Bamž za Kolumbisku so modlił
Rom (dpa/SN). Bamž Franziskus je na Božej mši swjatki njedźelu wěriwych namołwjał, zo njebychu so jeničce na swoju wukonitosć koncentrowali. Jenož tón, kiž so Bohu dowěrja, namaka puć k sebi, rjekny 84lětna hłowa katolskeje cyrkwje w Pětrowej katedrali w Romje. To płaći tež za cyrkej. Poradźić pak móže so to jenož, hdyž nima čłowjek swoje projekty, struktury a reformowe plany za to najwažniše.
Franciskus swjećeše Božu mšu při hłownym wołtarju Pětroweje cyrkwje. Tohodla móžeše wjace wěriwych pódla być. Sta wěriwych sedźeše zhromadnje z kardinalemi na ławkach a stólcach wokoło wołtarja. Za čas koronapandemije běchu do toho Bože słužby w zadnim dźělu katedrale z tójšto mjenje wěriwymi swjećili. Při tradicionalnym připołdnišim modlenju před putnikami a wěriwymi modleše so bamž mjez druhim za ludźi w Kolumbiskej. Połoženje w južnoameriskim kraju, w kotrymž dochadźa hižo tydźenje dołho k protestam, jeho jara starosći. Bamž namołwješe, zahajić dialog a naprawy na dobro wobydlerjow.
Brüssel chłosta Běłorusku
Ruska žada sej „strózby“ posudk wunućeneho přizemjenja lětadła
Brüssel/Moskwa (dpa/SN). Jako wotmołwu na wunućene přizemjenje pasažěrskeho lětadła w Minsku je Europska unija běłoruskim lětarskim předewzaćam zakazała, europski powětrowy rum a europske lětanišća wužiwać. To je dźěl sankcijow, na kotrež je so 27 čłonskich statow EU minjenu nóc dojednało. „Wusud bě jednohłósny, bě to nadpad na demokratiju, na swobodu měnjenja a na europsku suwerenitu“, rjekny prezidentka komisije EU Ursula von der Leyen. „Tute njesłyšane zadźerženje žada sej sylnu wotmołwu z našeje strony.“
Běłoruska bě njedźelu lětadło předewzaća Ryanair po puću z Grjekskeje do Litawskeje w Minsku přizemić nuzowała, pječa hroženja z bombu dla. W mašinje bě běłoruski opozicionalny Roman Protasewič, kotrehož w Minsku zajachu. Na to smědźeše mašina dale do Vilniusa lećeć. Protasewič je mjeztym w přepytowanskej jatbje. Běłoruska jemu wumjetuje, zo je demonstracije přećiwo mócnarjej Aleksanderej Lukašenkej z wukraja sobu organizował.
Přećiwo wutłóčenju demonstrowali
Za tarifowe zrěčenja
Podstupim (dpa/SN). Hladajo na prěnje wotewrjenja w turistiskej branši a w gastronomiji k swjatkam žada sej Němski zwjazk dźěłarnistwow (DGB) w Berlinje a Braniborskej do přichoda sahace tarifowe zrěčenja za přistajenych tohole wobłuka. „Zawody, kotrež so ze swojimi wikowanskimi modelemi přewažnje na niske mzdy a prekerne dźěłowe wuměnjenja zepěraja, njeskića swojim přistajenym žanu spušćomnu perspektiwu do přichoda“, rjekny předsyda Berlinsko-braniborskeho wobłuka DGB Christian Hoßbach w Podstupimje.
Aktualne połoženje přistajenych w koronakrizy njesměli prosće ignorować. Pandemija je cyle jasnje pokazała, zo dyrbitej so turizm a gastronomija dale wuwić. Socialne zawěsćenje škita přistajenych před socialnym wotstupom. „To rěka: tarifowe zrěčenja, socialne zawěsćenje a sobupostajowanje město niskeje mzdy a dźěła na bazy 450 eurow“, Hoßbach podšmórny. Wotewrjenje hosćencow w Berlinje a Braniborskej dyrbjało nuznje z diskusiju wo přichodźe branše zwjazane być. K swjatkam je tójšto hosćencow zaso wotewrěć směło.
To a tamne (25.05.21)
Elektriski kolesaty stoł pokradnyłoj staj mužej w Montabauru w Čornym lěsu, zo byštaj sej z nim wulećałoj. Policisća wopiteho 35lětneho a sobujěduceho na dróze w měsće wuhladachu. Jako jeju zadźeržachu, sobujěducy ćekny. Test wunjese 1,5 promilow alkohola pola šofera. Jězbnu dowolnosć muža hnydom sćazachu. Wobaj běštaj kolesaty stoł wowce znateho pokradnyłoj.
Škodu něhdźe 300 000 eurow je 80lětny šofer wosoboweho awta w myjerni awtow načinił. Jako awto hižo na běžitym pasu myjernje steješe, stupi muž mylnje na płunowy pedal. Elektroawto starca tak dwě před nim stejacej dosć drohej awće po cyłej myjerni suwaše, policija zdźěli. Wšě tři awta su dospołnje skóncowane. Jenož přez wulke zbožo njeje so žadyn z blisko stejacych sobudźěłaćerjow zranił. Šofer prědnjeho awta so snadnje zrani.
Wjace stołpow za nabiwanje
Berlin (dpa/SN). Z wutwarom syće stołpow za spěšne nabiwanje baterijow elektroawtow chce Němska wjace ludźi pohnuć sej e-awto kupić. Zwjazkowy sejm je wčera wobzamknył, hač do lěta 2022 tysac přidatnych stołpow nastajić, kotrež maja wukonitosć wjace hač 150 kilowattow. Runje při dlěšich jězbach je to rozsudny faktor. Awtomobilowy zwjazk VDIK wita rozsud jako „wažny měznik. Tak budu tež dlěše jězby móžne.“
Razniše chłostanja za falšowanje
Berlin (dpa/SN). Najebać koronapandemiju njetrjebaja šěsć- do 16lětne dźěći přichodnje w mnohich padach hižo nahubniki FFP2 nosyć. Zwjazkowy sejm je wčera wotpowědny zawjazk ze zakonja wo škiće před infekcijemi šmórnył. Tak přichodnje jednory operaciski nahubnik za dźěći w busach, železnicy a pola frizera dosaha. Nimo toho wobzamknychu razniše chłostanja za falšowanje šćěpjenskich wupokazow. Tu hrozy přichodnje jastwo hač do jednoho lěta.
Bórze bjez nahubnika
Na zarjadowanju před Braniborskimi wrotami w Berlinje su ...
Witaja přiměr w Gazaskim pasmje
New York (dpa/SN). Generalny sekretar UNO António Guterres wita přiměr mjez Israelom a militantnymi Palestinjanami w Gazaskim pasmje. Wšitke wobdźělene strony wón namołwja so na dojednanje dźeržeć, kaž wčera wječor w New Yorku rjekny. Nětko dźe wo spěšny nowonatwar a wo to, zahajić chutne rozmołwy, nawoda UNO wuzběhny. Zjednoćene narody chcyli Israel a Palestinjanow při tym podpěrać. Israelčenjo a Palestinjenjo běchu so po namjeće Egyptowskeje na přiměr dojednali, kotryž płaći wot dźensnišeho ranja w 2 hodź.
Prezident USA Joe Biden ma přiměr mjez Israelom a militantnymi Palestinjanami za „woprawdźitu šansu“, na Bliskim wuchodźe rozrisanje na dobro trajneho měra namakać. USA su zwólniwe palestinski awtonomijowy zarjad z humanitarnej pomocu za nowonatwar podpěrać, podšmórny Biden we Washingtonje.
