Poslednje božemje Siegfriedej Albertej
To a tamne (16.07.21)
W kurioznym dispuće z wobydlerjemi Heidelberga, kotřiž prawidłownje na campingowych stólcach před domom sydaja, je komunalny porjadowy zarjad swój dotalny kurs změnił. Wotnětka chcedźa jenož hišće zapřimnyć, je-li wěstota wohrožena, na přikład při zatykanych wuchowanskich hasach, město informuje. Heidelbergčenjo zetkawaja so předewšěm pjatk wječor na chódnikach před domami, zo bychu zhromadnje wino pili a bachtali. Město pak nochce, zo wuwiwa so tam „atmosfera piwoweje zahrody“.
Psa z třěchi wuchowała je wohnjowa wobora w Drježdźanach. Swědcy běchu žałosćaceho psa wuhladali a woboru wołali. Prawdźepodobnje bě tón přez třěšne wokno na třěchu zalězł. Kameradojo móžachu jeho z pomocu wjerćateho rěbla z pjeć metrow wysokosće wuchować a njezranjeneho wobsedźerjej přepodać.
Merkel wopyta Bidena
Washington (dpa/SN). Zwjazkowa kanclerka Angela Merkel (CDU) je do stolicy USA Washingtona dolećała. Tam chcyše ju prezident Joe Biden w běhu dnja witać. Wopyt ma tomu słužić, tradicionalne dobre poćahi mjez USA a Němskej po krizy w času Bidenoweho předchadnika Donalda Trumpa zaso wožiwić. Je to posledni wopyt Merkel w jeje zastojnstwje. Dźeń ma ze zhromadnej wječerju wuklinčeć, štož je wosebita protokolariska česć.
Zakaz rubiška wobkrućeny
Luxemburg (dpa/SN). Europske sudnistwo je prawa dźěłodawarjow skrućiło, muslimskim sobudźěłaćerkam zakazać rubiško nosyć. Zakaz wužiwanja widźomneho wuraza politiskeho abo nabožneho wuznawanja móhł woprawnjeny być, chcył-li dźěłodawar kupcam neutralny wobraz skićić abo socialnym konfliktam zadźěwać, kaž sudnistwo dźensa rozsudźi. Pozadk stej dwaj padaj w Němskej, při kotrymž běštej sobudźěłaćerka pěstowarnje a předawarka w drogeriji přećiwo zakazej wužiwanja rubiška na dźěłowym městnje skoržiłoj.
Tysacy demonstrantow zajeli
Njezbožowny to wokomik na wčerawšej wojerskej paradźe w Parisu, ...
Tójšto ludźi zhubjenych
Koblenz (dpa/SN). Po wulkich zliwkach a zapławjenjach je so w eifelskej wsy Schuld šěsć chěžow sypnyło. Po zdźělenju dpa tam tuchwilu za něhdźe sydomdźesat ludźimi pytaja. Dalšich 25 twarjenjow je njestabilnych; hrozy strach, zo so tohorunja zwjezu. Połoženje je po informacijach rěčnika policije njepřewidne. W eifelskim wokrjesu Bitburg-Prüm je situacija wulkeje wody jara strašna.
Sylne zliwki su tež w dźělach Sewjerorynsko-Westfalskeje zapławjenja zawinowali. Tam staj při wuchowanju ludźi dwaj wohnjowej wobornikaj žiwjenje přisadźiłoj. Jednoho z njeju bě woda rěki sobu torhnyła, a wón so zatepi. Druhi poćerpje infarkt. Dźensa chcyše ministerski prezident Sewjerorynsko-Westfalskeje Armin Laschet (CDU) kónčinu wopytać.
Maas na UNO- posedźenju
Planuja dalšu akciju při lětanišću
Lipsk (dpa/SN). Po blokadźe lětanišća Lipsk/Halle minjeny kónc tydźenja chcedźa klimowi aktiwisća znowa přećiwo planowanemu rozšěrjenju airporta a přećiwo postupowanju policije demonstrować. Planowana je demonstracija jutře popołdnju, kaž skupina wčera zdźěli. W namołwje rěka, zo chcedźa na akciji tež swoju solidaritu z tymi aktiwistami zwuraznić, kotřiž su wot „přehnatych represijow“ potrjecheni.
W nocy na minjenu sobotu bě něhdźe 50 aktiwistow iniciatiwy „CancelLEJ“ přijězd k logistiskemu centrumej předewzaća DHL zašlahało. Demonstranća žadachu sej kónc wutwara nakładneho centruma, zakaz nócnych lětow a změnu wobchadneje politiki. Mnozy dyrbjachu nóc na policajskej straži přetrać a kritizowachu hrube zadźerženje policije. Ta njeje so k tomu dotal wuprajiła.
DHL chce swój nakładny centrum wutwarić a městna lětadłow wot nětko 60 na sto rozšěrić. To by ličbu wotlětow a přizemjenjow wosebje w nocy powjetšiło a wobydlerjow hišće bóle poćežowało.
Naslědnicy-šefojo pytani
Rjemjeslniske komory skedźbnjeja na dźeń a staršich mějićelow zawodow
Lipsk (dpa/SN). Woni twarja cyłe domy, staraja so wo zatykane roły, kładu milinowody abo třihaja włosy. Rjemjeslnicy w Sakskej maja wjele dźěła, ale su nadpřerěznje stari, znajmjeńša mějićeljo zawodow. „Mnozy běchu so po znowazjednoćenju w 1990tych lětach zesamostatnili a su nětko w starobje, zo chcyli swój zawod přepodać“, praji jednaćel Lipšćanskeje rjemjeslniskeje komory Volker Lux. Samo w mnohich wuspěšnych předewzaćach njeje lochko naslědnika namakać.
To a tamne (15.07.21)
Z psyčej genetiskej datowej banku chcedźa w israelskej metropoli Tel Avivje přichodnje tych zwěsćić, kotřiž psyče howna ležo wostajeja. Wukaz měšćanskeho zarjadnistwa postaja, zo maja wobsedźerjo při přizjewjenju psa abo při kóždolětnym ponowjenju psyčeho wupokaza genetiski material zwěrjeća wotedać. Daty budu centralnje składowane. Kontrolerojo města dyrbja potom jenož hišće probu howna brać. Něhdźe 500 kilow psyčich hownow měsačnje na zjawnych městnach ležo wostawa.
Z wjace hač tysac eurami w ruce je třilětny w Essenje słódkosće nakupować spytał. Pěšk bě pjeracha z łóncom pjenjez wobkedźbował. Přiwołanym policistam pachołk rjekny, zo je pjenjezy spjacemu nanej ze zaka wućahnył. Jako woni hólčka doma wotedachu, nan přeco hišće spaše. Słódkosće wězo žane njesydachu.
Pilnje na dobro cyrkwje a serbskich wosadow dźěłał
7. julija bu něhdyši Serbski superintendent Siegfried Albert po połlětnym ćežkim schorjenju na Božu prawdu wotwołany. Po wotchadźe Gerharda Wirtha na wuměnk bu wón 1979 za Serbskeho superintendenta powołany, spočatnje komisarisce, wot lěta 1983 doskónčnje. Wot spočatka sem je tele zastojnstwo z wulkej swěrnosću wukonjał. Rjadowaše dźěło konwenta serbskich duchownych a Serbskeho wosadneho zwjazka, kotryž je synodalne zastupnistwo serbskich wosadow. Po wotchadźe Cyrila Pjecha z Riesy do Berlina přewza wón redaktorstwo serbskeho ewangelskeho měsačnika Pomhaj Bóh, za kotryž napisa njeličomne rozpominanja, nastawki a přispomnjenčka. W lěće 1988 dowolichu jako płód rozmołwow ewangelskeje a katolskeje cyrkwje z Domowinu cyrkwinske wusyłanja w Serbskim rozhłosu. 30. oktobra 1988 prědowaše wón w prěnim nabožnym wusyłanju po žołmach rozhłosa.
