Tokio (dpa/SN). Štyri lěta po atomowej katastrofje w Fukushimje započina ­Japanska najebać protesty z ludnosće ­zaso z jednym jadrowym reaktorom dźěłać. Koncern Kyushu Electric Power dźensa připowědźi, zo w jadrowej milinarni Sendai na juhozapadźe kraja jutře w prěnim bloku milinarnje reaktor ­zapinu. Hač do poslednjeho wokomika su wobydlerjo spytali, před sudnistwom tomu zadźěwać. Po katastrofje w Fuku­shimje hižo žadyn z 48 reaktorow kraja njedźěła. Prawo-konserwatiwne knježerstwo kraja pak chce na kóždy pad zaso ­jadrowu milinu produkować a wužiwać. Tak je so nětko přećiwo žadanjam ludnosće přesadźiło. Po naprašowanjach ­wobydlerjow Japanskeje wupraja so ­wjetšina přećiwo tomu, so k jadrowej ­milinje wróćić.

Berlin (dpa/SN). Wobchadni politikarjo žadaja stronske mjezy přesahujo mawt tež za busy, wosebje za dalnočarowe, kotrež su sylna konkurenca železnicy. Po zawjedźenju mawty za nakładne awta njesměli busy jeničke jězdźidła być, kotrež mawt njepłaća, měni bayerski wobchadny minister Joachim Herrmann (CSU). Zwjazkowy wobchadny minister Alexander Dobrindt (CSU) pak po wšěm zdaću žane plany k zawjedźenju mawty za dalnočarowe busy nima. Zwjazk němskich busowych předewzaćelow kóždežkuli žadanje za mawtu wotpokazuje.

Podstupim (SN/JK). Braniborscy přećiwnicy masoweho plahowanja skotu njepopušća. Po tym zo je ludowa iniciatiwa před Braniborskim krajnym sejmom zwrěšćiła, chcedźa nětko z pomocu ludoweho požadanja swoje zaměry přesadźić. Zwjazk agrarna změna přećiwo masowemu plahowanju skotu w Braniborskej a Berlinje je ludowe požadanje srjedź julija zahajił.

Za ludowu iniciatiwu trěbnych 20 000 podpismow su iniciatorojo spěšnje nazběrali, cyłkownje bě so 34 000 ludźi za iniciatiwu wuprajiło. Jeničce frakcija Zelenych w krajnym sejmje je za iniciatiwu hłosowała, z čimž sejm iniciatiwu wotpokaza. Nětko přewjedu tuž ludowe požadanje. Za jeho wuspěch trjebaja 80 000 podpismow, a te maja so zběrać na zarjadach, přetož na puću hromadźene podpisma braniborski zakoń njepřipóznawa. Za hromadźenje podpismow ma zwjazk poł lěta chwile.

Janšojce (SN/JK). We wobłuku 5. łužiskeho klimoweho campa su škitarjo wobswěta a přećiwnicy zmilinjenja brunicy sobotu swój protest a žadanja na markantne wašnje před Janšojskej milinarnju zwuraznili. Protest měješe zjawnosć skedźbnić na palace problemy zmilinjenja brunicy. Hižo pjatk su z blokadu zachoda dźěłarnistwa BCE w Choćebuzu dźěłarnistwo namołwili, sobu zamołwitosć přewzać za strukturnu reformu.

Po studiji Stuttgartskeje uniwersity z lěta 2013 wustorkuje milinarnja koncerna Vattenfall telko drobnopróška, dusykowych oksidow, žiweho slěbra a dalšich škódnych maćiznow do powětra, zo so tak lětnje 4 000 lět žiwjenja niči. Statistisce woznamjenja to 373 dočasnych wumrěćow. „Z Janšojskej milinarnju wostanje najwjetši wustorkowar škódnych maćiznow na syći, a Němska dale a wjace miliny z brunicy do wukraja eksportuje. Je-li škit klimy za Vattenfall wjac hač jenož wuprajenje, měli tutu milinarnju skónčnje ze syće wzać a hasnyć“, žadaše sej Marvin Kracheel, zastupjer klimoweho campa.