Problem nješćěpjenych
To a tamne (04.02.21)
Zwada mjez porikom direktnje před policajskej stražu w Kulmbachu je so za muža w jastwje skónčiła. 30lětny bě so chětro wótře ze swojej přećelku wurěčował. Jako zastojnicy „hamtsce derje znaty“ porik přepruwowachu, so wukopa, zo bě samsny dźeń wukaz zajeća přećiwo mužej dóšoł. Woni jeho zajachu a do jastwa dowjezechu. „Zo policija jeho problemy na te wašnje rozrisa, z tym drje muž ličił njebě“, w zdźělence zastojnikow rěka.
Serum přećiwo koronawirusej preč ćisnyć dyrbjeli su w jendźelskim Rotherhamje. Sobudźěłaćerjo labora běchu zwěsćili, zo njebě specielny chłódźak, w kotrymž šćěpiwo ležeše, přez nóc z milinu zastarany. Tuž dyrbjachu 450 dozow šćěpiwa firmy Biontech/Pfizer wotstronić. Preparat trjeba zymnotu minus 70 stopnjow celsija, zo by so wjacore dny dźeržał.
Sćelaki opozicije zakazał
Kijew (dpa/SN). Z dotal njesłyšanym wukazom je ukrainski prezident Wolodimir Zelenskij tři opoziciske powěsćowe sćelaki zakazać dał. Potrjechenym sćelakam ZIK, NewsOne a 112 sćazaja na pjeć lět licency, frekwency a konta, kaž prezidialny běrow w Kijewje zdźěli. Zakaz wopodstatnjeja z pozdatnym wohroženjom narodneje wěstoty a ze šěrjenjom ruskeje propagandy. Sćelakam je to „wotličenje z njelubymi medijemi“. Ukraina bě nastupajo swobodu medijow dotal liberalna.
Draghi k prezidentej skazany
Rom (dpa/SN). Po zwrěšćenju rozmołwow, wutworić nowe knježerstwo, žada sej italski statny prezident Sergio Mattarella, powołać knježerstwo narodneje jednoty. Za to je sej wón dźensa bywšeho šefa Europskeje centralneje banki Marija Draghija skazał. Tón móhł knježerstwo fachowcow wutworić, kotrež kraj přichodne tydźenje a měsacy wuspěšnje přez koronakrizu wjedźe.
Na pomoc do Portugalskeje
Při ćežkim wobchadnym njezbožu w Berlinje staj wčera wječor ...
Čěska zawěra pólnu chorownju
Praha (dpa/SN). Za čas druheje žołmy koronawirusa loni nazymu bě čěske wójsko na terenje Praskich wikow wulku pólnu chorownju z 500 łožemi natwariło. Nětko wšitko zaso wottwarja, bjez toho zo su ju hdy wužiwali. To je čěski minister za strowotnistwo Jan Blatný w Praze připowědźił. Wot wšeho spočatka njebě jasne, zwotkel měli personal brać, zo móhli pacientow zastarać. Kritikarjo na to skedźbnichu, zo bychu ludźo na druhich městnach pobrachowali. Jeničce za podruž je čěski stat dotal něhdźe dwaj milionaj eurow wobsedźerjej wikoweho areala płaćił. Podobnu nuzowu chorownju w druhim najwjetšim měsće Brnje chcedźa přichodnje jako šćěpjenski centrum wužiwać.
Protesty přećiwo wobmjezowanjam koronawirusa dla mjeztym přiběraja. Před sydłom knježerstwa w Praze je so minjeny kónc tydźenja něhdźe połsta ludźi z transparentami kaž „Dźěći wróćo do šule“, zhromadźiło, powěsćernja ČTK rozprawja. Na historiskim Karlowym mosće, hdźež njesmědźa awta poprawom jězdźić, stejachu wjacore jězdźidła z pokiwami na internetne protestne strony.
Za klimowy fonds
Wobmjezowanja zběhnyć abo nic?
Drježdźany/Berlin (dpa/SN). Sakska wo tym rozmysluje, wobmjezowanja koronawirusa dla po 15. februaru krok po kroku zběhnyć. Při tym dźe wo to, šule a pěstowarnje runje tak kaž frizerske salony poněčim zaso wotewrěć, rjekny zastupowacy ministerski prezident Martin Dulig (SPD) po posedźenju krajneho knježerstwa w Drježdźanach.
Zwjazkowa kanclerka Angela Merkel (CDU) porno tomu wolóženja aktualnych wobmjezowanjow swobodneho pohibowanja wotpokazuje. Wona wšitkich ludźi prosy „hišće chwilu přetrać“, kaž rjekny wčera wječor w telewiziji ARD. Wuwiće ličby infekcijow je drje pozitiwne, z cyłoněmskej incidencu snadnje pod sto pak nimaja strowotniske zarjady přeco hišće dospołnu kontrolu nad wirusom. Na tym měli dale dźěłać, kanclerka podšmórny.
To a tamne (03.02.21)
Swoju škitnu funkciju dopokazał je nahubnik – byrnjež hinak hač myslene. 63lětna šafnerka bě w ćahu w Hessenskej pućowaceho kontrolowała. Muž jej jězbny lisćik skrótka pokaza, nochcyše pak jón jej dać. Jako sej žona lisćik hrabny, jej pasažěr do ruki kusny. Bě pak zabył, zo ma nahubnik před hubu. To šafnerku před zranjenjemi škitaše. Na dwórnišću muž twochny.
Z parodistiskim přizjewjenjom jako móžny organizator Olympiskich lětnich hrow 2032 je finska gmejna Salla na samym sewjeru kraja kedźbnosć zbudźiła. „Hač do toho budźetej sněh a lód zhubjenej a wubědźowanja kaž płuwanje, nurjenje a bičwolejbul budu móžne“, w ironiskim wideju rěka. Zamołwići gmejny, kotraž słuša k najzymnišim blečkam kraja, chcedźa po tymle puću na přiběracu změnu klimy skedźbnić.
Winowatosć nahubnikow w USA
Washington (dpa/SN). W boju přećiwo rozpřestrěću koronawirusa dyrbja ludźo w USA wot dźensnišeho po cyłym kraju w zjawnych wobchadnych srědkach nahubniki wužiwać. Wotpowědny wukaz bě nowy ameriski prezident Joe Biden krótko po zapokazanju do zastojnstwa 20. januara podpisał. Biden bě bój přećiwo pandemiji za jedyn ze swojich najwažnišich nutřkopolitiskich zaměrow deklarował. USA su wosebje potrjechene.
Awstriska naprawy zběhnje
Wien (dpa/SN). Pod ćišćom hospodarstwa a tójšto wobydlerjow chce Awstriska po šěsć tydźenjach kruteho lockdowna koronapandemije dla wot 8. februara zaso wšitke wobchody wotewrěć, ale pod přiwótřenymi předpisami. Tak dyrbja ludźo nahubniki typa FFP2 wužiwać. Nimo toho ličbu kupcow wobmjezuja. Tež frizerojo smědźa zaso dźěłać. Ludźo pak dyrbja negatiwny test korony předpołožić. Šule budu tohorunja zaso wotewrjene a wučba w změnach podawana.
Biden hrozy nowym mócnarjam
