Istanbul (dpa/SN). Njeznaći wobrónjeni su na ameriski konsulat w Istanbulu třěleli. Při nadpadźe njebu nichtó zranjeny, kaž sćelakaj CNN-türk a NTV wozjewištej. Nadpadnicy, mužej a žona, su ćeknyli. Policija je bjezposrědnje po tym započała za nimi pytać.
W nocy sta so policajska straža w turkowskej metropoli z woporom bomboweho atentata. Při tym so dźesać wosobow zrani, mjez nimi třo policisća. Bomba bě w awće schowana a rozbuchny w měšćanskim dźělu Sultanbeyli. Hačrunjež běchu wěstotne naprawy zesylnjene, bu na policajsku stražu w rańšich hodźinach třělane. K njeskutkej so dotal hišće nichtó wuznał njeje, tuka pak so na aktiwistow zakazaneje kurdiskeje strony PKK, wšako su tući w zašłosći wjacore tajke nadpady skućili.
Zo nastupajo politiku napřećo Grjekskej wšitcy zapósłancy unije w sejmje za jedyn postronk njećahnu, načinja hłowam CDU wulke mjerzanje.
Berlin (dpa/SN/K). Šef frakcije unije Volker Kauder (CDU) je zapósłancam, kotřiž so zboka stupaja, z konsekwencami hrozył. Na přikład móhło być, zo jich we wuběrkach ze „swěrnymi“ ludźimi wuměnja. Nowinje Welt bě Kauder rjekł: „Ći, kiž su z ,ně‘ hłosowali, njemóža wostać we wuběrkach, w kotrychž na tym zaleži, wobchować wjetšinu, kaž w budgetowym abo europskim wuběrku.“
Ze swojim hroženjom, wotchilerjow wurisać, je wšak sej Kauder skerje do črjópka stupił, přetož zbudźił je žołmu rozhorjenosće. Raznu kritiku žněje wón wot předsydy srjedźostawskeho parlamentneho kruha unije Christiana von Stettena (CDU) a předsydy srjedźostawskeho zjednoćenstwa CSU Hansa Michelbacha. Von Stetten, kiž přisłuša financnemu wuběrkej, zwurazni, zo Kauderowemu hroženju njerozumi. „Sym swobodnje woleny zapósłanc a nikomu njedowolam, zo wukonja w tajkej wažnej naležnosći na mnje ćišć. Nimo toho je mi tajke hroženje dospołnje smorže, wón přispomni.
Podstupim (SN/JK). Braniborscy přećiwnicy masoweho plahowanja skotu njepopušća. Po tym zo je ludowa iniciatiwa před Braniborskim krajnym sejmom zwrěšćiła, chcedźa nětko z pomocu ludoweho požadanja swoje zaměry přesadźić. Zwjazk agrarna změna přećiwo masowemu plahowanju skotu w Braniborskej a Berlinje je ludowe požadanje srjedź julija zahajił.
Za ludowu iniciatiwu trěbnych 20 000 podpismow su iniciatorojo spěšnje nazběrali, cyłkownje bě so 34 000 ludźi za iniciatiwu wuprajiło. Jeničce frakcija Zelenych w krajnym sejmje je za iniciatiwu hłosowała, z čimž sejm iniciatiwu wotpokaza. Nětko přewjedu tuž ludowe požadanje. Za jeho wuspěch trjebaja 80 000 podpismow, a te maja so zběrać na zarjadach, přetož na puću hromadźene podpisma braniborski zakoń njepřipóznawa. Za hromadźenje podpismow ma zwjazk poł lěta chwile.
Janšojce (SN/JK). We wobłuku 5. łužiskeho klimoweho campa su škitarjo wobswěta a přećiwnicy zmilinjenja brunicy sobotu swój protest a žadanja na markantne wašnje před Janšojskej milinarnju zwuraznili. Protest měješe zjawnosć skedźbnić na palace problemy zmilinjenja brunicy. Hižo pjatk su z blokadu zachoda dźěłarnistwa BCE w Choćebuzu dźěłarnistwo namołwili, sobu zamołwitosć přewzać za strukturnu reformu.
Po studiji Stuttgartskeje uniwersity z lěta 2013 wustorkuje milinarnja koncerna Vattenfall telko drobnopróška, dusykowych oksidow, žiweho slěbra a dalšich škódnych maćiznow do powětra, zo so tak lětnje 4 000 lět žiwjenja niči. Statistisce woznamjenja to 373 dočasnych wumrěćow. „Z Janšojskej milinarnju wostanje najwjetši wustorkowar škódnych maćiznow na syći, a Němska dale a wjace miliny z brunicy do wukraja eksportuje. Je-li škit klimy za Vattenfall wjac hač jenož wuprajenje, měli tutu milinarnju skónčnje ze syće wzać a hasnyć“, žadaše sej Marvin Kracheel, zastupjer klimoweho campa.
Hórska straža w Berchtesgadenje je psa z hórskeje nuzy wumóžiła. Psyk bě po informacijach hórskeje słužby pola Schönauwa nad Königsseejom přez sněhowe polo běžał a do lodowcoweje škałoby padnył. Wobsedźerka bě so na hórsku słužbu wobroćiła. Helikopter pak njebě žadyn dispoziciji, tuž podaštaj so pomocnikaj pěši na puć. Jedyn z njeju pušći so z powjazom do škałoby a psa z wosebitym nastrojom wuchowa.
Před lětom pokradnjene nanowe awto je hólc po njezbožu w Brandenburgu nad Habolu pječa zaso spóznał. Wodźer awta bě ćeknył, po tym zo bě sobotu do 13lětneho zajěł. Hólčec, kiž bě z kolesom po puću, wšak je pokradnjene awto hnydom spóznał. Hólc při njezbožu padny a so zrani. Wodźer awta bě, prjedy hač so zminy, hólcej z pukami hrozył za pad, zo policiju woła.
Změny na přemysłowej płoninje
Kodersdorf (dpa/SN). Dźěła za natwar noweje twornje zhotowjerja zwjenow BORBET w Kodersdorfje dale postupuja. Kaž předewzaće zdźěli, je prěni twarski wotrězk ze zrunanjom twarskeje přestrjenje zakónčeny. Tuchwilu stajeja tam stołpy za halowu konstrukciju. Kónc oktobra ma druhi twarski wotrězk z natwarom produkciskich halow tohorunja wotzamknjeny być. Twarske dźěła zakónčić chcedźa kónc lěta. Přichodnje matej w tworni lětnje něhdźe dwaj milionaj aluminijowych zwjenow nastać. Dźěłać budźe pola BORBET w Kodersdorfje 300 do 400 ludźi.
Słónčna energija pomha