Berlin (dpa/SN). Napjate połoženje na dźěćacych stacijach w chorownjach a wulka ličba schorjenych sobudźěłaćerjow dale a bóle cyły strowotniski system poćežujetej. „Tuchwilu dožiwjamy, zo docpěja wšitke wobłuki strowotniskeho zastaranja swoje hranicy“, wuzběhny šef předsydstwa Němskeje towaršnosće za chorownje (DKG) Gerald Gaß dźensa w nowinje „Augsburger Allgemeine“. Situaciju na dźěćacych stacijach ma Gaß samo za „dramatisku“.

Tež zasydleni lěkarjo su swoje kapacity wučerpali. Nimo toho su tohorunja w praksach mnozy přistajeni schorjeli, čehoždla su domjacy lěkarjo přidatnje poćeženi. Tuchwilu schorja ludźi nimo korony tež na gripu. RS-wiry pak su při­čina za wjele chorych dźěći.

Nimale kóždy dźesaty sobudźěłaćer w chorownjach po cyłym Zwjazku je tuchwilu chory. Šef DKG dale wopisa, zo su so zdźěla dźěći do chorownjow dowjezli, dokelž w ambulantnym lěkowanju me­dikamenty pobrachuja. „Tole su nje­dźeržomne wobstejnosće“, Gerald Gaß podšmórny. Tak sej wón žada, zo dyrbja chorownje přichodnje wjetši wuznam we wobłuku ambulantneho zastaranja dóstać.

Sakska nochce hižo wot mjezynarodnych rjećazow wotwisna być

Drježdźany (dpa/SN). Sakska chce podkopki w swojim kraju rozšěrić, z kotrychž drohotne materialije za industriju wudobywaja. Na tute wašnje chce docpěć, zo je mjenje wot mjezynarodnych dodawanskich rjećazow wotwisna. Za to je sakski kabinet minjeny tydźeń nowu strategiju nastupajo surowizny wobzamknył. Dźe wo to, zo so žórła surowiznow tudy wotkryja. Tež wobłuk recyclinga surowiznow dyrbi so polěpšić. Dale politikarjo chcedźa, zo so surowizny kaž drjewo bóle ­wužiwaja. Wědomosć a hospodarstwo dyrbjałoj bóle kooperować. Próstwy a dowolnosće měli we přichodźe digitalnje zapodawać. Na tute wašnje chcedźa dotalnu strategiju surowiznow z lěta 2012 aktualizować.

Wulke dźěle rubizny ze Zeleneho wjelba su zaso wróćo w Drježdźanach. Wyskanje je wulke, zo je so kriminalistam poradźiło je nadeńć. Pječa je „deal“ mjez statnym rěčnistwom, zakitowarjemi wobskorženych a sudnistwom tón wuslědk zmóžnił. Hórki přisłód wostanje, dokelž wulke mjelčenje nastupajo tutu naležnosć nimo toho frakciju Lěwicy w Sakskim krajnym sejmje jara rozhněwa. Pjatk je so tohodla krajny parlament z padom a ze „spodźiwnej ćichotu w statnym knježerstwje“ nastupajo rubjene preciozy zaběrał. Zo njeměli ­přewjele informacijow w zjawnosći skućićelow warnować, to přeco zaso słyšimy w krimijach w telewiziji. Parlamentow­nicy pak maja prawo na wučerpace wotmołwy knježerstwa na swoje prašenja. Wuslědk slědźerjow bu jenož krótko na to znaty. Dobra powěsć pak nima wotwjesć wot bytostnych njedostatkow a skomdźenjow, kotrež tajkej rubiznje hakle polěkowachu. Tu pak su ći w zamołwitosći, kotřiž so nětko tak jara wjesela. Axel Arlt

Podstupim (dpa/SN). Dokelž je w Braniborskej wjele wučerjow a šulerjow chorych, su wučbu na šulach wobmjezowali. Na cyłkownje 25 kubłanišćach móžachu minjeny pjatk jenož wobmjezowanu ­prezencnu wučbu podawać, zdźěli bra­niborske kubłanske ministerstwo.

W januaru je zwjazkowy kraj schodźenkowy plan wobzamknył. Tole bě w zwisku z koronapandemiju trěbne. Tak maja so we wotpowědnych schodźenkach wěste naprawy přesadźić. Wučba ma so potom na ćežišća koncentrować. Po cyłej Braniborskej je tuchwilu něhdźe 920 šulow. Hladajo na tuchwilny chorobny staw ma so w kraju po schodźenku 3 postupować. Tak so na potrjechenych ­šulach minimalna ličba hodźin podawa. Na zakładnych šulach a w sekundarnym schodźenku koncentruja so při tym na matematiku a rěče. We wyšich lětnikach je indiwidualne rjadowanje móžne.

Wot wobmjezowaneje wučby potrjechene su šulskozarjadniske wobwody Branibor nad Habolu, Neuruppin, Frankfurt nad Wódru a Choćebuz. Předewšěm w zakładnych šulach tam wjele wučerjow chorosće dla pobrachuje.