj je so minjenu nóc 2,70 wysoka skulptura zwjezła, wuměłc Wilhelm Koch zdźěla. Wón bě skulpturu tehdy z pomocu ćišćaka 3 D za muzej w Etsdorfje stworił a hižo bórze zwěsćił, zo so material pod hołym njebjom njehodźi. Pomnik bě stajnje zaso diskusije wo prašenju zbudźił, hač je wón „počesćenje abo skerje wusměšowanje“.
Cyłu nóc z ruku w lifće domjaceho schodu tčał je muž w bayerskim Glattbachu. Dokelž tčeše tež nuzowy knefl w zatłusnjenej ruce, njemóžeše rentnar wo pomoc wołać. Muž bě so nawječor z lifta sunył a z ruku mjez liftom a metalowej šćěnu wisajo wostał. Hakle přichodne ranje susod muža wuhlada. Snadnje zranjeneho starca dowjezechu do chorownje
