Schwerin (dpa/K/SN). Wólby Mecklenburgsko-Předpomorskeho krajneho sejma su stronje CDU ćežku poražku wunjesli a Alternatiwje za Němsku (AfD) wjetši wuspěch hač wěšćeny. Po nachwilnym kónčnym wuslědku je SPD z 30,6 procentami znowa najsylniša móc. Z nablaku 20,8 procentami pak sćěhuje ju hižo AfD. CDU dósta jenož hišće 19 procentow a Lěwica 13,2 procentaj. Za Zelenych wupraji so jeno 4,8 procentow, tak zo po lětach prěni raz parlament misnu, do kotrehož so tež FDP (3,0) a NPD (3,0) hižo njedóstanjetej. Ze 60,5 procentami bě wólbne wobdźělenje hladajcy lěpše hač lěta 2011 z 51,5 procentami.

Powšitkownje ma so za to, zo su wo­lerjo Mecklenburgsko-Předpomorskeje chcyli kanclerce Angeli Merkel (CDU) w jeje domjacym kraju čućiwu lekciju za politiku napřećo ćěkancam „zdokonjamy to“ wudźělić, a su tohodla tu stronu wolili, kotraž je w tym nastupanju najbóle populistiska. Wšitke druhe demokratiske strony buchu tohorunja chětro poskubane, najbóle Lěwica, kiž ma z pjeć procentami najwjetšu stratu. Jeje wuslědk je k tomu najšpatniši wšěch wuchodoněmskich krajow.

SPD rěka dobyćer wólbow krajneho sejma w Mecklenburgsko-Předpomorskej. Byrnjež so hižo připowědźał, je wuslědk tola njewočakowany a mje zdobom zatraša. Zo etablěrowane politiske strony wolerjow zhubja, z tym běch ličił. Zo pak Alternatiwa za Němsku (AfD) hnydom wjac hač 20 procentow nažněje, nochcych spočatnje wěrić. Jako demokraća pak mamy nětko z tym wobchadźeć móc cyle po hesle: Demokratija ma to wudźeržeć. Mamy tuž wočaknyć, što strona wuskutkuje. W Sakskim krajnym sejmje je AfD hižo zastupjena, dotal pak njeje so runje ze „sławu wopancała“, skerje je negatiwnje na so skedźbnjała. Za fatalne mam wusprawnjenja načolnych politikarjow etablěrowanych stron k jich „poražce“. Njeje prawje, zo dawaja winu politice zwjazkoweje kanclerki Angele­ Merkel. Misnjenja druhim přirja­dować je lochko – před swójskimi durjemi pytać chětro ćežko. Janek Wowčer

Hada w swojim awće našoł je muž w badensko-württembergskim Weilu. Jako chcyše wón sobotu někotre reparatury přewjesć a jako motorowu hawbu wočini, nadeńdźe w awće 1,5 metrow dołhu bowu Constrictor. Kak bě so njejědojty had tam nutř dóstał a komu słuša, njeje dotal jasne.­ Fachowc je zwěrjo dosahnył a najprjedy raz sobu wzał.

Na dróze ležacych pjenjez dla je w bayerskim Kemptenje k wobchadnemu nje­zbožu dóšło. Jako je wodźer awta na jězdni wuhlada, wón nablaku zasta, tak zo jězdźidło za nim hižo sčasom borzdźić njezamó a do njeho zrazy. Sobujěduca prědnjeho awta pak njeda so mylić a „fenki“ na dróze pilnje zběraše. 55lětna smě nětko z jednanjom překřiwjenja dla ličić. Wina na njejapkim pjenježnym zbožu bě zabyćiwy muž, kiž je swoju móšeń­ na třěše awta ležo wostajił.

Budyšin (SN). Z wosebitym zarjadowanjom zahaja so 1. Budyske tydźenje demokratije zajutřišim, njedźelu, na Žitnych wikach. Zastupjerjo towaršnostneho žiwjenja přeprošeja wobydlerjow sprjewineho města a dalšich zajimcow na swjedźeń, kotryž traje wot 14 hodź. do 19 hodź. Wo live-hudźbu postaraja so kapały Joker z Budyšina – wona doby wubědźowanje BEAT 2015 –, band Strom & Wasser z Heinzom Ratzom, znata přez projekt „...feat. The Refugees“, kaž tež Kamjeničanska skupina Expect. Jako prěni chce so Budyski wyši měšćanosta Alexander Ahrens (njestronjan) hosćom přiwobroćić, po nim tež pósłancy tydźenjow demokratije. Mjez pósłancami, dwanaće wosobami Budyskeho zjawneho žiwjenja, je tohorunja předsyda Domowiny Dawid Statnik.

Pod hesłom „Přidaj swój žonop“ skića hač do 3. oktobra najwšelakoriše zarjadowanja přiležnosć, w demokratiskim diskursu so pospytać. Hižo wot póndźele steja tež serbske poskitki w Kamjentnym domje na programje.