Křidło CDU: Symbolowa politika
Berlin (dpa/SN). Hospodarske křidło frakcije CDU/CSU w zwjazkowym sejmje před tym warnuje, ludźom w zwisku z planowanym kóncom zmilinjenja brunicy wulke pjenježne poćežowanja nabrěmjenić. „Wobsteji podhlad, zo jedna so tule wo hospodarskopolitisce drohu klimapolitisku symbolowu politiku“, rjekny hospodarskopolitiski rěčnik Joachim Pfeiffer (CDU) powěsćerni dpa.
Wot knježerstwa zasadźena wuhlowa komisija bě minjeny kónc tydźenja koncept skónčenja zmilinjenja brunicy najpozdźišo hač do lěta 2038 předpołožiła. Němska klimu „ze stajnje nowymi samowólnymi naprawami“ njewuchowa. To je jenož na europskej a globalnej runinje móžno, awtorojo pisaja.
„Hižo nětko dyrbja domjacnosće a zawody w Němskej najwyše płaćizny miliny po wšej Europje znjesć. Najebać to maja ludźo z dale přiběracymi płaćiznami ličić, dyrbjeli-li so poručenja komisije zwoprawdźić“, rěka w zdźělence.
Wjele njezbožow
To a tamne (29.01.19)
Dlěje hač měsac po hodźoch su wohnjowu woboru w Kasselu k palacemu hodownemu štomej wołali. Tón bě w bydlenju „podobnje rozbuchnjenju“ nadobo w płomjenjach stał. Wobydlerjej so runje tak na terasu wuchowaštaj. Starši porik bě hišće prawe swěčki na štomje wužiwał. Z pomocu susodow su woheń z bowami wody zhašeli, prjedy hač wobornicy přijědźechu. Bydlenska stwa pak njeje hižo wužiwajomna.
Chrobły paduch je w Francoskej playstation na wahu za zeleninu połožił a za nju 9,29 město 340 eurow zapłaćił. 19lětny bě do toho etiket wuměnił a kasu za samopłaćenje wužiwał. Trik samo fungowaše. Jako paduch to w dalšej kupnicy hišće raz pospyta, jeho lepichu. Sudnistwo zasudźi jeho na pruwowanski čas.
Wuslědk chwaleny a šwikany
Po wozjewjenju kónčneje rozprawy wuhloweje komisije
Drježdźany (dpa/SN/MkWj). Sakski ministerski prezident Michael Kretschmer (CDU) ma wuslědki wuradźowanja wuhloweje komisije za šansu Sakskej. 40 miliardow eurow za tři brunicowe rewěry, to je hoberska suma. „Jako Sakska njebychmy móžnosć měli, Łužicu a srjedźoněmski rewěr w tym rozměrje wuwiwać. Zo móžemy to nětko činić, je wulki wuspěch.“ Pjenjezy maja so mjez druhim za wutwar dróhow, železniskich čarow a za zasydlenje slědźenskich institucijow zasadźić.
Tak mjenowana wuhlowa komisija bě so na to dojednała, zmilinjenje wuhla hač do lěta 2038 we wjacorych krokach skónčić. Wuhlowe kraje Sewjerorynsko-Westfalska, Braniborska, Saksko-Anhaltska a Sakska maja wot Zwjazka w běhu dwaceći lět cyłkownje 40 miliardow eurow dóstać, zo bychu kónc wudobywanja brunicy strukturnje zmištrować móhli. W prawidłownych wotstawkach chcedźa proces pruwować. Doskónčnje rozsudźić a wotpowědny plan zdźěłać ma nětko němske zwjazkowe knježerstwo.
Čłowječe kosće našli
Rom (B/SN). Namakane čłowječe kosće na teritoriju Vatikana staraja so wo spekulacije. Před 35 lětami bě so tehdy 15lětna Emanuela Orlando zhubiła. Wot dźowki přistajeneho Vatikana njeje wot toho časa ani slěda. Tuž je wokoło tohole pada wjele tukanjow, kaž anonymne telefonaty, mafija a komploty wuchodneje tajneje słužby přećiwo bamžej Janej Pawołej II. Hač so při namakanych kosćach wo Emanuelu Orlando jedna, njeje dotal jasne.
Zakituje wučbu nabožiny
Berlin (B/SN). Berlinski arcybiskop Heiner Koch je konfesionelnu nabožinsku wučbu zakitował. Předmjet pomha šulerjam, namakać „swójske stejišćo“ k swojej nabožinje, rjekny Koch w telewiziji ZDF. Konfesionelna wučba je lěpša hač nabožinskowučbny předmjet a je wuměnjenje za mjezsobnosć z druhimi nabožiami.
Zmužitosć k měrnosći měć
Něhdźe 60 wobydlerjow je so wčera na dnju wopominanja woporow ...
Wjele mortwych w błóće
Brumadinho (dpa/SN). Najebać woteběracu nadźiju pomocnicy dale pytaja: Po sypnjenju nasypa hoberskeho bazenka podkopkow železneje rudy w Brazilskej je ličba namakanych smjertnych woporow na 58 přiběrała. Na wšě 305 dalšich ludźi je hišće zhubjenych, čehoždla drje ličba mortwych dale rozrosće. Nasyp bazenka brazilskeho hórniskeho koncerna Vale bě so minjeny pjatk zwjezł. Na to je lawina błóta dźěl zawoda a susodne sydlišćo zapławiła.
Přežiwjeneho namakali
Amsterdam (dpa/SN). Dźesać hodźin po ćežkim rozbuchnjenju płuna w nižozemskim Den Haagu su minjenu nóc přežiwjeneho z rozwalinow bydlenskeho domu wućahnyli. 28lětneho móžachu wuchować, po tym to běchu kran zasadźili a jeho pod rozpadankami ležo namakali. Prawdźepodobnje bě płun rozbuchnył a dźěle domu zničił. Cyłkownje dwanaće wobydlerjow so zrani. Wosom z nich dyrbjachu do chorownje dowjezć.
Wopitych šoferow zwěsćili
Koncept na dobro wuchoda
Wjele wojakow psychisce chorych
To a tamne (28.01.19)
Krótka jězba z awtom změje za 18lětneho w delnjej Frankskej chutne sćěhi: Wón bě sej w Bad Neustadće nad Solawu cuzy wóz hrabnył, zo by – kaž sam rjekny – spěšnišo domoj a na nuziku był. Awto 34lětneje steješe ze zapinjenym motorom při puću. Žona informowaše policiju, po tym zo bě awto preč. Młodźenc krótko na to z nim zaso wróćo přijědźe a powědaše policiji, zo dyrbješe nuznje na pjaty róžk. Přiwšěm dyrbi so nětko zamołwić, dokelž bě awto wzał a połdra kilometra hač domoj bjez jězbneje dowolnosće jěł.
Z klěšćemi dyrbješe zwjazkowa policija muža z ćahoweho wotdźěla wuswobodźić. 48lětny bě na jězbje z Züricha do Hamburga wotdźěl za šěsć ludźi z kolesowym zamkom wotnutřka zamknył, dokelž so paduchow boješe, a lehny so spać. W Hamburgu pak zamk hižo njefungowaše. Tak dyrbjachu zastojnicy pomhać.
